Arunachal Ranji Trophy : प्रशासकीय गोंधळामुळे अरुणाचलने मैदानात उतरण्याआधीच गमावला रणजी सामना! नेमकं कारण काय? जाणून घ्या
Arunachal Ranji Trophy : रणजी करंडक हंगाम सुरू होण्यापूर्वी अरुणाचल प्रदेश क्रिकेटला मोठा धक्का बसला आहे. राज्य क्रिकेट संघटनेतील अंतर्गत संकटामुळे संघ आपल्या पहिल्या सामन्यासाठी मैदानात उतरला नाही.
Arunachal Pradesh Cricket Association Dispute Forfeits Ranji Trophy Match Nagaland : देशांतर्गत क्रिकेट मोसमाच्या सुरुवातीलाच अरुणाचल प्रदेश क्रिकेट असोसिएशनला (ACA) मोठा झटका बसला आहे. प्रशासकीय वाद आणि कायदेशीर लढाईमुळे अरुणाचल प्रदेशच्या संघाने नागालँडविरुद्धचा आपला रणजी करंडक प्लेट ग्रुपचा सलामीचा सामना गमावला आहे. अहमदाबादच्या नरेंद्र मोदी स्टेडियमवर २०२६-२७ च्या रणजी मोसमाचा हा सामना खेळवला जाणार होता. मात्र, असोसिएशनमध्ये कोणतीही कार्यरत प्रशासकीय समिती अस्तित्वात नसल्याने संघ निवडच होऊ शकली नाही. यापूर्वी विनू मंकड ट्रॉफीतही सिक्कीमविरुद्ध अरुणाचलचा संघ मैदानात उतरू शकला नव्हता.
गुवाहाटी उच्च न्यायालयात वाद; निकाल राखून ठेवल्याने कोंडी!
हा संपूर्ण वाद सप्टेंबरमध्ये झालेल्या असोसिएशनच्या वादग्रस्त निवडणुकीतून उद्भवला आहे. यात नबाम विवेक यांची अध्यक्षपदी निवड झाली होती. मात्र, लोअर सियांग, अपर सुबनसिरी, कामले, तवांग, वेस्ट सियांग आणि पापुम पारे या सहा जिल्हा संघटनांनी निवडणूक नियमांचे उल्लंघन झाल्याचा आरोप करत या निवडीला न्यायालयात आव्हान दिले. गुवाहाटी उच्च न्यायालयाच्या ईटानगर खंडपीठाने यावर सुनावणी पूर्ण करून निकाल राखून ठेवला असून असोसिएशनच्या कामकाजावर अंतरिम स्थगिती दिली आहे. यामुळे असोसिएशनचे कामकाज पूर्णपणे ठप्प झाले आहे.
संघटना दोन गटांत विभागली; बीसीसीआयचेही हात बांधलेले!
Ranji Trophy 2026-27: Arunachal Pradesh forfeit Nagaland opener in ACA crisis
Arunachal Pradesh forfeit their 2026-27 Ranji Trophy Plate Group opener against Nagaland as an ACA election dispute and court stay leave the state without a functioning cricke…
https://t.co/lFOVRQ1O8l
— NationPress (@np_nationpress) October 11, 2026
बीसीसीआयचे संयुक्त सचिव देवजित सैकिया यांनी परिस्थिती स्पष्ट करताना सांगितले की, अरुणाचल क्रिकेट असोसिएशनमध्ये दोन गट पडले असून त्यांच्यातील वाद कोर्टात प्रलंबित आहे. उच्च न्यायालयाच्या स्थगिती आदेशामुळे सध्या असोसिएशनमध्ये अधिकृत पदाधिकारी अस्तित्वात नाहीत. निर्णय प्रलंबित असल्याने बीसीसीआयलाही पर्यायी प्रशासकीय व्यवस्था करणे शक्य झालेले नाही, ज्यामुळे कनिष्ठ आणि वरिष्ठ संघांची निवड रखडली आहे.
देशांतर्गत हंगामातील सहभागावर प्रश्नचिन्ह; खेळाडूंचे मोठे नुकसान!
रणजी सामना न खेळता थेट गमावल्यामुळे अरुणाचल प्रदेशच्या खेळाडूंचे मोठे नुकसान झाले आहे. जर हा प्रशासकीय गतिरोध असाच कायम राहिला, तर २०२६-२७ च्या संपूर्ण देशांतर्गत मोसमातील इतर स्पर्धांमध्येही अरुणाचलच्या सहभागावर प्रश्नचिन्ह निर्माण होईल.
