VBA protest Paud – दिल्लीतील जंतर-मंतर परिसरात विद्यार्थ्यांवर झालेल्या कथित लाठीहल्ल्याच्या निषेधार्थ वंचित बहुजन आघाडी, मुळशीच्या वतीने पौड एसटी स्थानक ते तहसील कार्यालयापर्यंत शांततापूर्ण धडक मोर्चा काढण्यात आला. मोर्चाच्या माध्यमातून विद्यार्थ्यांवरील कारवाईचा निषेध नोंदवित विविध मागण्यांचे निवेदन तहसील प्रशासनाला देण्यात आले. मोर्चाचे नेतृत्व वंचित बहुजन आघाडीचे मुळशी तालुकाध्यक्ष प्रशांत कांबळे यांनी केले.

यावेळी पुणे जिल्हा महासचिव अरुण कांबळे, जिल्हा उपाध्यक्ष नितीन ओव्हाळ, जिल्हा सचिव अनिल निकाळजे, ज्येष्ठ नेते गुलाब गजरमल, भारतीय बौद्ध महासभेचे मुळशी तालुकाध्यक्ष शशिकांत निकाळजे, रिपब्लिकन सेनेचे अध्यक्ष प्रवीण वाघमारे, रिपब्लिकन पार्टी ऑफ इंडियाचे युवकाध्यक्ष किरण कांबळे, मुठा खोरे अध्यक्ष किरण हि. कांबळे, आंबवणे गणाध्यक्ष साई निकाळजे, कासार आंबोलीचे सरपंच ड. स्वप्निल कांबळे,

महिला महासचिव रेखाताई चिचखेडे, नीता सुरवसे, मीनाताई गेदाम, सचिव अभिषेक केदारी, उपाध्यक्ष प्रमोद चिचखेडे, सोशल मीडिया उपाध्यक्ष गणेश निकाळजे, मोना जांभुरे, भोडे सिद्धेश्वर गावचे सरपंच दीपक कांबळे, नेते तुषार गायकवाड तसेच विविध संघटनांचे पदाधिकारी, कार्यकर्ते आणि नागरिक मोठ्या संख्येने सहभागी झाले. मोर्चादरम्यान विद्यार्थ्यांवरील कथित लाठीहल्ल्याचा तीव्र निषेध व्यक्त करण्यात आला.

आंदोलकांनी केंद्रीय शिक्षणमंत्री धर्मेंद्र प्रधान यांनी नैतिक जबाबदारी स्वीकारून तात्काळ राजीनामा द्यावा, अशी मागणी केली. तसेच देशभरात वारंवार घडणार्‍या पेपरफुटीच्या घटनांवर तातडीने नियंत्रण आणावे, विद्यार्थ्यांवरील मानसिक ताण कमी करण्यासाठी प्रभावी उपाययोजना कराव्यात, शिक्षण व्यवस्थेत सर्वंकष सुधारणा करून परीक्षा प्रक्रियेत पारदर्शकता आणावी आणि गैरप्रकारांमध्ये सहभागी असणार्‍यांवर कठोर कायदेशीर कारवाई करावी, अशा प्रमुख मागण्या निवेदनाद्वारे करण्यात आल्या. मोर्चा शांततेत पार पडला असून शेवटी तहसील कार्यालयात मागण्यांचे निवेदन सादर करण्यात आले.