Someshwar Sugar Factory Election – बारामतीच्या राजकारणातील महत्त्वाचा केंद्रबिंदू असलेल्या श्री सोमेश्वर सहकारी साखर कारखान्याची पंचवार्षिक निवडणूक जाहीर होताच तालुक्यातील राजकीय हालचालींना वेग आला आहे. लोकसभा आणि विधानसभा निवडणुकांनंतर आता सोमेश्वरच्या निवडणुकीतही पवार कुटुंबातील राजकीय संघर्षाची छाया पडण्याची चिन्हे दिसू लागली आहेत.

राष्ट्रवादी काँग्रेस शरदचंद्र पवार पक्षाचे युवा नेते युगेंद्र पवार यांनी स्वतंत्र शेतकरी पॅनेलच्या माध्यमातून निवडणूक लढविण्याचे स्पष्ट संकेत दिल्याने, सुनेत्रा पवार यांच्या मार्गदर्शनाखालील पॅनेलसमोर नवे राजकीय आव्हान उभे राहण्याची शक्यता निर्माण झाली आहे.

‘पवार विरुद्ध पवार’ नव्हे, शेतकरी सभासदांसाठी पर्याय!
सोमेश्वरच्या निवडणुकीकडे केवळ सहकारी संस्थेची निवडणूक म्हणून न पाहता बारामतीतील बदलत्या राजकीय समीकरणांच्या पार्श्वभूमीवर पाहिले जात आहे. मात्र, युगेंद्र पवार यांनी या लढतीला कौटुंबिक संघर्षाचे स्वरूप देण्यास स्पष्टपणे नकार दिला आहे. “आम्हाला पवार विरुद्ध पवार असे करण्यात रस नाही. तसे होऊ नये, असेच आम्हाला वाटते. कुणाच्या विरोधात लढण्यापेक्षा शेतकरी सभासदांसाठी सक्षम पर्याय उभा राहावा, यासाठी आम्ही निवडणुकीत उतरत आहोत,” असे युगेंद्र पवार यांनी स्पष्ट केले.

‘पवार विरुद्ध पवार’चीही शक्यता?
सोमेश्वरच्या निवडणुकीत पवार विरुद्ध पवार असा राजकीय संघर्ष रंगण्याची चर्चा असतानाच युगेंद्र पवार यांनी वेगळाच राजकीय सूर आळविला आहे. ज्येष्ठ नेते शरद पवार यांचे लक्ष सोमेश्वर सहकारी साखर कारखान्यावर असावे, अशी सभासदांची इच्छा असल्याचे सांगत, “पवार विरुद्ध पवार असा प्रचार करण्यापेक्षा ‘पवार विथ पवार’ असेही होऊ शकते,” असे सूचक विधान त्यांनी केले आहे.

बिनविरोध निवडणुकीचे सुनेत्रा पवार यांचे आवाहन
दरम्यान, राज्याच्या उपमुख्यमंत्री सुनेत्रा पवार यांनी दोन दिवसांपूर्वी झालेल्या शेतकरी मेळाव्यात सोमेश्वरची निवडणूक बिनविरोध करण्याचे आवाहन केले होते. अजित पवार यांच्या विचारांनीच सोमेश्वरची निवडणूक होईल, असेही त्यांनी यावेळी स्पष्ट केले. मात्र, युगेंद्र पवार यांच्या स्वतंत्र पॅनेलच्या संकेतांमुळे निवडणूक बिनविरोध होण्याची शक्यता कमी होत असून, सोमेश्वरच्या निवडणुकीत आता प्रत्यक्ष राजकीय संघर्ष रंगण्याची चिन्हे आहेत.

१५० गावांतील सभासदांचे भवितव्य ठरविणारी निवडणूक
श्री सोमेश्वर सहकारी साखर कारखान्याच्या पंचवार्षिक निवडणुकीचा कार्यक्रम प्रशासनाने जाहीर केला आहे. ११ ऑक्टोबर रोजी मतदान होणार असून, १२ ऑक्टोबरला मतमोजणी होणार आहे. सोमेश्वर साखर कारखान्याचे कार्यक्षेत्र तब्बल १५० गावांमध्ये विस्तारलेले आहे. बारामती, पुरंदर, खंडाळा आणि फलटण या तालुक्यांतील सभासद या निवडणुकीत सहभागी होणार असल्याने शेतकरी आणि सहकार क्षेत्रात या निवडणुकीला विशेष राजकीय महत्त्व प्राप्त झाले आहे. त्यामुळे ही निवडणूक केवळ कारखान्याच्या संचालक मंडळाची नसून, या भागातील आगामी राजकीय समीकरणांची दिशा ठरविणारी लढत ठरण्याची शक्यता व्यक्त केली जात आहे.