Pune Rain – शहरासह उपनगरांमध्ये गुरुवारी (दि. २३) सायंकाळी जवळपास तासभर पडलेल्या जोरदार पावसामुळे शहरातील मुख्य रस्ते आणि चौकांमध्ये मोठ्या प्रमाणात पाणी साचले. रस्त्यांवरून पाण्याचे पाट वाहू लागल्याने सायंकाळी घरी जाणाऱ्या चाकरमान्यांची आणि शालेय विद्यार्थ्यांची तारांबळ उडाली. शहरात सलग चौथ्या दिवशी पावसाची उघडझाप सुरू आहे. गेल्या २४ तासांत पावसाचा जोर कमी-अधिक होत होता.

मात्र, बुधवारी (दि. २२) रात्री नऊनंतर शहरासह उपनगरांमध्ये वादळी वाऱ्यासह मुसळधार पाऊस झाला तर गुरुवारी (दि. २३) सकाळी वाऱ्याचा वेग मंदावला आणि पावसाने काहीशी विश्रांती घेतली. दुपारी ४:०० पर्यंत हलक्या सरी कोसळत होत्या. परंतु, सायंकाळी ५:०० च्या सुमारास आकाशात काळे ढग दाटून आले आणि मध्यवर्ती भागासह उपनगरांना मुसळधार पावसाने झोडपून काढले. रात्री उशीरापर्यंत पावसाचा जोर कायम होता.

मुसळधार रस्त्यांवर पाणी साचल्यामुळे शहरातील वाहतूक पूर्णपणे मंदावली. परिणामी कर्वे रस्ता, लॉ कॉलेज रोड, प्रभात रस्ता, जंगली महाराज रोड, गणेशखिंड रस्ता, शनिवारवाडा ते महापालिका रोड, शिवाजी रोड, टिळक रोड आणि पौड रस्ता या मध्यवर्ती भागांत वाहनांच्या रांगा लागल्या. याशिवाय वारजे, धायरी हाय-वे परिसर, सिंहगड रस्ता, सातारा रस्ता, हडपसर रोड आणि बाणेर या उपनगरांना जोडणाऱ्या प्रमुख मार्गांवरही ठिकठिकाणी वाहतूक कोंडी झाली. अंतर्गत मार्गांवरही वाहने संथगतीने पुढे सरकत होती.

दोन दिवस जोर कायम राहणार..
सलग चार दिवसांच्या संततधार पावसामुळे शहरात गारवा चांगलाच वाढला आहे. कमाल तापमानात लक्षणीय घट झाल्याने पारा २६ अंश सेल्सिअसपर्यंत खाली आला असून पुणेकरांना उकाड्यापासून मोठा दिलासा मिळाला आहे. दरम्यान, मॉन्सून सक्रिय असल्याने पुढील दोन दिवस पुणे शहर आणि जिल्ह्यात पावसाचा जोर कायम राहील, असा अंदाज पुणे वेधशाळेने वर्तविला असून पुणे शहराला पावसाचा आॅरेंज अलर्ट दिला आहे.