Sugarcane Price – आगामी 2026-27च्या ऊस गळीत हंगामाच्या पार्श्वभूमीवर ऊसदराचा मुद्दा पुन्हा ऐरणीवर आला असून, स्वाभिमानी शेतकरी संघटनेने शेतकर्‍यांच्या मागण्यांसाठी आक्रमक पवित्रा घेतला आहे. मागील हंगामाच्या अंतिम ऊसदरात प्रतिटन किमान 300 रुपयांची वाढ करावी, अशी प्रमुख मागणी संघटनेचे जिल्हाध्यक्ष राजू शेळके यांच्या नेतृत्वाखाली जिल्हाधिकार्‍यांना दिलेल्या निवेदनात केली आहे.

वाढता उत्पादन खर्च, मजुरी, खते, बियाणे, डिझेल, सिंचन आणि वाहतूक खर्चाचा विचार करून ऊसदर निश्चित करावा, अशी भूमिका संघटनेने मांडली. ऊस गाळप झाल्यानंतर 14 दिवसांच्या मुदतीत बिल न देणार्‍या कारखान्यांकडून कायद्यानुसार 15 टक्के व्याजासह रक्कम वसूल करावी, इथेनॉल व इतर उपपदार्थांमधून मिळणार्‍या उत्पन्नातील शेतकर्‍यांचा योग्य हिस्सा निश्चित करावा,

गळीत हंगाम सुरू होण्यापूर्वी कारखान्यांनी पहिली उचल आणि अंतिम देयकाचा ऊसदर स्पष्टपणे जाहीर करावा. ऊस वजनातील अनियमितता, बेकायदेशीर कपात तसेच वाहतूक खर्चातील गैरप्रकार रोखण्यासाठी विशेष तपास पथके नियुक्त करावीत, शासनाच्या निर्धारित वेळेपूर्वी गाळप सुरू करणार्‍या कारखान्यांवर कठोर कारवाई करावी. वारंवार नियमांचे उल्लंघन करणार्‍या कारखान्यांच्या परवान्याबाबतही कठोर निर्णय घ्यावा, अशा विविध मागण्या निवेदनात करण्यात आल्या आहेत.

यावेळी अर्जुनभाऊ साळुंखे, मनोहर येवले, रमेश पिसाळ, राजू घाडगे, मोहन घाडगे, सुधाकर शितोळे, संदिप काळंगे, अमोल पवार, महादेव डोंगरे, जनार्दन आवारे यांच्यासह शेतकरी उपस्थित होते. मागण्यांबाबत प्रशासनाने गांभीर्याने भूमिका न घेतल्यास सातारा जिल्ह्यात व्यापक आंदोलन छेडण्याचा इशारा स्वाभिमानी शेतकरी संघटनेने दिला आहे.