IPL 2024 (RCB vs DC Match 62) : सुपर संडेमध्ये आरसीबी-दिल्ली आज आमने-सामने, पराभूत होणाऱ्या संघाचं पॅकअप निश्चित, कोण जिंकणार?
Royal Challengers Bengaluru vs Delhi Capitals : रॉयल चॅलेंजर्स बंगलोर आणि दिल्ली कॅपिटल्स यांच्यातील सुपर संडेचा दुसरा सामना एम. चिन्नास्वामी स्टेडियमवर संध्याकाळी 7.30 वाजता खेळवला जाईल. प्लेऑफच्या दृष्टिकोनातून प्रत्येक सामना एलिमिनेटरसारखा वाटतो. आरसीबीने आयपीएल 2024 मध्ये आतापर्यंत 12 सामने खेळले आहेत आणि संघ 10 गुणांसह गुणतालिकेत 7 व्या क्रमांकावर आहे. दुसरीकडे दिल्ली सध्या 12 गुणांसह पाचव्या स्थानावर आहे. यापैकी कोणताही संघ जिंकला तरी त्याची प्लेऑफमध्ये जाण्याची शक्यता कायम राहणार आहे, त्यामुळे आरसीबी विरुद्ध डीसी सामन्याला एलिमिनेटर सामना म्हणणे चुकीचे ठरणार नाही.
दोन्ही संघाना प्लेऑफमधील आव्हान कायम राखण्यासाठी विजय आवश्यक आहे. त्यामुळे दोन्ही संघांसाठी हा सामना करो या मरो असा आहे. जिंकणारी टीम स्पर्धेत कायम राहील. तर पराभूत होणाऱ्या संघाचं आव्हान संपुष्टात येईल. त्यामुळे दोन्ही संघात जोरदार चुरस पाहायला मिळणार आहे.
Roller-coaster season 🎢 ✅
Battle for Playoff spot 🔢 ✅All set for a crucial Matchday as we face RCB tonight 🤞🏼 pic.twitter.com/CzTk7uxy7L
— Delhi Capitals (@DelhiCapitals) May 12, 2024
जर रॉयल चॅलेंजर्स बंगळुरूला आयपीएल 2024 च्या प्लेऑफमध्ये पोहोचायचे असेल तर त्यांना उर्वरित दोन्ही सामने जिंकावे लागतील. लीग टप्प्यातील हा बेंगळुरूचा 13वा सामना असेल, जो जिंकल्यास संघाला 12 गुण मिळतील. RCB चा निव्वळ रन-रेट +0.217 असल्याने, त्याची प्लेऑफमध्ये जाण्याची शक्यता जास्त आहे. पण त्यांच्या आशा जिवंत ठेवण्यासाठी बेंगळुरूला कोणत्याही किंमतीत दिल्ली कॅपिटल्सवर विजय नोंदवावा लागेल. आजचा सामना DC ने जिंकला तर RCB बाहेर होईल.
रॉयल चॅलेंजर्स आणि दिल्ली कॅपिटल्स IPL 2023 च्या प्लेऑफमध्ये पोहोचू शकले नव्हते. गेल्या हंगामात बेंगळुरू आणि दिल्ली अनुक्रमे सहाव्या आणि नवव्या क्रमांकावर होते. दोन्ही संघ पुन्हा एकदा जर-तरच्या पेचप्रसंगात अडकले आहेत. आजपर्यंत आयपीएल चॅम्पियन बनू शकलेल्या संघांमध्ये आरसीबी आणि डीसी यांचाही समावेश आहे.
पंतशिवाय दिल्लीचा संघ उतरणार मैदानात
राजस्थान रॉयल्सविरुद्धच्या सामन्यात दिल्ली कॅपिटल्स स्लो ओव्हर रेटसाठी दोषी आढळली होती. त्यामुळे दिल्लीचा कर्णधार ऋषभ पंतवर 30 लाखांचा दंड आणि एका सामन्याची बंदी घालण्यात आली आहे. आयपीएल 2024 मध्ये ही तिसरी वेळ आहे, जेव्हा डीसी निर्धारित वेळेच्या मर्यादेत 20 षटके टाकू शकला नाही. नियमांनुसार कर्णधार दोनदा स्लो ओव्हर रेटसाठी दोषी आढळल्यास त्याला फक्त दंडाला सामोरे जावे लागते, तिसऱ्यांदा कर्णधारावर एका सामन्याची बंदी घालण्यात येते. त्यामुळे ऋषभ पंत रॉयल चॅलेंजर्स बंगळुरूविरुद्धच्या सामन्यात खेळू शकणार नाही.
दोन्ही संघांसाठी हा सामना महत्त्वाचा आहे. सामन्यात दिल्ली कॅपिटल्सचा वरचष्मा आहे. दिल्ली 12 गुणांसह पाचव्या तर बेंगळुरू 10 गुणांसह सातव्या स्थानावर आहे. दिल्लीने हा सामना जिंकल्यास ते चेन्नईला मागे टाकू शकतात. त्याची प्लेऑफमध्ये जाण्याची शक्यता वाढेल. तसे झाले नाही तर पुढील वाटचाल दिल्लीसाठी कठीण होईल. सध्या बेंगळुरू प्लेऑफच्या शर्यतीतून बाहेर नाही. त्यांना सातत्यपूर्ण विजयांची गरज असून इतर संघांच्या कामगिरीवर अवलंबून राहावे लागेल.
IRE vs PAK 1st T20 : बाबरच्या नेतृत्वाखाली पाकिस्तानची अवस्था बिकट; आयर्लंडकडून प्रथमच पाकचा पराभव…
दरम्यान, बेंगळुरू आणि दिल्ली आतापर्यंत 30 वेळा आमनेसामने आले आहेत. यामध्ये बेंगळुरूने 18 सामने जिंकले तर दिल्लीने 11 वेळा विजय मिळवला. बेंगळुरूचा वरचष्मा आहे. त्याच वेळी, जर आपण सध्याच्या फॉर्मबद्दल बोललो तर दोन्ही संघ समान पातळीवर स्पर्धा करू शकतात.
