Top 10 Sports News Bulletin : १. हॅरी ब्रूकचे विक्रमी द्विशतक; शुबमन गिलचा मोडला वर्ल्ड रेकॉर्ड

इंग्लंडचा कर्णधार हॅरी ब्रूकने आंतरराष्ट्रीय एकदिवसीय क्रिकेटमध्ये नवा इतिहास रचला आहे. श्रीलंकेविरुद्ध खेळताना ब्रूकने अवघ्या ११४ चेंडूंत द्विशतक ठोकत भारताच्या शुबमन गिलचा (११७ चेंडू) सर्वात जलद द्विशतकाचा जागतिक विक्रम मोडला. एकदिवसीय सामन्यात द्विशतक झळकावणारा तो इंग्लंडचा पहिलाच फलंदाज ठरला आहे. ब्रूकने ११६ चेंडूंत २१ चौकार आणि १० षटकारांसह २०२ धावांची वादळी खेळी केली. त्याच्या या ऐतिहासिक खेळीच्या बळावर इंग्लंडने ४० षटकांत ४ बाद ४२९ धावांचा विशाल डोंगर उभारला. यापूर्वी हा विक्रम बेन स्टोक्सच्या (१८२ धावा) नावावर होता.

२. अभिषेक शर्मा बनला टी-२० चा नवा ‘सिक्सर किंग’; मोडला रोहित शर्माचा वर्ल्ड रेकॉर्ड

न्यूझीलंडविरुद्धच्या पहिल्या टी-२० सामन्यात भारताचा सलामीवीर अभिषेक शर्माने १२ चेंडूंत २९ धावांची वादळी खेळी करत रोहित शर्माचा जागतिक विक्रम मोडला. अभिषेकने आंतरराष्ट्रीय टी-२० च्या पॉवरप्लेमध्ये सर्वाधिक ९९ षटकार मारण्याचा नवा विश्वविक्रम रचला. यापूर्वी हा विक्रम रोहित शर्माच्या (९८ षटकार) नावावर होता. याशिवाय, आंतरराष्ट्रीय टी-२० मध्ये डावाच्या पहिल्याच चेंडूवर सर्वाधिक ७ वेळा षटकार मारणारा तो जगातील पहिला खेळाडू ठरला. त्याने अफगाणिस्तानच्या शफीकुल्लाह शिनवारीला (६ वेळा) मागे टाकले. भारताने हा सामना ४ गडी राखून जिंकला.

३. भारतातील मास्टर्स विश्वचषकात ५० प्लस संघ पाठवण्यास पाकिस्तानचा नकार

पुढील वर्षी जानेवारी महिन्यात भारतात होणाऱ्या आंतरराष्ट्रीय मास्टर्स क्रिकेट विश्वचषक स्पर्धेत सहभागी होण्यासाठी पीसीबीने आपल्या ५० वर्षांवरील वेटरन्स संघाला परवानगी नाकारली आहे. गतवर्षी श्रीलंकेत झालेली ही स्पर्धा पाकिस्तानने जिंकली होती. भारताकडून सुरक्षा आणि व्हिसाचे पूर्ण आश्वासन मिळूनही पाकिस्तानचे गृहमंत्री आणि पीसीबी प्रमुख मोहसिन नक्वी यांनी संघ भारतात पाठवण्यास थेट मनाई केली. परिणामी, पाकिस्तान वेटरन्स क्रिकेट असोसिएशनने या स्पर्धेतून माघार घेतली असून आयोजकांना पर्यायी संघाची व्यवस्था करण्यास सांगितले आहे. यापूर्वी हॉकी संघ पाठवण्यासही पाकिस्तानने नकार दिला होता.

