प्रभात वृत्तसेवा
पुणे – महापालिका आयुक्त नवल किशोर राम यांनी पथ विभागातील अधिकाऱ्यांबरोबर बालभारती पौड रोडची रविवारी पाहणी केली. त्यांच्याबरोबर पथ विभागाचे मुख्य अभियंता अनिरुद्ध पावसकर, अधीक्षक अभियंता अभिजीत आंबेकर, कार्यकारी अभियंता पुरुषोत्तम भुतडा, उपअभियंता शैलेश वाघोलीकर, तसेच मुख्य उद्यान अधीक्षक अशोक घोरपडे, प्रभाग अधिकारी विजय नायकल उपस्थित होते.जागा पाहणीदरम्यान या रस्त्याची आखणी, जागेवरील एकूण परिस्थितीची पाहणी केली. रस्त्याच्या कोणत्या भागामध्ये रस्ता एलिवेटेड करण्यात येणार आहे, याची देखील माहिती घेतली.

एन्व्हायरमेंटल क्लिअरन्स (ईसी) साठी लवकरात लवकर अर्ज करून ईसी प्राप्त करण्याबाबत तातडीने कार्यवाही करण्याचे त्यांनी आदेश या भेटीदरम्यान दिले. जी झाडे लावणे गरजेचे आहे, ती झाडे मोठ्या प्रमाणात लावण्यात यावीत, असे आदेश आयुक्तांनी दिले, तसेच महापालिकेच्या ताब्यात असलेल्या जागेवर स्वतः वृक्षारोपण करून या वृक्षारोपण मोहिमेचा शुभारंभ त्यांनी केला.

त्यानंतर खात्यातील इतर अधिकाऱ्यांनी देखील वृक्षारोपण केले आणि मोठ्या प्रमाणात वृक्ष लावण्याबाबत आयुक्तांना ग्वाही दिली.स्थानिक आणि दुर्मिळ वृक्ष लावण्याबाबत आवश्यकतेवर आयुक्तांनी भर दिला. सध्याच्या अस्तित्वातील रस्त्यांवरील कोंडी दूर करण्याच्या अनुषंगाने सदर रस्त्याचे काम त्वरित हाती घेणे गरजेचे आहे, असे आयुक्त नवल किशोर राम या वेळी म्हणाले.