Jalgaon : राजस्थानात काँग्रेसचा मोठा विजय; महाराष्ट्रात फटाके फोडून जल्लोष
Jalgaon : राजस्थान जिल्हा परिषद आणि पंचायत समिती निवडणुकीत काँग्रेसने ७९४ जिल्हा परिषद आणि ३,७५८ पंचायत समिती जागा जिंकल्या. या विजयाचा चोपड्यात फटाके फोडून जल्लोष.

Jalgaon : राजस्थानमध्ये सत्ताधारी भारतीय जनता पक्षाला मागे टाकत काँग्रेसने जिल्हा परिषद आणि पंचायत समिती निवडणुकीत मोठे यश मिळवले आहे. या विजयाचा आनंद जळगाव जिल्ह्यातील चोपडा येथे काँग्रेस कार्यकर्त्यांनी फटाके फोडून आणि घोषणा देत साजरा केला.
राजस्थान राज्य निवडणूक आयोगाच्या आकडेवारीनुसार, जिल्हा परिषद सदस्यांच्या १ हजार २७५ जागांपैकी १ हजार २७१ जागांचे निकाल जाहीर झाले. त्यामध्ये काँग्रेसने ७९४ जागा जिंकल्या, तर भाजपला ३५७ जागांवर समाधान मानावे लागले. राष्ट्रीय लोकतांत्रिक पक्षाने (RLP) ५१, भारत आदिवासी पक्षाने (BAP) ४३, मार्क्सवादी कम्युनिस्ट पक्षाने ७, बहुजन समाज पक्षाने ६, तर अपक्षांनी १३ जागा जिंकल्या.
पंचायत समितीच्या ७ हजार ५४३ जागांपैकी ७ हजार ५२० जागांचे निकाल जाहीर झाले. यामध्ये काँग्रेसने ३ हजार ७५८ जागा जिंकत आघाडी घेतली. भाजपला २ हजार २१३ जागा मिळाल्या. आरएलपीने ४९७, बीएपीने २७८, तर अपक्ष उमेदवारांनी ६६२ जागा जिंकल्या. त्यामुळे ग्रामीण भागात काँग्रेसने भाजपपेक्षा मोठी आघाडी घेतल्याचे स्पष्ट झाले.
या निकालांमुळे राजस्थानच्या ग्रामीण राजकारणात काँग्रेसची ताकद वाढल्याचे चित्र दिसत आहे. ३७ जिल्ह्यांमध्ये झालेल्या मतमोजणीत काँग्रेसने २३ जिल्हा परिषदांमध्ये बहुमत मिळवले. तर भाजपला केवळ पाच जिल्हा परिषदांमध्ये बहुमत मिळाले. पंचायत समित्यांमध्येही काँग्रेसने २२९ ठिकाणी बहुमत मिळवत आघाडी घेतली. भाजपला ५१ पंचायत समित्यांमध्ये बहुमत मिळाले.
या विजयाच्या पार्श्वभूमीवर चोपडा शहर व तालुका काँग्रेसच्या वतीने छत्रपती शिवाजी महाराज चौकात आनंदोत्सव साजरा करण्यात आला. कार्यकर्त्यांनी फटाके फोडून आणि घोषणाबाजी करत विजयाचा आनंद व्यक्त केला. राजस्थानमध्ये भाजपचे सरकार असतानाही मतदारांनी काँग्रेसला मोठा पाठिंबा दिला. भाजपच्या कारभाराला नागरिक कंटाळले असून, त्यातूनच हा निकाल लागल्याचा दावा काँग्रेस पदाधिकाऱ्यांनी केला.
यावेळी काँग्रेसचे महाराष्ट्र प्रदेश उपाध्यक्ष संदीप पाटील यांनी आगामी लोकसभा निवडणुकीतही भाजपला मतदार धडा शिकवतील, असा विश्वास व्यक्त केला. राजस्थानमधील निकाल हा भाजप सरकारविरोधातील जनतेच्या नाराजीचा संकेत असल्याचेही त्यांनी सांगितले.





