Teacher Training – नवीन राष्ट्रीय शैक्षणिक धोरणानुसार टप्प्याटप्प्याने इयत्तानिहाय अभ्यासक्रम बदलण्यास सुरुवात झालेली आहे. आता येत्या शैक्षणिक वर्षापासून इयत्ता दुसरी, तिसरी, चौथीसाठी नवीन अभ्यासक्रम लागू केला जाणार आहे. राज्य शैक्षणिक संशोधन व प्रशिक्षण परिषदेच्या वतीने नवीन अभ्यासक्रमाचे शिक्षकांना प्रशिक्षण देण्यात येणार आहे. शिक्षकांना उन्हाळी सुटीत मे महिन्यात हे प्रशिक्षण देण्यात येणार आहे. सन २०२५-२६ या शैक्षणिक वर्षात इयत्ता पहिलीसाठी नवीन अभ्यासक्रम लागू केला आहे. त्यासाठी सुरुवातीला शिक्षकांना या नवीन अभ्यासक्रमाची माहिती देण्यासाठी प्रशिक्षण कार्यक्रम राबविण्यात आला होता. आगामी शैक्षणिक वर्ष १५ जून २०२६ पासून सुरू होणार असल्याने त्यापूर्वी नवीन अभ्यासक्रम लागू होणाऱ्या वर्गाच्या शिक्षकांचे प्रशिक्षण पूर्ण होणे आवश्यक आहे. इयत्ता दुसरी, तिसरी, चौथीच्या सर्व शिक्षकांच्या प्रशिक्षणासाठी राज्यस्तर, जिल्हास्तर व तालुकास्तर प्रशिक्षण नियोजन करण्यात आलेले आहे. नवीन राष्ट्रीय शैक्षणिक धोरण मराठी, उर्दू माध्यमाच्या शिक्षकांसाठी स्वतंत्रपणे प्रशिक्षण आयोजित करण्यात येईल. अन्य माध्यमांना मराठी माध्यमांसोबत सामावून घेतले जाईल. उर्दू माध्यमासाठी राज्यस्तर व जिल्हास्तर असे दोनच स्तर असतील तर मराठीसोबत अन्य माध्यमांसाठी प्रशिक्षण आयोजित करण्यात येणार आहे. ४ मे ते ३० मे या कालावधीत हा प्रशिक्षण कार्यक्रम टप्प्याटप्प्याने राबविला जाणार आहे. प्रत्येक वर्गात अपेक्षित विषयांच्या निर्धारित तासिका पूर्ण होण्यासाठी दुसरीसाठी ३ दिवसांचा आणि तिसरी व चौथीसाठी ४ दिवसांचा प्रशिक्षण कालावधी निश्चित करण्यात आलेला आहे. प्रशिक्षणाच्या नावनोंदणीसाठी २० एप्रिलपर्यंतची मुदत देण्यात आलेली आहे. जिल्हास्तर व तालुकास्तर प्रशिक्षण आयोजनाची जबाबदारी संबंधित जिल्हा शिक्षण व प्रशिक्षण संस्थाची राहणार आहे. प्रशिक्षण घेणाऱ्या शिक्षकांच्या एकूण संख्येनुसार ६० प्रशिक्षणार्थ्यांचा एक वर्ग याप्रमाणे आवश्यक बॅचेस तयार केल्या जाणार आहेत. त्यानुसार प्रशिक्षण स्थळ व तज्ज्ञांची निवड करण्यात येणार आहे. उर्दू माध्यमांसाठी तालुकास्तरावर वर्गासाठी पुरेशी संख्या होऊ शकत नसल्याने त्यांचेसाठी राज्यस्तर व जिल्हास्तर असे दोनच टप्पे असतील. संख्येनुसार वर्ग पूर्ण होण्यासाठी काही ठिकाणी एकापेक्षा अधिक जिल्ह्याचे प्रशिक्षण नियोजन एकत्र दिलेले आहे. नवीन अभ्यासक्रमाची पुस्तके शाळांना व शिक्षकांना पुरविण्याचेही नियोजन करण्यात आलेले आहे.
