गेल्या महिन्यात जगदीप धनखड यांनी उपराष्ट्रपतीपदाचा राजीनामा दिल्यानंतर निवडणूक आयोगाने उपराष्ट्रपतीपदासाठी निवडणूक जाहीर केली आहे. सत्ताधारी राष्ट्रीय लोकशाही आघाडीने (एनडीए) महाराष्ट्राचे राज्यपाल सी. पी. राधाकृष्णन यांना उमेदवारी जाहीर केली आहे, तर इंडिया आघाडीने सर्वोच्च न्यायालयाचे माजी न्यायाधीश सुदर्शन रेड्डी यांना आपला उमेदवार म्हणून निवडले आहे.

या निवडणुकीच्या पार्श्वभूमीवर, राष्ट्रवादी काँग्रेसचे (शरदचंद्र पवार गट) अध्यक्ष शरद पवार यांनी महत्त्वपूर्ण भाष्य केले आहे. त्यांनी महाराष्ट्राचे मुख्यमंत्री देवेंद्र फडणवीस यांच्याशी झालेल्या चर्चेचा तपशीलही उघड केला. पवार म्हणाले, “मी, राहुल गांधी आणि इंडिया आघाडीतील अन्य प्रमुख नेत्यांनी एकत्र बसून दोन-तीन नावांवर विचारविनिमय केला. यानंतर सर्वोच्च न्यायालयाचे माजी न्यायाधीश सुदर्शन रेड्डी यांच्या नावावर सर्वांचे एकमत झाले. दरम्यान, मुख्यमंत्री फडणवीस यांनी माझ्याशी संपर्क साधला आणि एनडीएचे उमेदवार महाराष्ट्राचे राज्यपाल असल्याने त्यांना महाराष्ट्रातील मतदारांनी पाठिंबा द्यावा, अशी विनंती केली. मी त्यांना स्पष्टपणे सांगितले की हे शक्य नाही. कारण त्यांचे विचार आमच्या विचारांशी जुळत नाहीत.”

फडणवीस यांची प्रतिक्रिया
मुख्यमंत्री देवेंद्र फडणवीस यांनीही शरद पवार आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्याशी झालेल्या संभाषणाबाबत माध्यमांना माहिती दिली. ते म्हणाले, “उपराष्ट्रपतीपदाच्या निवडणुकीसंदर्भात मी शरद पवार आणि उद्धव ठाकरे यांच्याशी चर्चा केली. मी त्यांना विनंती केली की, महाराष्ट्राचे राज्यपाल आणि एनडीएचे उमेदवार सी. पी. राधाकृष्णन यांना, जे स्वतः महाराष्ट्राचे मतदार आहेत, पाठिंबा द्यावा. उद्धव ठाकरे यांनी सांगितले की, ते याबाबत त्यांच्या पक्षाच्या नेत्यांशी चर्चा करून निर्णय घेतील. तर शरद पवार यांनी स्पष्ट केले की, इंडिया आघाडीचा स्वतःचा उमेदवार असल्याने ते त्यांच्याच उमेदवाराला पाठिंबा देतील.” या निवडणुकीमुळे राजकीय वातावरण तापले असून, दोन्ही आघाड्यांमधील स्पर्धा तीव्र झाली आहे.