Todays Top 10 News: शरद पवार मोठे नेते, पण राज्यसभेची जागा सोडणार नाही; ठाकरे गटाचा आक्रमक पवित्रा राज्यातील आगामी राज्यसभा निवडणुकीपूर्वी महाविकास आघाडीत ठिणगी पडलीय. शरद पवार यांचा कार्यकाळ संपत असतानाच, ठाकरे गटाने या जागेवर आपला प्रबळ दावा ठोकला आहे. आमदार वरुण सरदेसाई यांनी स्पष्ट केले की, शरद पवार मोठे नेते असले तरी संख्याबळानुसार ही जागा शिवसेना उद्धव ठाकरे यांचीच आहे. २०२० मध्ये फौजिया खान यांना मदत केली होती, मात्र आता स्वतःचा खासदार निवृत्त होत असल्याने तडजोड करणार नसल्याचे त्यांनी सांगितले. विशेष म्हणजे, मविआच्या बैठकीला आदित्य ठाकरेंनी दांडी मारल्याने चर्चांना उधाण आले असून, ठाकरे गट आपल्या भूमिकेवर ठाम असल्याचे दिसून येतेय. सविस्तर वृत्त – शरद पवारांची राज्यसभेची जागा धोक्यात? ठाकरेंच्या आमदाराने दंड थोपटले मराठीला ज्ञानभाषा करून पुढच्या पिढीपर्यंत नेऊया : मुख्यमंत्री फडणवीस devendra fadnavis मराठी भाषा गौरव दिनानिमित्त विधानभवनात आयोजित ‘जावे विनोदाच्या गावा’ या विशेष कार्यक्रमात मुख्यमंत्री देवेंद्र फडणवीस यांनी मराठीला समृद्ध ज्ञानभाषा करण्याचा निर्धार व्यक्त केला. ज्या भाषेतून रोजगार मिळतो, तीच भाषा प्रगती करते, असे सांगत त्यांनी तंत्रज्ञान आणि व्यवहारात मराठीचा वापर वाढवण्याचे आवाहन केले. यावेळी विधानसभा अध्यक्ष राहुल नार्वेकर यांनी संशोधन मराठीतून होण्यावर भर दिला, तर उपमुख्यमंत्री एकनाथ शिंदे यांनी मराठी माणसाच्या विनोदबुद्धीचे कौतुक करत हा वारसा जागतिक स्तरावर नेण्याचे आवाहन केले. उपमुख्यमंत्री सुनेत्रा अजित पवार यांनी डिजिटल माध्यमांमध्ये मराठीचा वापर वाढवण्यास सांगितले. याप्रसंगी ‘लोकसेवेचा लोकजागर’ पुस्तकाचे प्रकाशन झाले असून, विविध कलाकारांनी पु.ल. देशपांडे व अत्रे यांच्या साहित्याचे सादरीकरण केले. अजित पवार अपघात प्रकरणाची पारदर्शक चौकशी व्हावी; रोहित पवारांनी घेतली मुख्यमंत्री फडणवीसांची भेट cm devendra fadnavis and mla rohit pawar राष्ट्रवादी काँग्रेसचे नेते अजित पवार यांच्या विमान अपघाताची पारदर्शक चौकशी व्हावी, या मागणीसाठी आमदार रोहित पवार यांनी मुख्यमंत्री देवेंद्र फडणवीस यांची भेट घेऊन सविस्तर चर्चा केली. संबंधित विमान कंपनीवर गुन्हा दाखल करण्याची मागणी करत रोहित पवारांनी या प्रकरणातील संशयास्पद बाबींकडे मुख्यमंत्र्यांचे लक्ष वेधले. मुख्यमंत्र्यांनी तांत्रिक अडचणी समजून घेऊन योग्य कार्यवाहीचे आश्वासन दिलेय. यासोबतच