Kunal Patil |  आगामी स्थानिक स्वराज्य संस्थांच्या निवडणुकीपूर्वी राहुल गांधी यांचे निकटवर्तीय आणि काँग्रेसचा युवा चेहरा असलेले माजी आमदार कुणाल पाटील भाजपमध्ये जाणार आहेत. त्याशिवाय नाशिकचे माजी आमदार अपूर्व हिरे देखील करणार भाजपमध्ये प्रवेश करणार आहेत.

येत्या 1 जुलै रोजी दोन्ही नेते भाजपमध्ये प्रवेश करणार असल्याची माहिती समोर येत आहे. भाजपच्या प्रदेशाध्यक्षांच्या पदग्रहण कार्यक्रमातच हा पक्ष प्रवेश होण्याची शक्यता आहे. या कार्यक्रमाला मुख्यमंत्री देवेंद्र फडणवीस, भाजप प्रदेशाध्यक्ष चंद्रशेखर बावनकुळे आणि इतर नेते उपस्थित असतील.

अपूर्व हिरे हे शिक्षक मतदार संघाचे आमदार होते. 2019 मध्ये अपूर्व हिरे यांनी भाजपच्या विद्यमान आमदार सीमा हिरे यांच्या विरोधात नाशिक पश्चिम मतदारसंघातून निवडणूक लढवली होती. भाजपमध्ये नुकतेच दाखल झालेल्या सुधाकर बडगुजर यांना शह देण्यासाठी अपूर्व हिरे यांचा भाजपमध्ये प्रवेश घडवून आणल्याची चर्चा राजकीय वर्तुळात आहे.

कुणाल पाटील राहुल गांधी यांचे निकटवर्तीय

कुणाल पाटील हे धुळ्यातील काँगेसचे माजी आमदार होते. कुणाल पाटील हे राहुल गांधी यांचे निकटवर्तीय समजले जातात. कुणाल पाटील काँग्रेसचे ज्येष्ठ नेते स्व. रोहिदास पाटील यांचे चिरंजीव आहेत. रोहिदास पाटील काँग्रेसकडून ८ टर्म आमदार आणि मंत्री देखील राहिलेले आहेत. मागील तीन पिढ्यांपासून पाटील कुटुंब कट्टर काँग्रेसी राहिलेले आहे.  मात्र, आता कुणाल पाटील यांनी पक्षाची साथ सोडण्याचा निर्णय घेतला आहे. हा काँग्रेस पक्षासाठी मोठा धक्का मानला जात आहे.

नाशिकमध्ये ठाकरे गटाला धक्का  
काही दिवसांपूर्वीच ठाकरे गटाचे नाशिकमधील नेते सुधाकर बडगुजर यांनी भाजपमध्ये प्रवेश केला होता. यानंतर विलास शिंदे यांनीही ठाकरे गटाला सोडचिठ्ठी देत भाजपचे कमळ हातात घेतले होते. यामुळे नाशिकमध्ये ठाकरे गटाची ताकद कमी झाली आहे.