Pune News : “आजच्या तीव्र स्पर्धात्मक युगात आपल्या गुणवंत विद्यार्थ्यांनी केवळ पदवी न घेता उच्च आणि तंत्रशिक्षण घेण्यावर (Pune News) भर दिला पाहिजे. विद्यार्थ्यांनी उच्च शिक्षण घेऊन स्वतःच्या पायावर उभे राहावे आणि स्वतःच्या प्रगतीसोबतच आपल्या लोणारी समाजाचीही प्रगती साधावी,” असे आवाहन अखिल लोणारी समाज सेवा संघाचे धडाडीचे अध्यक्ष व माजी आमदार रवींद्र धंगेकर यांनी येथे केले.

अखिल लोणारी समाज सेवा संघ आणि पुणे (Pune News) लोणारी समाज शैक्षणिक आणि सामाजिक ट्रस्ट, पुणे यांच्या संयुक्त विद्यमाने आयोजित करण्यात आलेल्या भव्य ‘गुणवंत विद्यार्थी सत्कार आणि पुरस्कार वितरण समारंभ सोहळ्यात’ ते मुख्य मार्गदर्शक म्हणून बोलत होते. पुण्यात पार पडलेला हा सोहळा संपूर्ण महाराष्ट्र राज्यातून आलेल्या समाज बांधव आणि भगिनींच्या अथांग उत्साहात आणि उपस्थितीत अतिशय दिमाखदार व ऐतिहासिक पद्धतीने यशस्वीरीत्या संपन्न झाला.

यावेळी पुढे बोलताना धंगेकर यांनी संस्थेच्या कामाचा गौरव केला आणि संघाने आगामी काळातही संघ अशाच पद्धतीने समाजातील गोरगरीब आणि गरजू विद्यार्थ्यांना शैक्षणिक मदत करत राहणार असून जेणेकरून एकही हुशार विद्यार्थी पैशांअभावी शिक्षणापासून वंचित राहणार नाही, अशी ग्वाही देत समाजातील युवा पिढीला नवी दिशा आणि प्रेरणा देण्यासाठी संघ सदैव पाठीशी उभा राहील, असे सांगितले.

या कार्यक्रमाचे अध्यक्षपद उद्योजक शिवाजी शिंदे यांनी भूषवले. त्यांनी आपल्या अध्यक्षीय भाषणात अखिल लोणारी समाज सेवा संघाच्या समाजोपयोगी कार्याचा गौरव केला. समाजाला प्रगतीपथावर नेण्यासाठी संघ करत असलेले प्रयत्न अत्यंत कौतुकास्पद असल्याचे सांगत समाजातील तरुण पिढी आणि विद्यार्थी उच्चशिक्षित झाले, तरच खऱ्या अर्थाने समाजाची शाश्वत प्रगती घडेल, असा दृढ विश्वास त्यांनी व्यक्त केला.

या सोहळ्याला येवलेचे नगर अध्यक्ष युवराज लोणारी आणि डॉ.रामदास कुटे,भाऊसाहेब गोडसे,इचलकरंजी चे नगरसेवक सचिन राणे या मान्यवरांची प्रमुख उपस्थिती लाभली होती. कार्यक्रमाची प्रास्तावना अनिरुद्ध कालेल यांनी केली, ज्यामध्ये त्यांनी संस्थेच्या आजवरच्या प्रवासाचा आणि उद्दिष्टांचा आढावा घेतला. यानंतर विविध पुरस्कार आणि शिष्यवृत्तींचे सुयोग्य वाटप मान्यवरांच्या हस्ते करण्यात आले.

यामध्ये विविध क्षेत्रात उल्लेखनीय कार्य करणाऱ्या समाजातील रत्नांना ‘अखिल लोणारी समाज सेवा संघ व पुणे लोणारी सामाजिक व शैक्षणिक ट्रस्ट’च्या वतीने प्रतिष्ठित समाज भूषण पुरस्कारांनी सन्मानित करण्यात आले. यामध्ये श्रीमती इंदुमती कुटे यांना ‘आदर्श माता पुरस्कार’, विष्णू सांगोलकर यांना ‘आदर्श प्रशासकीय अधिकारी पुरस्कार’, कालिदास बजबळकर यांना ‘आदर्श उद्योजक पुरस्कार’,सविता कारंडे यांना ‘आदर्श शिक्षिका पुरस्कार’, डॉ. सतीश कुरे यांना ‘आदर्श वैद्यकीय सेवा पुरस्कार’ तर प्रकाश ठोणे यांना ‘आदर्श शेतकरी पुरस्कार’ देऊन गौरविण्यात आले.

