Pimpri Chinchwad News – दहीहंडीच्या उत्साहात ध्वनिमर्यादेचा विसर पडून कानठळ्या बसविणारा डॉल्बीचा दणदणाट करणाऱ्या मंडळांना आणि डीजे मालकांना पोलिसांनी चांगलाच दणका दिला. विहित डेसिबल मर्यादेपेक्षा अधिक आवाजात ध्वनिक्षेपक वाजविणाऱ्या आयोजकांवर पोलिसांनी थेट कारवाई करत १६ डॉल्बी सिस्टीम जप्त केल्या. संबंधितांविरोधात गुन्हेही दाखल करण्यात आले आहेत.

५ सप्टेंबर २०२६ रोजी विविध ठिकाणी सुरू असलेल्या दहीहंडी कार्यक्रमांची पोलिसांनी प्रत्यक्ष पाहणी केली. यावेळी निर्धारित मर्यादेपेक्षा अधिक आवाजात डॉल्बी सिस्टीम सुरू असल्याचे निदर्शनास आले. या कारवाईमध्ये डॉल्बी स्पीकरसह ॲम्प्लिफायर, मिक्सर आणि अन्य ध्वनिक्षेपक साहित्य ताब्यात घेण्यात आले.

ध्वनी प्रदूषणाच्या नियमांचे उल्लंघन करणाऱ्या आयोजक आणि डीजे मालकांविरोधात संबंधित पोलीस ठाण्यांमध्ये गुन्हे दाखल करण्यात आले आहेत. पोलीस आयुक्त विनय कुमार चौबे, सह आयुक्त डॉ. शशिकांत महावरकर, अपर आयुक्त सारंग आवाड, बसवराज तेली यांनी ध्वनी प्रदूषणाचे नियम मोडणाऱ्यांविरोधात कठोर कारवाई करण्याचे निर्देश दिले होते.

आगामी उत्सवांमध्येही ‘डॉल्बी’वर नजर
ध्वनिवर्धक यंत्रणेचा वापर निर्धारित मर्यादेत आणि नियमांचे पालन करूनच करावा. मोठ्या आवाजामुळे ज्येष्ठ नागरिक, रुग्ण, लहान मुले तसेच सर्वसामान्य नागरिकांना त्रास होऊ शकतो. त्यामुळे सार्वजनिक शांतता आणि पर्यावरणाचा विचार करून उत्सव साजरे करण्याचे आवाहन पोलिसांनी केले आहे. आगामी सण-उत्सवांमध्येही ध्वनी प्रदूषणाचे नियम मोडणाऱ्यांवर कठोर कायदेशीर कारवाई केली जाईल, असा इशारा पोलिसांनी दिला आहे.