Sudhir Mungantiwar’s criticism of Uddhav Thackeray : नुकतीच दैनिक सामनासाठी संजय राऊत यांनी उद्धव ठाकरे यांची घेतलेली मुलाखत प्रसिद्ध झाली आहे. या मुलाखतीमधून उद्धव ठाकरे यांनी निवडणूक आयोगावर हल्लाबोल केला आहे. निवडणूक आयोग म्हणजे शेंदूर फासलेला धोंड्या आहे, अशा शब्दात त्यांनी आयोगावर टीका केली आहे. यानंतर आता भाजपचे नेते सुधीर मुनगंटीवार यांनी ठाकरेंवर टीकास्त्र डागले आहे.

जेव्हा पराभवावर पराभव होतात आणि पराभवाचे चटके बसतात तेव्हा आपल्याला सर्व ठिकाणी शेंदूर लावलेले दिसतात. आता ठाकरे ब्रँड बाजारात चालत नाही. बाजारात अनेक ब्रँड आहेत पण प्रत्येक ब्रँड चालतोच असं नाही, असं म्हणत उद्धव ठाकरे यांच्या विधानावर मुनगंटीवार यांनी थेट प्रहार केला आहे. त्याचप्रमाणे सध्या ठाकरे ब्रँड ग्राहकांना मतदारांना पसंत येत नाही, असा टोलाही त्यांनी लगावला.

मुनगंटीवार यांनी सर्वसामान्य जनता देखील आमच्यासोबतच आहे. ईव्हीएमची बटणं दाबून त्यांनी आम्हाला सांगितलं आहे की आम्ही तुमच्यासोबत आहोत, असं म्हटलं आहे. सामनाच्या मुलाखतीत संजय राऊत यांनी अमित शाह आणि निवडणूक आयोगाने शिवसेना दुसऱ्यांच्या हातात दिली असून आता ती भाजपमध्ये विलीन करू शकतात का? शिवाय शिवसेनेचं अस्तित्व संपवण्याचा हा प्रयत्न आहे का? असा प्रश्न उद्धव ठाकरेंना विचारला. यावर उद्धव ठाकरे यांनी इतकी वर्षे होऊनही ते जनतेला माझ्यापासून तोडू शकत नाहीत, असं म्हणत निशाणा साधला आहे.

….तरी चोर तो चोरच असतो.

याशिवाय त्यांनी शिवसेना चिन्हाबाबत प्रश्नावर उत्तर देताना निवडणूक आयोगाने जे केलं ते बेकायदेशीर केल्याचा आरोप त्यांनी  केला. ‘शिवसेना’ हे नाव त्याला दुसऱ्याला देता येत नाही. ते त्यांच्या अधिकाराच्या बाहेरचं आहे, पण त्या धोंड्याला शेंदूर फासणारे दिल्लीत बसल्याने सध्या चालून जातंय, पण लोक कोणत्याही धोंड्याचं ऐकणार नाहीत. शेवटी चोरीचा माल आहे. चोरून मतं मिळवली असली तरी चोर तो चोरच असतो असं म्हणत त्यांनी टीका केली आहे.

हेही वाचा : संभाजीनगरमध्ये हृदयद्रावक अपघात..! भरधाव ट्रकने कुटुंबाला चिरडले, वडिलांसह दोन चिमुकल्यांचा मृत्यू