रोहित पवारांनी देवगिरी बंगला व विधानभवन परिसरात स्मारक उभारण्याची आणि बारामती विमानतळाला अजित पवारांचे नाव देण्याची मागणी केली. मनसेप्रमुख राज ठाकरे यांचीही भेट घेत त्यांनी या लढ्यासाठी पाठिंबा मिळवला असून, सोमवारी पत्रकार परिषदेत ते अधिक खुलासे करणार आहेत. तामिळनाडूच्या राजकारणात मोठा भूकंप; माजी मुख्यमंत्री पनीरसेल्वम यांचा ‘डीएमके’त प्रवेश Panneerselvam and CM Stalin तामिळनाडू विधानसभा निवडणुकीच्या तोंडावर राज्याच्या राजकारणाला मोठी कलाटणी मिळालीय. एआयएडीएमके (AIADMK) मधून निष्कासित झालेले माजी मुख्यमंत्री ओ. पनीरसेल्वम (ओपीएस) यांनी शुक्रवारी मुख्यमंत्री एम. के. स्टॅलिन यांच्या उपस्थितीत सत्ताधारी ‘डीएमके’ पक्षात जाहीर प्रवेश केला. तीन वेळा मुख्यमंत्री राहिलेल्या पनीरसेल्वम यांनी ई. पलानीस्वामी यांच्या कार्यपद्धतीवर टीका करत स्टॅलिन यांच्या सुशासनाचे कौतुक केले. पनीरसेल्वम यांच्या या निर्णयामुळे अण्णा द्रमुकला मोठा धक्का बसला असून, त्यांच्या थेनी जिल्ह्यातील प्रभावामुळे आगामी निवडणुकीत द्रमुकची ताकद वाढण्याची शक्यता आहे. या प्रवेशामुळे राज्यातील जुनी राजकीय समीकरणे पूर्णपणे बदलली आहेत. सविस्तर वृत्त – राजकारणात मोठा भूकंप! तीनवेळा मुख्यमंत्री राहिलेल्या दिग्गज नेत्याचा सत्ताधारी पक्षात प्रवेश ‘सत्याचा विजय, मोदी-शाहांनी माफी मागावी’; निर्दोष सुटकेनंतर अरविंद केजरीवाल आक्रमक arvind kejriwal दिल्ली मद्यधोरण प्रकरणात न्यायालयाने निर्दोष मुक्तता केल्यानंतर माजी मुख्यमंत्री अरविंद केजरीवाल यांनी भाजप आणि केंद्र सरकारवर जोरदार हल्ला चढवलाय. “आम आदमी पक्षाला संपवण्यासाठी पंतप्रधान मोदी आणि अमित शाह यांनी रचलेला हा एक मोठा राजकीय कट होता,” असा गंभीर आरोप केजरीवाल यांनी केला. पत्रकार परिषदेत बोलताना केजरीवाल भावूक झाले होते. निवडणुकीच्या मैदानात आम्हाला हरवणे शक्य नसल्यानेच खोट्या आरोपांखाली तुरुंगात डांबण्यात आले, असे त्यांनी नमूद केले. आपल्या प्रामाणिकपणावर शिक्कामोर्तब होईपर्यंत आपण शांत होतो, असे सांगत त्यांनी आता जनतेच्या न्यायालयात जाण्याचे संकेत दिलेत. न्यायालयाने दिलेल्या या निकालानंतर ‘आप’ कार्यकर्त्यांमध्ये उत्साहाचे वातावरण असून, हा लोकशाहीचा विजय असल्याची भावना व्यक्त होतेय. सविस्तर वृत्त – केजरीवाल, सिसोदिया यांची CBI प्रकरणातून निर्दोष मुक्तता; आता ED प्रकरणाचे काय होणार? बांगलादेशात 5.5 रिश्टर स्केलचा भूकंप; कोलकातासह पश्चिम बंगालला जोरदार धक्के शेजारील देश बांगलादेशातील नयाबाजार परिसरात शुक्रवारी दुपारी दीड वाजताच्या सुमारास ५.