पणजी : क्रीडापटूंच्या यशात योग्य प्रशिक्षणाचे योगदान महत्त्वाचे असते. देशातील खेळाडूंना ते मिळावे, यासाठी आम्ही त्यांना देशात आणि परदेशात प्रशिक्षणाची व्यवस्था करतो. याचप्रमाणे टार्गेट ऑलिम्पिक पोडियम (टॉप) अशा योजनाही राबवल्या जात आहेत. गावागावांत क्रीडा संकुले बांधून क्रीडा संस्कृती निर्माण करणे, हाच आमचा उद्देश आहे, असे प्रतिपादन देशाचे उपराष्ट्रपती जगदीप धनखड यांनी गुरुवारी केले. श्यामप्रसाद मुखर्जी स्टेडियमच्या सभागृहात आयोजित करण्यात आलेल्या ३७व्या राष्ट्रीय क्रीडा स्पर्धेच्या समारोप कार्यक्रमात ते बोलत होते.

“राष्ट्रीय क्रीडा स्पर्धा म्हणजे देशातल्या ऑलिम्पिक क्रीडा स्पर्धाच आहेत. ‘जुडेंगे, जिएंगे, जितेसंगे’ असा नारा देत गोव्याने राष्ट्रीय क्रीडा स्पर्धेचे यशस्वी आयोजन करून दाखवले. २०३६च्या ऑलिम्पिक क्रीडा स्पर्धेचे यजमानपद सांभाळण्यासाठी भारत समर्थ असल्याचे पंतप्रधान नरेंद्र मोदी यांनी आधीच जाहीर केले आहे. गोव्यातील स्पर्धेतून आपण यजमानपद उत्तम भूषवू याची ग्वाहीच दिली आहे,” असे धनखड यांनी आपल्या भाषणात सांगितले.

National Games 2023 : महाराष्ट्राला सर्वसाधारण विजेतेपदाचा बहुमान…

“आम्ही एक तृतीयांश आरक्षण केले. पण आज पुरस्कार घेणाऱ्यांमध्ये हे प्रमाण दोन तृतीयांश होते. हे बदलणाऱ्या भारताचे चित्र गोव्यात पाहायला मिळाले. सांघिक विजेत्या महाराष्ट्राचा चषक स्वीकारण्यासाठी महाराष्ट्राच्या पथकप्रमुख स्मिता शिरोळे आल्या, सर्वोत्तम खेळाडूचा मॅन मिळवणाऱ्या संयुक्ता काळे आणि प्रणोती नायक, तसेच यजमानपदाचा मान स्वीकारण्यासाठी उत्तराखंडच्या क्रीडा मंत्री रेखा आर्या आल्या. या नारीशक्तीचे वर्चस्व या स्पर्धेच्या निमित्ताने दिसून आले,” असे धनखड म्हणाले.

“यंदाच्या राष्ट्रीय क्रीडा स्पर्धेत गटका, लगोरी, पिंच्याक सिल्याट, कलारीपयट्टू यांच्यासारख्या देशातील पारंपारिक क्रीडा प्रकारांचाही समावेश करण्यात आला. भविष्यात या क्रीडा प्रकारांना ऑलिम्पिकमध्ये स्थान मिळवण्याची संधी असेल,” असे धनखड यांनी सांगितले.