छिंदवाडा(मध्यप्रदेश) – “आदित्य… नाम तो सुना ही होगा’, अशा शब्दांत ठाकरे गटाचे नेते आदित्य ठाकरे यांनी आज मुख्यमंत्री एकनाथ शिंदे यांना टोला लगावला. छत्रपती संभाजीनगर येथील सिद्धार्थ उद्यानातील बछड्याच्या नामकरण सोहळ्यात एका चिठ्ठीत आदित्य हे नाव निघाले होते.
मात्र, हे नाव पाहताच ते मागे घेण्याची विनंती वनमंत्री सुधीर मुनगंटीवार यांनी केली होती. त्यानंतर एकनाथ शिंदे यांनी ते नाव मागे घेत दुसरी चिठ्ठी काढली होती. या घटनेवरूनच आज आदित्य ठाकरेंनी एकनाथ शिंदेंना टोला लगावला आहे. आदित्य ठाकरे सध्या मध्यप्रदेश दौऱ्यावर आहेत. छिंदवाडा येथे छत्रपती शिवाजी महाराजांच्या पुतळ्याचे आदित्य यांच्या हस्ते अनावरण करण्यात आले. यावेळी कॉंग्रेस नेते व मध्यप्रदेशचे माजी मुख्यमंत्री कमलनाथही उपस्थित होते.
यावेळी बोलताना, आदित्य ठाकरे म्हणाले, छत्रपती संभाजीनगरात केवळ चिठ्ठीत आदित्य नाव निघाले तर हे सरकार घाबरले व तातडीने नाव मागे घेण्यास सांगितले. एवढी भीती त्यांच्या मनात आहे. मात्र, त्यांनी आता काहीही केले तरी त्यांचे सरकार लोकच पाडून टाकणार आहेत. लोक फक्त निवडणुकीची वाट पाहत आहेत. एकनाथ शिंदेंनी भाजपच्या मदतीने गद्दारी करुन सरकार पाडले. अशा गद्दारांना जनता पुन्हा निवडून देणार नाही.
हेच का भाजपचे हिंदुत्व?
महाराष्ट्रात वारकऱ्यांवर लाठीचार्ज झाला. हेच भाजपचे हिंदुत्व आहे का? बारसू रिफायनरीला शांततेच्या मार्गाने विरोध करणाऱ्या ग्रामस्थांवर लाठीचार्ज झाला. मराठा आरक्षणासाठी उपोषणाला बसलेल्या आंदोलकांवर अमानुष लाठीहल्ला झाला. हेच भाजपचे हिंदुत्व आहे का? यानंतर उपस्थितांना उद्देशून, या सर्वांचा तुम्ही बदला घेणार की नाही?, असेही आदित्य यांनी म्हटले.
तसेच, आपल्याला बदला सुडाच्या भावनेने नव्हे तर परिवर्तन हवे या उद्देशाने घ्यायचा आहे. महाराष्ट्रात येत्या निवडणुकीत बदल घडवायचाच आहे. सत्यमेव जयते विरुद्ध सत्तामेव जयते, अशी ही लढाई आहे. मध्यप्रदेशमध्येही कमलनाथ यांचे सरकार गद्दारी करुनच भाजपने पाडले. मध्य प्रदेशात पुढील निवडणुकीत कॉंग्रेसच विजयी होणार आहे. मला फक्त तुम्ही शपथ समारोह कधी ठेवणार आहात? तेवढेच सांगा, असे आदित्य कमलनाथ यांना म्हणाले.
मध्यप्रदेशमधील पांढुर्णा, छिंदवाडा येथे उभारलेल्या छत्रपती शिवाजी महाराजांच्या अश्वारुढ पुतळ्याचं अनावरण आज माजी मुख्यमंत्री कमलनाथ जी ह्यांच्या हस्ते करण्यात आले. ह्या सोहळ्यास उपस्थित राहून छत्रपती शिवाजी महाराजांना पुष्पहार अर्पण करुन अभिवादन केले.
ह्यावेळी खासदार नकुलनाथ… pic.twitter.com/aqGu7JTVxz
— Aaditya Thackeray (@AUThackeray) September 22, 2023