५ रिश्टर स्केल तीव्रतेचा भूकंपाचा धक्का बसला. या भूकंपाचे पडसाद पश्चिम बंगालची राजधानी कोलकाता आणि आसपासच्या जिल्ह्यांतही उमटले असून, सुमारे १० सेकंद जाणवलेल्या या धक्क्यांमुळे नागरिकांमध्ये मोठी घबराट पसरली. भूकंपाचा केंद्रबिंदू जमिनीपासून १० किमी खोलीवर होता. या धक्क्यांमुळे बहुमजली इमारतींमधील पंखे, फर्निचर आणि खिडक्या मोठ्या प्रमाणात हलल्याने लोक घराबाहेर मोकळ्या जागेत धावले. सुदैवाने, या घटनेत कोणतीही जीवित किंवा वित्तहानी झाल्याचे वृत्त नाही. दरम्यान, शुक्रवारी पहाटे सिक्कीममध्येही ३.७ तीव्रतेचा भूकंप झाल्याने हिमालयीन क्षेत्रातील वाढत्या भूगर्भीय हालचालींबाबत चिंता व्यक्त होतेय. सविस्तर वृत्त – कोलकातासह बंगालमधील अनेक जिल्ह्यांत भूकंपाचे जोरदार धक्के शेअर बाजारात ‘ब्लैक फ्रायडे’, सेन्सेक्स 961 अंकांनी कोसळला; गुंतवणूकदारांचे 5 लाख कोटी बुडाले भारतीय शेअर बाजारासाठी आजचा शुक्रवार अत्यंत निराशाजनक ठरला असून गुंतवणूकदारांना ‘ब्लैक फ्रायडे’चा अनुभव आला. जागतिक बाजारातील कमकुवत संकेत आणि परदेशी गुंतवणूकदारांच्या मोठ्या प्रमाणावरील विक्रीमुळे सेन्सेक्स ९६१ अंकांनी कोसळून ८१,२८७ वर बंद झाला, तर निफ्टी ३१७ अंकांच्या घसरणीसह २५,२०० च्या खाली पोहोचला. या एकाच दिवसाच्या पडझडीमुळे बीएसईमध्ये सूचीबद्ध कंपन्यांचे बाजार भांडवल ५ लाख कोटी रुपयांनी घटलेय. ऑटो, बँकिंग आणि फार्मा क्षेत्रातील समभागांना या घसरणीचा सर्वाधिक फटका बसला. सन फार्मा, भारती एअरटेल आणि महिंद्रा अँड महिंद्रा यांसारख्या मोठ्या शेअर्समध्ये २ टक्क्यांहून अधिक घसरण झाली. आयटी क्षेत्र वगळता इतर सर्व क्षेत्रात आज लाल निशाण पाहायला मिळाले, ज्यामुळे बाजारात भीतीचे वातावरण निर्माण झालेय. सविस्तर वृत्त – शेअर बाजारात ‘ब्लॅक फ्रायडे’; सेन्सेक्स 961 अंकांनी कोसळला, 5 लाख कोटी बुडाले, जाणून घ्या 5 प्रमुख कारणे iPhone 18 Pro Max नव्या रंगात लवकरच बाजारात; संभाव्य किंमत आणि फीचर्सचा खुलासा अॅपल प्रेमींमध्ये सध्या आगामी iPhone 18 Pro Max बाबत मोठी उत्सुकता पाहायला मिळतेय. अॅपलच्या २०२६ मधील सर्वात मोठ्या इव्हेंटची तयारी सुरू असतानाच या प्रीमियम फोनचे स्पेसिफिकेशन आणि संभाव्य किंमत लीक झालीय. हा फोन १२ सप्टेंबर २०२६ रोजी जागतिक बाजारपेठेत लाँच होण्याची शक्यता आहे. डिझाइनमध्ये मोठे बदल नसले तरी यावेळी ग्राहकांना नवे आकर्षक कलर व्हेरिएंट पाहायला मिळतील. या फोनमध्ये ४८ मेगापिक्सेलचे तीन रिअर कॅमेरे आणि १८ मेगापिक्सेलचा फ्रंट कॅमेरा असू शकतो. तांत्रिकदृष्ट्या हा फोन अधिक सक्षम करण्यासाठी यात ‘A20 Pro’ चिपसेट आणि १६ जीबी रॅमचा समावेश असण्याची चर्चा आहे. याशिवाय ६.