Post Office Scam- खातेदारांच्या मुदतठेवींची 15 लाख 44 हजार रुपयांची रक्कम शासकीय खात्यात जमा न करता बनावट पासबुक, खोट्या नोंदी आणि अधिकृत शिक्क्यांचा वापर करून अपहार केल्याचा प्रकार गोलेगाव (ता. शिरूर) येथील शाखा टपाल कार्यालयात उघडकीस आला आहे. या प्रकरणी शाखा टपाल कर्मचारी राजेश जबा खुडे (वय 56, रा. रांजणगाव गणपती, ता. शिरूर) याच्याविरुद्ध शिरूर पोलीस ठाण्यात गुन्हा दाखल झाल्याने परिसरात खळबळ उडाली आहे.

केडगाव (ता. दौंड) येथील बारामती टपाल विभागाच्या पूर्व उपविभागाचे सहायक अधीक्षक शशिकांत सिंग (वय 45) यांनी याबाबत फिर्याद दिली. गोलेगाव शाखा टपाल कार्यालयातील काही खातेदारांनी मुदतठेवींच्या रकमेबाबत तोंडी व लेखी तक्रारी केल्यानंतर टपाल विभागाने कार्यालयाच्या कामकाजाची तपासणी सुरू केली. त्यातून आर्थिक अनियमितता समोर आल्याचे फिर्यादीत नमूद आहे.

आरोपी खुडे याने रवींद्र कोंडीबा थेरुकर, योगिता रवींद्र थेरुकर, मोहन शंकर रसाळ, पांडुरंग भगवान वाखारे यांच्यासह अन्य खातेदारांकडून मुदतठेवींसाठी रोख रक्कम स्वीकारल्याचा आरोप आहे. मात्र, ही रक्कम शासकीय खात्यात जमा न करता स्वतःच्या फायद्यासाठी वापरल्याचा संशय आहे. खातेदारांना स्वतःच्या हस्ताक्षरातील बनावट खाते क्रमांक व व्यवहारांच्या नोंदी असलेली पासबुके देण्यात आली.

त्यावर टपाल कार्यालयाचे अधिकृत शिक्केही मारण्यात आल्याचे तपासात समोर आल्याचे सांगण्यात आले. या प्रकरणी बनावट दस्तऐवज, खोट्या नोंदी आणि आर्थिक फसवणुकीच्या आरोपांवरून राजेश खुडे याच्याविरुद्ध गुन्हा दाखल करण्यात आला आहे. पोलीस निरीक्षक विनोद पाटील यांच्या मार्गदर्शनाखाली पोलीस उपनिरीक्षक सागर शेळके पुढील तपास करीत आहेत.

आणखी खातेदारांची फसवणूक झाली का?
या प्रकरणात 15 लाख 44 हजार रुपयांचा अपहार झाल्याचा आरोप असून, प्रत्यक्षात किती खातेदार प्रभावित झाले आणि गैरव्यवहाराचा कालावधी किती आहे, याची चौकशी महत्त्वाची ठरणार आहे. संबंधित पासबुकांची पडताळणी, ठेवींच्या नोंदींचे लेखापरीक्षण आणि शासकीय खात्यात जमा झालेल्या रकमेची तपासणी केल्यानंतरच गैरव्यवहाराची संपूर्ण व्याप्ती स्पष्ट होईल.