४. आशियाई पॅरा गेम्स: सिमरन शर्माची १०० आणि २०० मीटरमध्ये विक्रमी दुहेरी सुवर्ण भरारी

जपानमधील आशियाई पॅरा गेम्स २०२६ मध्ये भारताची स्टार टी१२ धावपटू सिमरन शर्माने १०० मीटर (१२.०२ सेकंद) आणि २०० मीटर (२४.८० सेकंद) या दोन्ही स्पर्धांमध्ये नवे गेम्स रेकॉर्ड नोंदवत दोन सुवर्णपदके पटकावली. सहाव्या महिन्यात अकाली जन्म झाल्यामुळे दृष्टी गमावलेल्या सिमरनचा बालपणातील प्रवास संघर्षाचा राहिला. तिचे पती व लष्करातील प्रशिक्षक गजेंद्र सिंग यांच्या मार्गदर्शनाखाली तिने ट्रॅकवर स्वतःला सिद्ध केले. पॅरिस पॅरालिम्पिक कांस्यपदक विजेत्या सिमरनने २०२२ च्या हांगझोऊमधील दोन्ही रौप्यपदकांचे रूपांतर यंदा विक्रमी सुवर्णपदकांत करून देशाची मान उंचावली.

५. मराठमोळ्या सचिन खिलारीची जपानमध्ये ऐतिहासिक सुवर्ण कामगिरी; आशियाई पॅरा गेम्समध्ये रचला नवा विक्रम

जपानमधील आशियाई पॅरा गेम्स २०२६ मध्ये भारताचा स्टार पॅरा ॲथलीट सचिन सर्जेराव खिलारी याने गोळाफेक (शॉट पुट) एफ४६ प्रकारात १५.८७ मीटरचा नवा गेम्स रेकॉर्ड नोंदवत सुवर्णपदक पटकावले. या क्रीडा प्रकारात भारताच्या मोहम्मद यासीरने रौप्य आणि परवीनने कांस्यपदक जिंकत ऐतिहासिक ‘क्लीन स्वीप’ केला. याशिवाय महिलांच्या शॉट पुट एफ३४ प्रकारात भाग्यश्री जाधवने रौप्यपदक मिळवले. पॉवरलिफ्टिंगमध्ये दोन्ही पायांना पोलिओ असतानाही तमिळनाडूच्या कस्तुरी राजमणीने १०८ किलो वजन उचलून रौप्यपदक जिंकले. भारतीय पॅरा खेळाडूंच्या या अफाट जिद्दीमुळे पदक तालिकेत भारताचा दबदबा आणखी मजबूत झाला आहे.

६. न्यूझीलंड दौऱ्यातून वगळल्यानंतर मोहम्मद शमीचे निवड समितीवर रोखठोक भाष्य

न्यूझीलंड दौऱ्यातील तिन्ही फॉरमॅटसह भारत ‘अ’ संघातूनही वगळण्यात आल्यानंतर वेगवान गोलंदाज मोहम्मद शमीने निवड समितीच्या संवादावर थेट नाराजी व्यक्त केली आहे. रणजी सामन्यातील विजयानंतर पत्रकारांशी बोलताना शमी म्हणाला, “मी भारतीय संघात नाही आणि सेंट्रल कॉन्ट्रॅक्टमध्येही नाही, मग माझ्याशी कोण आणि का बोलेल?” फिटनेसवर प्रश्न उपस्थित करणाऱ्यांना उत्तर देताना तो म्हणाला, “मी आजही पीकवरच आहे.” २०२७ च्या विश्वचषकाचा विचार न करता सध्याच्या खेळावर लक्ष केंद्रित करत असल्याचे त्याने स्पष्ट केले. तसेच, भुवनेश्वर कुमारच्या पुनरागमनाचे स्वागत करत बंगाल संघाप्रती त्याने आपली निष्ठा व्यक्त केली.

७. स्टार फुटबॉलपटू ख्रिस्तियानो रोनाल्डोला मोठा दणका, ३० दिवसांची घातली बंदी

पोर्तुगालचा स्टार फुटबॉलपटू ख्रिस्तियानो रोनाल्डोवर पोर्तुगाल फुटबॉल महासंघाने शिस्तभंगाच्या कारवाईत ३० दिवसांची बंदी आणि २५५ युरोचा दंड ठोठावला आहे. नेशन्स लीगदरम्यान राखीव बाकावर बसावे लागल्याने मुख्य प्रशिक्षक जॉर्ज जीसस यांच्याशी वाद घालून रोनाल्डोने संघाचा कॅम्प सोडला होता. यानंतर रोनाल्डोने स्वतःवरील आरोप मान्य केल्याने ही शिक्षा तुलनेने सौम्य ठेवण्यात आली. ही बंदी १ ऑक्टोबरपासून लागू मानली गेली असून, त्याने १९ दिवसांची शिक्षा पूर्ण केली आहे. त्यामुळे १४ नोव्हेंबर रोजी डेन्मार्कविरुद्धच्या सामन्यात तो पुनरागमनासाठी उपलब्ध होऊ शकतो. रोनाल्डोकडे या निर्णयाविरोधात अपील करण्याचा पर्याय अद्याप खुला आहे.