९ इंचाचा प्रो-मोशन डिस्प्ले आणि ५१०० mAh ची बॅटरी यात मिळू शकते. भारतात या फोनची सुरुवातीची किंमत १,५४,९०० रुपये असण्याचा अंदाज वर्तवण्यात आलाय. रश्मिका-विजयचे लग्नानंतर रिसेप्शन; पंतप्रधान मोदी आणि अमित शाहां खास आमंत्रण Rashmika-Vijay दाक्षिणात्य चित्रपटसृष्टीतील लोकप्रिय जोडी रश्मिका मंदाना आणि विजय देवरकोंडा २६ फेब्रुवारी २०२६ रोजी उदयपूरमध्ये विवाहबंधनात अडकले. अत्यंत खाजगी स्वरूपात पार पडलेल्या या शाही सोहळ्यात तेलुगु आणि कोडवा परंपरेनुसार विधी संपन्न झाले. लग्नानंतर या नवविवाहित जोडप्याने दिल्लीत पंतप्रधान नरेंद्र मोदी आणि गृहमंत्री अमित शाह यांची भेट घेऊन त्यांना हैदराबाद येथील रिसेप्शनसाठी वैयक्तिक आमंत्रण दिले. यावेळी त्यांनी पंतप्रधानांना चांदीची गणेशमूर्ती भेट दिली. राजस्थानच्या आयटीसी एकाया हॉटेलमध्ये झालेल्या या सोहळ्यात केवळ २०० पाहुणे उपस्थित होते. आता ४ मार्च रोजी हैदराबादच्या ताज कृष्णा हॉटेलमध्ये हा भव्य रिसेप्शन समारंभ पार पडणार असून, देशातील बडे नेते या सोहळ्याला उपस्थित राहणार का, याची उत्सुकता चाहत्यांमध्ये निर्माण झालीय. टीम इंडियाचा फलंदाज रिंकू सिंगला पितृशोक; कर्करोगाशी झुंज ठरली अपयशी भारतीय क्रिकेट संघाचा धडाकेबाज फलंदाज रिंकू सिंग याच्या कुटुंबावर दुःखाचा डोंगर कोसळलाय. रिंकूचे वडील खानचंद सिंग यांचे शुक्रवारी यकृताच्या कर्करोगामुळे (लिव्हर कॅन्सर) निधन झाले. ते गेल्या काही काळापासून चौथ्या टप्प्यातील कर्करोगाशी झुंज देत होते. ग्रेटर नोएडा येथील रुग्णालयात त्यांच्यावर उपचार सुरू होते, मात्र या आठवड्यात प्रकृती अधिक खालावल्याने त्यांना व्हेंटिलेटरवर ठेवण्यात आले होते. रिंकू सध्या टी-२० विश्वचषकासाठी भारतीय संघासोबत असून, वडिलांच्या निधनामुळे क्रीडाविश्वात हळहळ व्यक्त होतेय. माजी फिरकीपटू हरभजन सिंग याने सोशल मीडियाद्वारे रिंकू आणि त्याच्या कुटुंबाप्रती संवेदना व्यक्त केल्यात. कठीण काळात देवाने रिंकूच्या कुटुंबाला शक्ती द्यावी, अशी भावना चाहत्यांकडून व्यक्त होतेय. सविस्तर वृत्त – क्रिकेटपटू रिंकू सिंहवर कोसळला दुःखाचा डोंगर; उपचारादरम्यान वडिलांचे निधन
