Alandi News – आळंदी नगरपरिषदेसमोरील दोन पुलांपैकी माऊलींच्या पालखी प्रस्थानापूर्वी नव्या पुलाची तातडीने दुरुस्ती करण्यात आली. या पुलावरून संत ज्ञानेश्वर महाराजांची पालखी पुण्याकडे मार्गस्थ झाली. मात्र, त्याचवेळी बंद करण्यात आलेल्या जुन्या पुलाच्या दुरुस्तीचे काम अद्यापही सुरू झाले नसल्याने आळंदीकरांसह भाविकांना मोठ्या गैरसोयीचा सामना करावा लागत आहे.

जुलैच्या सुरुवातीला झालेल्या मुसळधार पावसामुळे इंद्रायणी नदीला मोठा पूर आला होता. पाण्याच्या तीव्र प्रवाहामुळे आळंदीतील पुलांच्या कठड्यांचे नुकसान झाले. पालखी सोहळा लक्षात घेऊन प्रशासनाने नगरपरिषदेसमोरील नव्या पुलाची तातडीने दुरुस्ती केली आणि पालखी सोहळा सुरळीत पार पडला. मात्र, त्यानंतरही जुन्या पुलाच्या दुरुस्तीला सुरुवात झालेली नाही.

स्थानिक लोकप्रतिनिधी आणि सर्वपक्षीय पदाधिकार्‍यांनी मुख्याधिकारी माधवराव खांडेकर यांची भेट घेऊन जुन्या पुलासह पीएमपीएमएल बसथांब्याची दुरुस्ती तातडीने करण्याची मागणी केली होती. त्यावेळी काही दिवसांत काम सुरू करण्याचे आश्वासन देण्यात आले होते. मात्र, आठवडाभर उलटूनही प्रत्यक्ष काम सुरू झालेले नसल्याने नागरिकांमध्ये नाराजी व्यक्त होत आहे.

जुन्या पुलाची दुरुस्ती आणि पीएमपीएमएल बसथांबा पूर्ववत सुरू करण्यासाठी प्रशासनाने तातडीने कार्यवाही करावी, अशी मागणी नागरिकांकडून होत आहे. पावसाळ्यातील वाढती वाहतूक आणि भाविकांची सततची वर्दळ लक्षात घेता सुरक्षिततेच्या दृष्टीने जुन्या पुलाचे काम युद्धपातळीवर पूर्ण करण्याची अपेक्षा आळंदीकर व्यक्त करत आहेत.

एकाच पुलावर वाहतुकीचा ताण
दोन पुलांपैकी एक पूल बंद असल्यामुळे सध्या सर्व वाहतूक एकाच पुलावरून सुरू आहे. या पुलावरून दुहेरी वाहतूक सुरू असल्याने दिवसातील बहुतांश वेळ वाहतूक कोंडी होत आहे. पूर्वी जुना पूल सुरू असताना नव्या पुलावरून एकेरी वाहतूक होत असल्याने अशी समस्या निर्माण होत नव्हती. याशिवाय पुलावरील पदपथावर पिण्याच्या पाण्याची पाइपलाइन टाकण्यात आल्यामुळे पादचार्‍यांना पदपथाचा वापर करता येत नाही.