Satyacha Morcha : मुंबईत महाविकास आघाडी आणि मनसेने विधानसभा निवडणुकीच्या पार्श्वभूमीवर ‘सत्याचा मोर्चा’ काढला. या मोर्चावर अजित पवार गटातील राष्ट्रवादी काँग्रेसचे आमदार अमोल मिटकरी यांनी तीव्र टीका केली. मिटकरींनी हा मोर्चा ‘हौशा-गौश्या-नवशांची यात्रा’ आणि ‘महाराष्ट्राची हास्यजत्रा’ असल्याचा चिमटा काढला. महायुती भक्कमपणे काम करत असल्यामुळे मविआ आणि मनसे असे ‘रिकामटेकड्या’ मोर्चे काढत असल्याचेही त्यांनी म्हटले. मिटकरींनी अजित पवारांच्या कर्जमाफीच्या वक्तव्यावरून होणाऱ्या टीकेचाही समाचार घेतला. “अजितदादा बारामतीत असताना आपल्या परिवाराशी बोलतात तसे ते सभेत बोलले. यावरून काही ‘अक्कल नसलेले’ लोक ट्वीट करून बुद्धीचं प्रदर्शन करतात. विजय वडेट्टीवार आणि रोहित पवार यांनी एकदा मेंदूची तपासणी करावी,” असा टोला त्यांनी लगावला. अजित पवारांची प्रतिमा मलीन करण्याचा प्रयत्न करणारे ‘महामूर्ख’ असल्याचे सांगून, मुंबईतील रुग्णालयात जाऊन मेंदू तपासावा, असा सल्लाही मिटकरींनी दिला. मिटकरी म्हणाले, “बारामती हे दादांचं होमग्राउंड आहे, तिथे शेतकऱ्यांसोबत घरोबा नातं आहे. त्यामुळे आत्मविश्वासाने ते बोलले. पण त्यांचं वक्तव्य चुकीचं दाखवण्यासाठी काहींचा प्रयत्न आहे. ते ट्वीटच्या माध्यमातून चमकोगिरी करतात.” दुसरीकडे, भाजप नेते चंद्रकांत पाटील यांच्या ‘राष्ट्रवादी ही शरद पवारांची आहे’ या वक्तव्यावरही मिटकरींनी हल्लाबोल केला. “चंद्रकांत दादांची ‘स्लीप ऑफ टंग’ झाली असावी. ते मविआचे आहेत की महायुतीचे? हे समजत नाही. वाढत्या वयामुळे विसरभोळेपणा जडला असावा. भावनेतून ते भलतं बोलतात, नंतर चूक कळते. पण विधानसभा निकालात जनतेने खरी शिवसेना आणि राष्ट्रवादी कोण याचा कौल दिला आहे. हे दादांनी लक्षात ठेवावं,” असे त्यांनी म्हटले. मतचोरीविरोधात मनसे आणि मविआचा एल्गार असला तरी, मिटकरींनी या मोर्चावरही टीका केली. “हा मोर्चा महाराष्ट्राला मनोरंजन देणारा आहे. भविष्यातील पराभव पाहता हा हास्य मोर्चा काढला. महायुतीवर काही परिणाम होणार नाही,” असा विश्वास त्यांनी व्यक्त केला. निवडणुकीच्या रिंगणात वाढणाऱ्या राजकीय उत्तेजनेमुळे अशा टीका-प्रतिक्रियांना उधाण आले आहे.
