Satara News : गणरायाच्या आगमनाचा जल्लोष सुरू असतानाच राजवाडा परिसरात आगीच्या घटनेने काही काळ धावपळ उडाली. सह्याद्रीचा राजा मित्र मंडळाच्या श्री आगमन मिरवणुकीसाठी उभारण्यात आलेल्या ड्रॅगनच्या प्रतिकृतीने अचानक पेट घेतला. (Satara News)

आगीने काही क्षणांतच लगतच्या दुसऱ्या प्रतिकृतीला वेढल्याने उपस्थित कार्यकर्ते आणि नागरिकांमध्ये घबराट निर्माण झाली. या घटनेत ट्रॅक्टरच्या ट्रॉलीवर ठेवलेला मंडळाचा जनरेटर जळून खाक झाला; मात्र सुदैवाने कोणतीही जीवितहानी झाली नाही. (Satara News)

मंगळवारी रात्री सव्वा आठच्या सुमारास राजवाडा परिसरात ही घटना घडली. श्री आगमन सोहळ्यासाठी मोठ्या संख्येने नागरिक आणि गणेशभक्त उपस्थित असताना ड्रॅगनच्या प्रतिकृतीतून धूर आणि त्यानंतर आगीच्या ज्वाळा दिसू लागल्या. (Satara News)

आगीचा भडका वाढत असल्याचे लक्षात येताच कार्यकर्त्यांनी नागरिकांना सुरक्षित अंतरावर हलविण्यास सुरुवात केली. त्यामुळे संभाव्य दुर्घटना टळली. घटनेची माहिती मिळताच सातारा नगरपालिका अग्निशमन दल घटनास्थळी दाखल झाले. (Satara News)

किसनवीर सहकारी साखर कारखान्याच्या अग्निशमन यंत्रणेचीही मदत घेण्यात आली. दोन अग्निशमन बंबांच्या सहाय्याने जवानांनी पाण्याचा मारा करत आग आटोक्यात आणली. आगीचा विस्तार वेळीच रोखण्यात आल्याने मोठा अनर्थ टळला. (Satara News)

दरम्यान, राजवाडा बसस्थानकासमोर श्री आगमन सोहळ्यामुळे मोठी गर्दी झाल्याने वाहतूक व्यवस्थेवरही ताण आला होता. आगीची माहिती मिळताच सातारा शहर आणि शाहूपुरी पोलिसांनी घटनास्थळी धाव घेत गर्दी आणि वाहतूक नियंत्रणात आणली. नागरिकांना घटनास्थळापासून दूर ठेवत सुरक्षिततेच्या दृष्टीने आवश्यक उपाययोजना करण्यात आल्या. (Satara News)

गणेशोत्सवाच्या पार्श्वभूमीवर मोठ्या प्रतिकृती, जनरेटर, विद्युत रोषणाई आणि मिरवणुकीतील गर्दी यांचा वाढता वापर पाहता सुरक्षेच्या उपाययोजनांकडे गांभीर्याने पाहण्याची गरज या घटनेने अधोरेखित केली आहे. (Satara News)

नगराध्यक्ष अमोल मोहिते आणि उपनगराध्यक्ष ॲड. दत्ता बनकर यांनी घटनेची दूरध्वनीवरून माहिती घेतली. गणेश मंडळांनी उत्सवाचा जल्लोष कायम ठेवतानाच अग्निसुरक्षा आणि नागरिकांच्या सुरक्षिततेला सर्वोच्च प्राधान्य द्यावे, असे आवाहन त्यांनी केले. (Satara News)

Satara News : एसटी बस मध्ये हरवलेली दागिन्यांची पर्स अवघ्या चार तासात परत; सातारा वाहतूक नियंत्रक बाळकृष्ण बरकडे यांची कामगिरी

सुरक्षित श्री आगमन सोहळ्यासाठी काही मूलभूत खबरदारी

जनरेटर सुरक्षित अंतरावर ठेवा : जनरेटरजवळ ज्वलनशील सजावट, कापड किंवा प्लास्टिक साहित्य ठेवू नये.
विद्युत जोडण्या तपासा : वायरिंग, जोडणी, मल्टीप्लग आणि विद्युत उपकरणांची तज्ज्ञांकडून तपासणी करून घ्यावी.
अग्निशामक यंत्रणा सज्ज ठेवा : मिरवणूक मार्गावर आणि मंडपाजवळ अग्निशामक सिलिंडर तसेच आवश्यक साधने उपलब्ध ठेवावीत.
मोठ्या प्रतिकृतींची काळजी : ड्रॅगन, राक्षस किंवा अन्य मोठ्या प्रतिकृती उभारताना त्यांच्या सभोवतालची सुरक्षित जागा कायम ठेवावी.
गर्दीवर नियंत्रण : प्रतिकृती, जनरेटर आणि विद्युत उपकरणांजवळ नागरिकांची गर्दी होणार नाही, याची दक्षता घ्यावी.
आपत्कालीन मार्ग मोकळा ठेवा : अग्निशमन बंब, रुग्णवाहिका आणि पोलिसांच्या वाहनांना तातडीने प्रवेश करता यावा यासाठी मार्ग अडवू नये.
आग लागल्यास घाबरू नका : तातडीने वीजपुरवठा बंद करून नागरिकांना सुरक्षित अंतरावर हलवावे आणि अग्निशमन दलाला कळवावे.
मिरवणुकीपूर्वी सुरक्षा पाहणी : मंडळाच्या पदाधिकाऱ्यांनी मिरवणूक सुरू करण्यापूर्वी विद्युत व्यवस्था, जनरेटर आणि सजावटीची अंतिम तपासणी करावी.