D. K. Shivakumar : कर्नाटक राज्याच्या मुख्यमंत्री पदी डी के शिवकुमार विराजमान होणार आहेत. उद्या ३ जून रोजी ते कर्नाटक राज्याच्या मुख्यमंत्री पदाची शपथ घेतील. शपथ घेण्यापूर्वी डी. के. शिवकुमार यांनी सोशल मीडियावर पोस्ट लिहिली आहे.

डी. के. शिवकुमार यांनी सोशल मीडियावर गांधी परिवाराबद्दल कृतज्ञता व्यक्त करत आपल्या राजकीय प्रवासातील त्यांच्या योगदानाचा उल्लेख केला आहे. त्यांच्या सार्वजनिक जीवनाला दिशा देण्यात गांधी कुटुंबाची भूमिका अत्यंत महत्त्वाची राहिली असल्याचे डी. के. शिवकुमार यांनी म्हटले आहे.

राजकीय कारकिर्दीच्या सुरुवातीच्या टप्प्यातच दिवंगत माजी पंतप्रधान राजीव गांधी यांनी त्यांच्यातील क्षमता ओळखली होती. त्यांच्या प्रोत्साहनामुळेच मोठी स्वप्ने पाहण्याचे आणि लोकसेवेसाठी स्वतःला समर्पित करण्याचे धैर्य मिळाले. खरे नेतृत्व म्हणजे इतरांमधील क्षमता ओळखून त्यांना पुढे जाण्यासाठी प्रेरित करणे, असे त्यांनी पोस्टमध्ये नमूद केले.

याशिवाय सोनिया गांधी यांनी कठीण काळातही आपल्या पाठीशी उभे राहून नेतृत्वाचा महत्त्वाचा धडा दिल्याचे शिवकुमार यांनी सांगितले. आव्हानात्मक परिस्थितीत त्यांनी दाखवलेला विश्वास आणि पाठिंबा आपल्यासाठी कायम प्रेरणादायी राहिला असल्याचे त्यांनी म्हटले.  (D. K. Shivakumar)

राहुल गांधी यांच्याबाबत बोलताना शिवकुमार म्हणाले की, लोकशाही मूल्यांप्रती असलेली त्यांची बांधिलकी, सर्वसमावेशक भारताची दूरदृष्टी आणि लोकांचे म्हणणे ऐकून घेण्याची वृत्ती अनेक नेत्यांसाठी प्रेरणादायी आहे. त्यांच्या पाठिंब्यामुळे सार्वजनिक जीवनात काम करण्याची ऊर्जा मिळाली.

हेही वाचा : Helicopter Crash: लग्नाच्या काही तासांतच दुर्दैवी घटना; हेलिकॉप्टर अपघातात भारतीय वंशाच्या वराचा मृत्यू, नववधू बचावली

तसेच प्रियंका गांधी वड्रा यांचेही त्यांनी कौतुक केले. प्रत्येक कार्यकर्त्याला आदराने वागवण्याची त्यांची शैली आणि लोकांशी थेट संवाद साधण्याची वृत्ती राजकारणाचे खरे तत्त्व शिकवते, असे ते म्हणाले.  (D. K. Shivakumar )

शिवकुमार यांनी आपल्या पोस्टमध्ये गांधी परिवार नेतृत्वाचे विविध पैलू दर्शवतो, असे नमूद करत त्यांच्या विश्वास आणि प्रोत्साहनाबद्दल मनःपूर्वक आभार व्यक्त केले. तळागाळातील कार्यकर्ता ते कर्नाटकच्या नेतृत्वातील महत्त्वाचा चेहरा असा प्रवास करताना गांधी परिवाराचा पाठिंबा मोलाचा ठरल्याचे त्यांनी सांगितले.

कर्नाटकच्या जनतेच्या आशीर्वादाने आणि पक्ष नेतृत्वाच्या मार्गदर्शनाखाली राज्याच्या विकासासाठी, सर्वसमावेशक आणि प्रगतिशील कर्नाटक घडवण्यासाठी आपण पूर्ण प्रामाणिकपणे काम करत राहू, अशी ग्वाहीही त्यांनी दिली.  (D. K. Shivakumar)

मंत्रिमंडळात कोणाचा समावेश होणार?  (D. K. Shivakumar)

दरम्यान, आता डी. के. शिवकुमार हे कर्नाटकचे नवे मुख्यमंत्री म्हणून येत्या ३ जून रोजी मुख्यमंत्री पदाची शपथ घेणार आहेत. हा  शपथविधी सोहळा ३ जून रोजी बंगळुरू येथील लोकभवनात पार पडणार असल्याची माहिती काँग्रेस पक्षाच्यावतीने सांगण्यात येत आहे. आता नव्या मंत्रिमंडळात नेमकं कोणाचा समावेश होतो? याकडे कर्नाटकच्या जनतेचं लक्ष लागलं आहेत.

हेही वाचा : Maval News : टाकवे बुद्रुकमध्ये स्टोन क्रशरविरोधात ग्रामस्थांचा एल्गार; शेकडो नागरिक रस्त्यावर