वाल्हे : संत ज्ञानेश्वर माऊलींचा पालखी सोहळा पुरंदर तालुक्यातील वाल्हे येथील पालखी तळावर विसावल्यानंतर, समाज आरतीपूर्वी वारकऱ्यांसाठी करण्यात आलेल्या पारंपरिक पुकारामध्ये एक महत्त्वाचा निर्णय जाहीर करण्यात आला. माऊलींच्या पालखी सोहळ्यापुढे चालणाऱ्या इतर स्वतंत्र पालख्या सोहळ्यातून बाहेर काढण्याची स्पष्ट सूचना पालखी सोहळा समितीच्या वतीने देण्यात आली आहे. या निर्णयामुळे माऊलींच्या सोहळ्यासोबत चालणाऱ्या इतर पालख्या आणि दिंड्यांचा प्रश्न पुन्हा एकदा ऐरणीवर आला आहे.

मंगळवारी (दि. १४) माऊलींचा पालखी सोहळा वाल्हे मुक्कामी विसावला. यावेळी परंपरेप्रमाणे रोजच्या सूचनांचा पुकारा करण्यात आला. यामध्ये हरवलेल्या-सापडलेल्या वस्तू, प्रस्थानाची वेळ आणि वारकऱ्यांनी रस्त्याच्या डाव्या बाजूने चालण्याच्या नेहमीच्या सूचनांसोबतच अनधिकृत पालख्यांना सोहळ्यातून बाहेर काढण्याची मोठी घोषणा करण्यात आली.

माऊलींच्या अधिकृत पालखी सोहळ्याचा भाग नसलेल्या इतर पालख्या व दिंड्यांना सोहळ्यासोबत चालू देऊ नये, अशा स्पष्ट सूचना पालखी सोहळा समितीकडून पोलीस, महसूल आणि पाटबंधारे प्रशासनाला देण्यात आल्या आहेत. याबाबत संबंधित विभागांची तातडीने संयुक्त बैठक घेऊन योग्य ती कारवाई करण्याचे निर्देशही देण्यात आले आहेत.
दरवर्षी मुख्य पालखीसोबत अनेक स्वतंत्र पालख्या व दिंड्या मार्गक्रमण करतात.

मात्र, त्यांच्याकडून अनेकदा शिस्त, वाहतूक नियम आणि सोहळ्याचे निर्धारित नियम पाळले जात नसल्याच्या तक्रारी येत आहेत. त्यातच नुकत्याच जेजुरी येथे घडलेल्या भीषण अपघाताच्या पार्श्वभूमीवर, वारकऱ्यांच्या सुरक्षिततेला सर्वोच्च प्राधान्य देत सोहळा प्रशासनाने ही भूमिका अधिक कठोर केली आहे. मुख्य पालखीच्या पुढे किंवा सोबत अनधिकृत पालख्या व दिंड्यांना चालण्यास पूर्णपणे प्रतिबंध केला जाणार आहे.

या संदर्भात पालखी सोहळ्याचे विश्वस्त भावार्थ देखणे आणि उमाप यांच्याशी चर्चा केली असता ते म्हणाले, मुख्य पालखीच्या पुढे सुमारे ३० ते ३५ स्वतंत्र पालख्या मार्गक्रमण करत आहेत. त्यांनी माऊलींच्या मुख्य सोहळ्यापासून स्वतंत्रपणे मार्गक्रमण करावे, अशा सूचना दिल्या आहेत. या संदर्भात पोलीस व महसूल प्रशासनासोबत तातडीने बैठक घेण्यात येणार आहे.