IPL 2024 (KKR vs DC Match 47) : सॉल्टची स्फोटक खेळी, कोलकाताचा दिल्लीवर 7 गडी राखून विजय…
IPL 2024 ( Live Cricket Score, KKR vs DC) : आयपीएल 2024 चा 47 वा सामना सोमवारी (29 एप्रिल) कोलकाता येथील ईडन गार्डन्सवर कोलकाता नाईट रायडर्स आणि दिल्ली कॅपिटल्स यांच्यात खेळला गेला. या सामन्यात कोलकाता नाईट रायडर्सने दिल्ली कॅपिटल्सचा पराभव केला आहे. ऋषभ पंतच्या नेतृत्वाखालील दिल्ली कॅपिटल्सला 7 गडी राखून पराभव स्वीकारावा लागला. कोलकाता नाईट रायडर्ससमोर 154 धावांचे लक्ष्य होते. श्रेयस अय्यरच्या नेतृत्वाखालील कोलकाता नाईट रायडर्सने 16.3 षटकांत अवघ्या 3 गडी गमावून लक्ष्य गाठले.
केकेआरचा कर्णधार श्रेयस अय्यर 23 चेंडूत 33 धावा करून नाबाद परतला. व्यंकटेश अय्यर 23 चेंडूत 26 धावा करून नाबाद राहिला. चौथ्या विकेटसाठी दोघांमध्ये 57 धावांची भागीदारी झाली.
फिल सॉल्टने 33 चेंडूत 68 धावा केल्या. त्याने आपल्या खेळीत 7 चौकार आणि 5 षटकार मारले. सुनील नरेन 10 चेंडूत 15 धावा करून बाद झाला, पण तोपर्यंत दोन्ही सलामीवीरांनी आपले काम चोख बजावले होते. फिल सॉल्ट आणि सुनील यांनी पहिल्या 6 षटकात 79 धावा जोडल्या होत्या.रिंकू सिंगचा खराब फॉर्म अजूनही कायम आहे. रिंकू सिंग 11 चेंडूत 11 धावा करून माघारी परतला.
दिल्ली कॅपिटल्ससाठी अक्षर पटेल हा सर्वात यशस्वी गोलंदाज ठरला. अक्षर पटेलने कोलकाता नाईट रायडर्सच्या 2 फलंदाजांना बाद केले. याशिवाय लिझार्ड विल्यम्सने 1 विकेट आपल्या नावावर केली.
तत्पूर्वी, दिल्ली कॅपिटल्सचा कर्णधार ऋषभ पंतने नाणेफेक जिंकून प्रथम फलंदाजी करण्याचा निर्णय घेतला आणि दिल्लीने 20 षटकात 9 गडी गमावून 153 धावसंख्येपर्यंत मजल मारली होती.
The one where our bowlers stole the show! 📷
Onto our batters now! 👊 pic.twitter.com/ThuMPx7byb
— KolkataKnightRiders (@KKRiders) April 29, 2024
दिल्ली कॅपिटल्सच्या फलंदाजांचा फ्लॉप शो….
प्रथम फलंदाजीला आलेल्या दिल्ली कॅपिटल्सची सुरुवात चांगली झाली नाही. पृथ्वी शॉ 7 चेंडूत 13 धावा करून माघारी परतला. 7 चेंडूत 12 धावा करून जॅक फ्रेजर मिचेल स्टार्कचा बळी ठरला. त्याचवेळी अभिषेक पोरेल 15 चेंडूत 18 धावा करून पॅव्हेलियनमध्ये परतला. याशिवाय शाई होप (06), अक्षर पटेल(15), ट्रिस्टन स्टब्स (04) आणि कुमार कुशाग्र (01) हे फलंदाज स्वस्तात पॅव्हेलियनमध्ये परतले. मात्र, दिल्ली कॅपिटल्सचा कर्णधार ऋषभ पंतने 27 धावा केल्या, पण त्याला चांगल्या सुरुवातीचे मोठ्या डावात रूपांतर करता आले नाही.
परिस्थिती अशी होती की 99 धावांपर्यंत दिल्ली कॅपिटल्सचे 6 फलंदाज पॅव्हेलियनमध्ये परतले होते. मात्र, फलंदाजांच्या फ्लॉप शोनंतर कुलदीप यादवने जबाबदारी स्वीकारली. कुलदीप यादवने 26 चेंडूत 35 धावांचे महत्त्वपूर्ण योगदान दिले. त्यामुळे दिल्ली कॅपिटल्सने 150 धावांचा टप्पा पार केला. एकेकाळी ऋषभ पंतचा संघ दीडशे धावांचा आकडा गाठू शकणार नाही असे वाटत होते.
केकेआरच्या गोलंदाजांची दमदार कामगिरी…
कोलकाता नाईट रायडर्सच्या गोलंदाजांबद्दल बोलायचे तर वरुण चक्रवर्तीने 4 षटकात 16 धावा देत सर्वाधिक 3 फलंदाजांना आपले बळी बनवले. तर वैभव अरोरा (4 षटकात 29 धावा) आणि हर्षित राणा (4 षटकात 28 धावा) यांनी प्रत्येकी 2-2 बळी घेतले. याशिवाय मिचेल स्टार्क (3 षटकात 43 धावा) आणि सुनील नरेन (4 षटकात 24 धावा) यांना प्रत्येकी 1 यश मिळाले.
