Swine Flu Cases – पावसाळा आणि बदलत्या हवामानाच्या पार्श्वभूमीवर पिंपरी-चिंचवड शहरात स्वाइन फ्ल्यूचा संसर्ग वाढताना दिसत आहे. सप्टेंबरच्या अवघ्या सहा दिवसांत शहरात १७ स्वाइन फ्ल्यूचे रुग्ण आढळल्याने आरोग्य विभागाची चिंता वाढली आहे. विशेष म्हणजे ऑगस्ट महिन्यात तब्बल ३१ रुग्णांची नोंद झाली होती. त्यामुळे गेल्या दोन महिन्यांत रुग्णसंख्येत झालेली वाढ नागरिकांसाठी चिंतेचा विषय ठरत आहे.

पिंपरी-चिंचवड महापालिकेच्या वैद्यकीय विभागाच्या आकडेवारीनुसार, जानेवारीमध्ये स्वाइन फ्ल्यूचा एक रुग्ण आढळला होता. त्यानंतर फेब्रुवारी ते जून या पाच महिन्यांत एकही रुग्णाची नोंद झाली नाही. मात्र, जुलैपासून आजाराचा प्रादुर्भाव पुन्हा वाढू लागला. जुलैमध्ये पाच रुग्ण आढळल्यानंतर ऑगस्टमध्ये रुग्णसंख्या थेट ३१ वर पोहोचली. सप्टेंबरच्या सुरुवातीच्या सहा दिवसांत आणखी १७ रुग्णांची भर पडली आहे.

महापालिकेच्या नोंदीनुसार, २०२६ मध्ये आतापर्यंत स्वाइन फ्ल्यूचे एकूण ५४ रुग्ण आढळले आहेत. दिलासादायक बाब म्हणजे या कालावधीत स्वाइन फ्ल्यूमुळे संशयित किंवा निश्चित मृत्यूची नोंद झालेली नाही. बदलते हवामान, पावसामुळे वाढलेली आर्द्रता आणि सर्दी-खोकल्याच्या तक्रारींमध्ये होणारी वाढ यामुळे संसर्गजन्य आजारांचा धोका वाढतो. त्यामुळे नागरिकांनी ताप, घसा खवखवणे, खोकला, अंगदुखी किंवा श्वसनास त्रास अशी लक्षणे जाणवल्यास दुर्लक्ष न करता वैद्यकीय सल्ला घ्यावा, असे आवाहन आरोग्य विभागाकडून करण्यात येत आहे.