Pranit More : सोशल मीडियावर प्रसिद्धी मिळवण्याच्या स्पर्धेत अनेक तरुण-तरुणी काही वेळा असे वक्तव्य किंवा कृती करून बसतात, ज्याचे परिणाम त्यांच्या वैयक्तिक आणि व्यावसायिक आयुष्यावर थेट होतात. सध्या असाच एक प्रकार चर्चेत आला असून, एका स्टँड-अप कॉमेडी शोमधील कथित वादग्रस्त वक्तव्यामुळे एका तरुणाला नोकरी गमवावी लागल्याची माहिती समोर आली आहे.

ही घटना स्टँड-अप कॉमेडियन प्रणित मोरे यांच्या एका लाईव्ह शोदरम्यान घडल्याचे सांगितले जात आहे. शोमध्ये संवाद सुरू असताना गुरगावमधील एका तरुणाने आपल्या वैयक्तिक डेटचा एक अनुभव शेअर केला. या अनुभवात त्याने “३७० रुपयांची चिकन बिर्याणी” आणि त्यानंतर घडलेल्या घटनांचा उल्लेख केला.

या कथनादरम्यान त्याने केलेल्या काही टिप्पणींवरून सोशल मीडियावर मोठा वाद निर्माण झाला. विशेषतः महिलांविषयी आक्षेपार्ह किंवा अयोग्य अर्थ काढला जाऊ शकणाऱ्या विधानांमुळे नेटकऱ्यांनी तीव्र नाराजी व्यक्त केली. हा व्हिडिओ क्लिप व्हायरल झाल्यानंतर संबंधित तरुण ट्रोलिंगच्या केंद्रस्थानी आला.

कंपनीकडून तात्काळ कारवाईहा तरुण गुरगावमधील एका नामांकित डिझाईन कंपनीत कार्यरत असल्याचे समोर आले आहे. सोशल मीडियावर व्हायरल झालेला व्हिडिओ कंपनीच्या निदर्शनास आल्यानंतर व्यवस्थापनाने तातडीने अंतर्गत चौकशी केल्याचे सांगितले जाते.

कंपनीच्या व्यवस्थापनाने जारी केलेल्या निवेदनानुसार, संबंधित कर्मचाऱ्याविरोधात कार्यालयात कोणतीही तक्रार नव्हती आणि सहकाऱ्यांकडून तो कष्टाळू व सुस्वभावी म्हणून ओळखला जात होता.

मात्र, सार्वजनिक प्लॅटफॉर्मवरील त्याच्या वक्तव्यामुळे कंपनीच्या मूल्यांना विरोध होतो, असे मत व्यक्त करत त्याला नोकरीवरून दूर करण्याचा निर्णय घेण्यात आला. या निर्णयाचे सोशल मीडियावर काहींनी स्वागत केले असून, तर काहींनी ‘पब्लिक प्लॅटफॉर्मवरील जबाबदारी’ या मुद्द्यावर चर्चा सुरू केली आहे.

सोशल मीडियावर प्रतिक्रिया आणि ट्रोलिंग

व्हिडिओ व्हायरल झाल्यानंतर संबंधित तरुणावर जोरदार टीका झाली. अनेक युजर्सनी अशा प्रकारच्या वक्तव्यांना जबाबदार नसल्याचे म्हणत नाराजी व्यक्त केली. त्यानंतर या प्रकरणावरून मोठ्या प्रमाणावर ट्रोलिंग सुरू झाले.

दरम्यान, या प्रकरणावर कॉमेडियन प्रणित मोरे यांनीही प्रतिक्रिया देत माफी मागितल्याची माहिती आहे. तथापि, या वादानंतर त्यांनी आपले मुख्य इन्स्टाग्राम अकाऊंट @rjpranit डीअॅक्टिव्हेट केले आहे, असेही समोर आले आहे. त्यांचे दुसरे अकाऊंट @maharashtrianbhau मात्र अद्याप सक्रिय असल्याचे दिसते.

काय घडलेलं?

प्रणित मोरेच्या स्टँड-अप शोदरम्यान हिमांशू जांगडा त्याचा डेटिंगचा किस्सा सांगत होता. तो सांगत होता की, त्याने एका तरुणीला ३७० रुपयांची चिकन बिर्याणी खाऊ घातली.

जेव्हा तिने त्याला घरी सोडायला सांगितले तेव्हा तो द्विअर्थी म्हणाला की तिच्यावर खर्च केलेले ३७० रुपये मला वसूल करायचे होते. त्याला तिला हॉटेलमध्ये न्यायचं होतं. पण पहिल्यांदाच भेटल्यामुळे तो तिला हॉटेलात नेण्याऐवजी गार्डनमध्ये घेऊन गेला.

त्याला तिच्याशी ‘शारीरिक जवळीक’ साधत ते पैसे वसूल करायचे होते. महिलांचा जाहीर अपमान करणारी ही क्लिप सोशल मीडियावर व्हायरल होताच एकच भडका उडाला.