पुणे, -गणेशखिंड रस्त्यावरील वाहतूक कोंडी सोडविण्यासाठी महापालिका, मेट्रो, पुणे महानगर प्रदेश विकास प्राधिकरण आणि वाहतूक पोलिसांकडून पाहणी करण्यात आली. पोलीस आयुक्तालयात पार पडलेल्या बैठकीत या रस्त्यावरील वाहतूक सुरळीत ठेवण्यासाठी लोखंडी कठडे उभे (बॅरिकेडिंग) करण्यात येणार आहेत. विद्यापीठ चौकाकडून शिवाजीनगरकडे जाणाऱ्या वाहनांसाठी मार्गिका (लेन) उपलब्ध करुन देण्यात येणार आहेत.
गणेशखिंड रस्त्यावर मेट्रोचे काम सुरू आहे. आचार्य आनंदऋषीजी चौकात (सावित्रीबाई फुले पुणे विद्यापीठ चौक) सातत्याने कोंडी होत आहे. ती सोडविण्यासाठी महापालिका, मेट्रो, वाहतूक पोलीस, पीएमआरडीएकडून पाहणी करण्यात आली. पोलीस आयुक्तालयात बैठकीचे आयोजन करण्यात आले. विद्यापीठ चौकात येणाऱ्या आणि जाणाऱ्या वाहनांसाठी मार्गिका करुन देण्यात येणार आहेत, अशी माहिती वाहतूक शाखेचे पोलीस उपायुक्त विजयकुमार मगर यांनी दिली.
या विषयांवर निर्णय…
बाणेर रस्ता, ओैंध रस्त्याने विद्यापीठ चौकाकडे येणारी वाहने विना सिग्नलशिवाय शिवाजीनगरकडे डाव्या मार्गिकेकडे नेण्यात येणार आहे. विद्यापीठ चौकात पादचाऱ्यांना रस्ता ओलांडण्यासाठी वेळ उपलब्ध करुन देण्यात येणार आहे.
सेनापती बापट रस्त्याकडे जाण्यासाठी यापूर्वी कॉसमॉस बॅंकेजवळ वळण (यू-टर्न) उपलब्ध करुन देण्यात आले होते. तेथील वळण बंद करुन सेनापती बापट रस्ता चौकातून उजवीकडे वळण्यास परवानगी असेल.
सेनापती बापट रस्ता (चतु:शृंगी मंदिर) येथून विद्यापीठ चौकाकडे येणारी सर्व वाहने सेनापती बापट रस्ता चौकातून डावीकडे वळून सरळ पाषाण रस्त्याकडे वळविण्याचे प्रस्तावित आहे. त्यासाठी मेट्रोकडून सेनापती बापट रस्ता चौक, पाषाण रस्ता असे बॅरिकेडिंग असेल.
पर्यायी मार्ग पुढीलप्रमाणे…
गणेशखिंड रस्ता, सेनापती बापट रस्ता, विद्यापीठ चौक, चतु:शृंगी पोलीस ठाणे, केंद्रीय विद्यालय, कस्तुरबा गांधी वसाहत, पाषाण रस्ता, सिंहगड गेट (पुणे ग्रामीण पोलीस मुख्यालय) येथून उजवीकडे वळून बाणेर रस्त्याने उजवीकडे वळून विद्यापीठ चौकातून डावीकडे वळून ओैंधकडे जाता येईल.
पाषाण रस्त्याने अभिमानश्री सोसायटी, पाषाण रस्ता चौक, उजवीकडे वळून अभिमानश्री सोसायटी, बाणेर रस्ता चौकातून उजवीकडे वळून बाणेर रस्त्याने उजवीकडे वळून सरळ विद्यापीठ चौकातून डावीकडे वळून ओैंधकडे जावे.
गणेशखिंड रस्ता, सेनापती बापट रस्त्यावरून ओैंधकडे जाण्यासाठी पाषाण रस्ता, अभिमानश्री सोसायटी, पाषाण रस्ता, बाणेर रस्ता चौकातून उजवीकडे वळून सर्जा हॉटेल चौकातून आयटीआय रस्त्योने परिहार चौकाकडून इच्छितस्थळी जाता येईल.
पिंपरी-चिंचवडकडून येणाऱ्या वाहनांनी ब्रेमेन चौकातून डावीकडे वळून स्पायसर कॉलेज रस्ता, आंबेडकर चौक, साई चौक, खडकी रेल्वे स्थानक भुयारी मार्ग, डावीकडे वळून चर्च चौक, जुना मुंबई-पुणे महामार्गाचा वापर करावा.
मेट्रोच कामही सुरू होणार
मेट्रोच्या पुढील टप्याचे काम सुरू होणार असून, पुणे विद्यापीठ चौकातील 11 मीटरपर्यंचा रस्ता मेट्रोच्या कामासाठी वापरला जाणार आहे. त्यासाठी मेट्रोकडून अतिरिक्त बॅरीकेडिंग करण्यात येणार आहे. या भागातील वाहतूक कोंडी टाळण्यासाठी विद्यापीठ चौक, बाणेर रस्ता, पाषाण रस्ता, गणेशखिंड रस्ता, सेनापती बापट रस्ता तसेच अन्य रस्त्यांवरील वाहतूक व्यवस्थेत बदल करण्यात येणार आहेत.