ठाणे : बदलापूरमधील बाल लैंगिक अत्याचार प्रकरणातील आरोपी आणि कुळगाव-बदलापूर नगरपरिषदेतील भाजपचे स्वीकृत नगरसेवक तुषार आपटे यांनी अखेर आपल्या पदाचा राजीनामा दिला आहे. पक्षाच्या आदेशानंतर त्यांनी वरिष्ठांकडे राजीनामा सादर केला. विशेष म्हणजे, कालच झालेल्या नगरपरिषदेच्या कार्यकारिणी बैठकीत आपटेंची स्वीकृत नगरसेवक म्हणून नियुक्ती करण्यात आली होती. या नियुक्तीनंतर समाजातून तीव्र संताप व्यक्त करण्यात आला. मनसेनेही आक्रमक भूमिका घेतली होती. भाजपने तातडीने राजीनामा घेतला नाही, तर १३ किंवा १४ जानेवारी रोजी बदलापूरमध्ये मोर्चा काढून आंदोलन करण्यात येईल, असा इशारा मनसे नेते अविनाश जाधव यांनी दिला होता. वाढता विरोध आणि राजकीय दबाव लक्षात घेत अखेर तुषार आपटेंनी राजीनामा दिला. आपटेंच्या निवडीनंतर विरोधकांनी भाजपवर जोरदार टीका केली होती. शिवसेना (ठाकरे गट) खासदार संजय राऊत यांनी “लैंगिक अत्याचार प्रकरणातील आरोपीला भाजपने बक्षीस दिले आहे का?” असा सवाल उपस्थित केला होता. ऐन महापालिका निवडणुकांच्या तोंडावर या प्रकरणामुळे भाजपची मोठी नाचक्की झाल्याचे चित्र आहे. बदलापूर बाल लैंगिक अत्याचार प्रकरणात तुषार आपटे सहआरोपी असून सध्या ते जामिनावर बाहेर आहेत. आरोपी असतानाही त्यांना स्वीकृत नगरसेवकपद देण्यात आल्याने राजकीय वर्तुळात तीव्र प्रतिक्रिया उमटल्या होत्या आणि त्यांना पदावरून हटवण्याची जोरदार मागणी होत होती. पक्षाची बदनामी होत असल्याचे लक्षात येताच अखेर आपटेंनी स्वतःच राजीनामा दिला. राजीनामापत्रात तुषार आपटे यांनी नमूद केले आहे की, “माझी कुळगाव–बदलापूर नगरपरिषद स्वीकृत/नामनिर्देशित सदस्य म्हणून नियुक्ती करण्यात आली होती. मी आज दिनांक १० जानेवारी २०२६ रोजी या पदाचा स्वखुशीने राजीनामा देत असून, तो स्वीकारण्यात यावा.” बावनकुळेंनी दिला होता कारवाईचा इशारा दरम्यान, भाजप प्रदेशाध्यक्ष व महसूलमंत्री चंद्रशेखर बावनकुळे यांनी जालना येथे माध्यमांशी संवाद साधताना या प्रकरणावर प्रतिक्रिया दिली होती. “ज्यांनी चूक केली आहे त्यांच्यावर योग्य आणि निष्पक्ष कारवाई होईल. कुणीही काळजी करू नये,” असे त्यांनी स्पष्ट केले होते. त्यांच्या या प्रतिक्रियेनंतर काही वेळातच तुषार आपटेंचा राजीनामा घेण्यात आल्याने राजकीय हालचालींना वेग आला आहे.
