Home Minister Resignation : नेपाळचे गृहमंत्री सुदान गुरुंग यांनी बुधवारी तडकाफडकी आपल्या पदाचा राजीनामा दिला. आपल्या पदावर असताना त्यांनी केलेल्या आर्थिक व्यवहारांसंदर्भात काही आरोप त्यांच्यावर करण्यात येऊ लागले होते. त्यानंतर गुरुंग यांनी राजीनामा दिला. (Home Minister Resignation) दिनांक २७ मार्च रोजी गृहमंत्री म्हणून नियुक्त झालेल्या गुरुंग यांच्या कथित व्यावसायिक संबंधांवरून वाढत्या टीकेच्या पार्श्वभूमीवर त्यांनी हा राजीनामा दिला आहे. एका उद्योजकाशी असलेले व्यवसायिक संबंध आणि केलेल्या व्यवहारांमुळे गुरुंग वादाच्या भोवऱ्यात सापडले होते. आपल्या आर्थिक व्यवहारांशी संबंधित प्रकरणांची निष्पक्ष चौकशी करण्यात यावी आणि पदावर असताना हितसंबंधांचा संघर्ष टाळण्यासाठी आपण राजीनामा देत असल्याचे गुरंग यांनी सोशल मीडियावर केलेल्या पोस्टमध्ये म्हटले आहे. (Home Minister Resignation) माझ्यासाठी पदापेक्षा नीतिमत्ता श्रेष्ठ आहे आणि जनतेच्या विश्वासापेक्षा मोठी शक्ती नाही. देशात सुरू असलेल्या जनरेशन झेडच्या चळवळीद्वारे सुशासन, पारदर्शकता आणि उत्तरदायित्वाची मागणी केली जाते आहे. या जेन-झी चळवळीने हाच संदेश दिला आहे की सार्वजनिक जीवन स्वच्छ असले पाहिजे आणि नेतृत्व उत्तरदायी असले पाहिजे. माझ्या ४६ बंधू-भगिनींच्या रक्तावर आणि बलिदानावर स्थापन झालेल्या सरकारवर जर कोणी प्रश्न विचारत असेल, तर त्याचे उत्तर आहे नीतिमत्ता, असे गुरंग यांनी फेसबुक पोस्टमध्ये म्हटले आहे. (Home Minister Resignation) गुरुंग यांनी आपला राजीनामा पंतप्रधानांकडे सुपूर्द केला आहे. पंतप्रधान शाह यांनी गृहमंत्रीपद स्वतःकडे ठेवले आहे, असे पंतप्रधान बलेंद्र शाह यांच्या सचिवालयाने म्हटले आहे. गेल्या वर्षी सप्टेंबरमध्ये झालेल्या जेन-झीच्या आंदोलनादरम्यान गुरुंग सक्रिय होते. आंदोलनाचे मुख्य ठिकाण असलेल्या मैतिघर मंडळ आणि नया बानेश्वर येथे ते आंदोलकांना पाणीवाटप करताना त्यांना बघितले गेले होते. काठमांडूचे तत्कालिन महापौर बालेंद्र शाह आणि राष्ट्रीय स्वतंत्र पार्टीचे अध्यक्ष रावि लामिछाने यांना एकत्र आणण्यातही गुरुंग यांची भूमिका महत्वाची होती. (Home Minister Resignation)