८. आयसीसीची शफाली वर्मावर मोठी कारवाई! दुसऱ्या सामन्यातील ‘ती’ चूक पडली महागात

भारतीय महिला क्रिकेट संघाची सलामीवीर शफाली वर्मा हिला झिम्बाब्वेविरुद्धच्या दुसऱ्या टी-२० सामन्यात आयसीसी आचारसंहितेचा भंग केल्याप्रकरणी अधिकृत ताकीद देण्यात आली आहे. यासोबतच तिच्या खात्यात एक डिमेरिट पॉईंट जोडण्यात आला. क्षेत्ररक्षणादरम्यान झेल सुटल्यानंतर शफालीने रागाच्या भरात चेंडू जमिनीवर आपटला होता. खेळाच्या साहित्याचा गैरवापर केल्याप्रकरणी कलम २.२ नुसार ही कारवाई झाली. शफालीने चूक मान्य केल्याने सुनावणी टळली. २४ महिन्यांतील तिचे हे पहिलेच उल्लंघन आहे. दरम्यान, या सामन्यात शफालीने २५ चेंडूंत ५५ धावांची वादळी खेळी करत भारताला मालिका जिंकून दिली होती.

९. १०० वर्षांनंतर पहिल्यांदाचं असं घडलं! द.आफ्रिका-ऑस्ट्रेलिया सामन्यात नोंदवला गेला ऐतिहासिक विक्रम

दक्षिण आफ्रिका आणि ऑस्ट्रेलिया यांच्यातील दुसऱ्या कसोटीत १०० वर्षांनंतर अनोख्या विक्रमाची नोंद झाली. या सामन्यात दोन्ही संघांचे मिळून तब्बल १९ खेळाडू ३० वर्षे किंवा त्याहून अधिक वयाचे होते. कसोटी इतिहासात १९२६ नंतर इतके अनुभवी खेळाडू एकाच वेळी खेळण्याची ही पहिलीच वेळ ठरली. ऑस्ट्रेलियाच्या प्लेइंग इलेव्हनमध्ये सर्वच्या सर्व ११ खेळाडू ३० पार होते, तर आफ्रिकेच्या संघात ८ खेळाडू ३० वर्षांमागील होते. या सामन्यात दक्षिण आफ्रिकेने ऑस्ट्रेलियाचा १ डाव आणि ३१ धावांनी पराभव केला. यासह मालिकेत १-१ ने बरोबरी साधली.

१०. भारतासाठी खेळायचे असल्यास विदेशी नागरिकत्व सोडा; उच्च न्यायालयाचा OCI क्रिकेटपटूंना दणका

देशांतर्गत क्रिकेट स्पर्धांसाठी भारतीय पासपोर्ट सक्तीच्या करण्याच्या बीसीसीआयच्या नियमाविरोधात १२ ओसीआय (परदेशी नागरिकत्वधारक) क्रिकेटपटूंनी दाखल केलेली याचिका मुंबई उच्च न्यायालयाने फेटाळून लावली. भारतासाठी खेळण्याची इतकी इच्छा असल्यास विदेशी नागरिकत्व सोडून भारतीय नागरिकत्वासाठी अर्ज करा, असा रोखठोक पवित्रा न्यायालयाने घेतला. भारतात प्रतिभेची कमतरता नसून एकाच वेळी दोन्ही देशांचे फायदे घेता येणार नाहीत, असे मुख्य न्यायमूर्तींनी स्पष्ट केले. बीसीसीआयनेही देशाच्या कायद्यानुसार ओसीआय खेळाडू भारताचे प्रतिनिधित्व करू शकत नसल्याचा युक्तिवाद केला. या प्रकरणाची पुढील सुनावणी २५ नोव्हेंबर रोजी होणार आहे.