Dattatray Bharne – इंदापूर तालुक्याच्या सर्वांगीण विकासाला दिशा देणाऱ्या अनेक महत्त्वपूर्ण निर्णयांमागे दिवंगत उपमुख्यमंत्री अजित पवार यांचे दूरदृष्टीपूर्ण नेतृत्व होते. सहकार, सिंचन, कृषी, शिक्षण, पायाभूत सुविधा आणि ग्रामीण विकासाच्या माध्यमातून त्यांनी तालुक्याच्या जडणघडणीत दिलेले योगदान कधीही विसरता येणार नाही. त्यांचे कार्य आणि विचार पुढील पिढ्यांसाठी प्रेरणादायी राहतील, असे गौरवोद्गार कृषिमंत्री दत्तात्रय भरणे यांनी काढले.

दिवंगत उपमुख्यमंत्री अजित पवार यांच्या जयंतीनिमित्त बुधवारी (दि. २२) बारामती येथील त्यांच्या स्मृतीस्थळी कृषिमंत्री भरणे यांनी पत्नी सारिका भरणे यांच्यासह पुष्पचक्र अर्पण करून अभिवादन केले. यावेळी इंदापूर तालुक्यातील विविध सहकारी संस्था, नगरपरिषदेचे पदाधिकारी, लोकप्रतिनिधी आणि राष्ट्रवादी काँग्रेसचे कार्यकर्ते उपस्थित होते. अजितदादांच्या आठवणींनी कृषिमंत्री भरणे भावूक झाले.

यावेळी भरणे म्हणाले, अजितदादांनी राज्याच्या विकासाला गती देताना ग्रामीण भाग, शेतकरी, सहकार आणि सामान्य नागरिक यांना केंद्रस्थानी ठेवून काम केले. इंदापूर तालुक्याच्या विकासासाठी त्यांनी सातत्याने पाठबळ दिले. सिंचन प्रकल्प, रस्ते, शिक्षण, आरोग्य, पाणीपुरवठा, कृषी आणि विविध विकासकामांसाठी त्यांनी दिलेले नेतृत्व तालुक्याच्या प्रगतीचा भक्कम पाया ठरले.

त्यांची कार्यशैली, निर्णयक्षमता, शिस्त आणि जनतेप्रती असलेली बांधिलकी आम्हा सर्वांसाठी कायम प्रेरणादायी आहे. त्यांच्या विकासविचारांचा वारसा जपत समाजहितासाठी अधिक जोमाने काम करणे, हीच त्यांना खरी आदरांजली ठरेल. या अभिवादन कार्यक्रमास पुणे जिल्हा बँकेचे संचालक आप्पासाहेब जगदाळे, इंदापूर नगरपरिषदेचे नगराध्यक्ष भरत शहा, जिल्हा परिषद सदस्या सोनाली जाधव, जिल्हा परिषद सदस्य श्रीमंत ढोले, राष्ट्रवादी काँग्रेसचे तालुकाध्यक्ष हनुमंत कोकाटे उपस्थित होते.