या सोहळ्यात पुरस्कारार्थींच्या वतीने बोलताना ‘आदर्श प्रशासकीय अधिकारी’ पुरस्कार देण्यात आलेले विष्णू सांगोलकर यांनी आपल्या मार्गदर्शनपर भाषणात तरुणांना मोलाचा संदेश दिला. तरुणांनी आयुष्यात केवळ स्वप्न न बघता जिद्द आणि चिकाटीच्या जोरावर सतत यश संपादन करत राहिले पाहिजे, असे सांगत दहावी आणि बारावी ही केवळ यशाची पहिली पायरी आहे, विद्यार्थ्यांनी इथून पुढे उच्च शिक्षण घेऊन आपल्या समाजाचे नाव देशात आणि जागतिक स्तरावर उच्च शिखरावर पोहोचवले पाहिजे आणि कठोर परिश्रमातूनच हे सर्व शक्य आहे, हे या विद्यार्थ्यांनी नेहमी लक्षात ठेवावे, असे प्रतिपादन त्यांनी केले.

तर ‘आदर्श उद्योजक’ पुरस्कार देण्यात आलेले कालिदास बजबळकर यांनी अत्यंत प्रतिकूल आणि बिकट परिस्थितीवर मात करत कशा प्रकारे उद्योग क्षेत्रात यश संपादन केले, याचा प्रेरणादायी प्रवास मांडला. बजबळकर टेक्नॉलॉजीच्या माध्यमातून आधुनिक तंत्रज्ञानाचा वापर करून आम्ही आजवर हजारो शेतकऱ्यांना आर्थिकदृष्ट्या सक्षम बनवले असून या उद्योगाच्या माध्यमातून ३०० हून अधिक जणांना थेट रोजगाराच्या संधी उपलब्ध करून दिल्या आहेत, असे सांगत त्यांनी उपस्थित तरुण पिढीला उद्योग क्षेत्रात उतरण्याची नवी प्रेरणा दिली.

विशेषतः हा कार्यक्रम यशस्वी होण्यासाठी संघाचे (Pune News) संचालक दिलीप राणे , उमाजी ढेबरे आणि भाऊसाहेब गोरवडे,संदीप होळकर यांनी अत्यंत मोलाचे योगदान देत अथक परिश्रम घेतले. त्यांच्या अचूक नियोजनामुळे आणि समाज हिताच्या तळमळीमुळेच हा सोहळा यशस्वीतेच्या शिखरावर पोहोचला. कार्यक्रमाचे उत्कृष्ट सूत्रसंचालन प्रा. अलका आढाव आणि आप्पासाहेब करचे यांनी आपल्या बहारदार शैलीत केले.

तर प्रतिभा धंगेकर आणि नवनाथभाऊ रानगट यांनी अत्यंत भारदस्तपणे मानपत्राचे वाचन करून कार्यक्रमाची शोभा आणखी वाढवली. या सोहळ्यामध्ये सुनंदा राक्षे यांच्यासह लोणारी महिला बचत गटातील सर्व महिलांनी उत्स्फूर्तपणे सहभाग नोंदवला. कार्यक्रमाच्या शेवटी उपस्थित सर्व समाज बांधवांनी ‘स्वादिष्ट पुरणपोळीच्या’ जेवणाचा आस्वाद घेतला. समारंभाच्या यशस्वी सांगतेनंतर, कार्यक्रमाला बहुसंख्येने उपस्थित राहून पाठबळ देणाऱ्या सर्व समाज बांधवांचे, भगिनींचे आणि देणगीदारांचे मनापासून आभार मंगेश होळकर यांनी मानले.