T20 World Cup 2024 (Story of Uganda’s inspirational rising stars) : येत्या जून महिन्यात टी-20 विश्वचषकाचा थरार राहणार आहे. टी20 विश्वचषक 2024 स्पर्धा ही 1 जूनपासून सुरू होणार आहे. क्रिकेट जगतातील या सर्वात मोठ्या स्पर्धेत एकूण 20 संघ सहभागी होतील. यापैकी एक संघ युगांडा असून, इथपर्यंत मजल मारण्याकरता त्यांनी कशा प्रकारचा संघर्ष केला, हे जाणून घेऊया.

क्रीडा विश्वात अशा अनेक कथा ऐकायला मिळतात ज्यात खेळाडू संघर्षातून लढून झीरो ते होरो बनतात. आता टी-20 विश्वचषक सुरू होणार आहे आणि या स्पर्धेतील अशा तीन खेळाडूंची कहाणी अशी आहे की, कोणाचेही हृदय पिळवटून जाईल. झोपडपट्ट्यांमधून उदयास आलेल्या या खेळाडूंना मुकुट नसलेले राजे म्हटले तर चुकीचे ठरणार नाही. हे तीन खेळाडू युगांडा क्रिकेट संघाचे आहेत. एका खेळाडूला राखीव म्हणून स्थान मिळाले आहे तर दोन खेळाडूंचा टॉप-15 संघात समावेश आहे. त्याच्यामुळे फुटबॉलचे शौकीन असलेले येथील रहिवासी आता क्रिकेट आवडीने पाहतात.

युगांडाची राजधानी कम्पाला येथे 60 टक्के लोकसंख्या ही झोपडपट्टीतून आलेली दिसते. हे तिन्ही खेळाडूही झोपडपट्टीतून आलेले आहेत. अशा परिस्थितीत या खेळाडूंसाठी टी-20 विश्वचषक 2024 मध्ये युगांडाच्या संघाचे नेतृत्व करणे एखाद्या स्वप्नापेक्षा कमी नसेल.  त्यापैकी एक जुमा मियागी (Juma Miyagi) जो युगांडाचा वेगवान गोलंदाज आहे. मियागी याचे बालपण कम्पालाच्या बाहेरील नागूरू झोपडपट्टीत गेले.

युगांडाने गेल्या वर्षी नोव्हेंबरमध्ये चमकदार कामगिरी केली आणि पात्रता मिळवल्यानंतर पहिल्यांदाच ते टी-20 विश्वचषकात खेळताना दिसणार आहे. युगांडाच्या गोलंदाजी क्रमातील मियागी हा महत्त्वाचा दुवा बनला आहे. युगांडाच्या अंडर-19 संघाकडून दोन वर्षे खेळल्यानंतर तो आता 1 जूनपासून वेस्ट इंडिज आणि अमेरिकेत होणाऱ्या टी-20 विश्वचषक स्पर्धेत वरिष्ठ संघाच्या गोलंदाजीची जबाबदारी सांभाळणार आहे. जुमा मियागी दोन वर्षे युगांडा अंडर-19 संघाकडून खेळला आहे. आतापर्यंत त्याने युगांडाकडून 21 टी-20 सामने खेळले असून त्यात त्याने 34 विकेट्स घेतल्या आहेत.

मियागी जिथून आला त्या ठिकाणी ना पिण्याच्या स्वच्छ पाण्याची सोय नव्हती, ना सांडपाण्याची व्यवस्था नव्हती की ना आरोग्याच्या चांगल्या सुविधा नव्हत्या. मियागी व्यतिरिक्त सिमोन सेसाजी आणि राखीव खेळाडू इनोसेंट एमवेबाजे यांचीही अशीच कहाणी आहे. युगांडा संघाची प्रशिक्षकपदाची धुरा सांभाळणारे भारतीय अभय शर्माही त्याची संघर्षमय कहाणी ऐकून थक्क झाले. जे टी-20 विश्वचषकापूर्वी युंगाडा संघाशी संबंधित आहेत.

प्रशिक्षक अभय शर्मा काय म्हणाले?

असे नाही की, अभया शर्मा यांनी कधी झोपडपट्टी पाहिली नाही पण कम्पालाची झोपडपट्टी मुंबईच्या धारावीपेक्षा वेगळी आहे. खेळाडूंसोबत वेळ घालवल्यानंतर शर्मा यांचा त्यांच्याबद्दलचा आदर अनेक पटींनी वाढला आहे. या खेळाडूंची कहाणी ऐकून प्रशिक्षक अभय शर्मा यांनी त्रिनिदाद येथील पीटीआय वृत्तसंस्थेला सांगितले की,“मला वाटले नाही की ते अशा परिस्थितीत राहतात. ते त्यांच्या प्रशिक्षकांचा खूप आदर करतात आणि त्यांना वाटते की आपण त्यांचे जीवन बदलू शकतो.”

कशी मिळवली विश्वचषकासाठी पात्रता…

युगांडाने गेल्या वर्षी नोव्हेंबरमध्ये चमकदार कामगिरी केली आणि पात्रता मिळवल्यानंतर पहिल्यांदाच ते टी-20 विश्वचषकात खेळताना दिसणार आहे.  क्वालिफायरमध्ये युगांडाने 6 पैकी 5 सामने जिंकले होते. आफ्रिका क्वालिफायर्समधून T20 विश्वचषकासाठी पात्र ठरणारा युगांडा हा दुसरा संघ ठरला आहे . युगांडाने क्वालिफायरच्या सहाव्या सामन्यात रवांडाचा 9 गडी आणि 71 चेंडू राखून पराभव करून टी-20 स्पर्धेसाठी पात्रता मिळवली होती. रवांडा विरुद्ध खेळल्या गेलेल्या सामन्याबद्दल बोलायचे झाले तर प्रथम फलंदाजी करण्यासाठी आलेल्या रवांडा संघाला युगांडाच्या गोलंदाजांनी अवघ्या 18.5 षटकात 65 धावांत गुंडाळले. त्यानंतर प्रत्युत्तरात लक्ष्याचा पाठलाग करताना 8.1 षटकांत 1 गडी राखून विजय मिळवला.

T20 World Cup 2024 : युगांडा क्रिकेट संघाने रचला इतिहास…

क्वालिफायरच्या पहिल्या सामन्यात युगांडाने टांझानियाचा 8 गडी आणि 28 चेंडू राखून पराभव केला. त्यानंतर पुढच्या सामन्यात त्यांना नामिबियाविरुद्ध 6 विकेट्सने पराभव स्विकारावा लागला. मात्र, त्यानंतर युगांडाने एकही सामना गमावला नाही. तिसऱ्या सामन्यात युगांडाने झिम्बाब्वेचा 5 गडी आणि 5 चेंडू बाकी राखून पराभव केला. पुढे जात युगांडाच्या संघाने चौथ्या सामन्यात नायजेरियाचा 9 गडी आणि 15 चेंडू राखून पराभव केला. त्यानंतर पाचव्या सामन्यात केनियाचा 33 धावांनी पराभव केला आणि सहाव्या सामन्यात रवांडाचा 9 गडी राखून पराभव केला आणि 2024 च्या T20 विश्वचषक स्पर्धेसाठी पात्र ठरले. अशाप्रकारे युगांडाने सलग चार सामने जिंकले.

T20 World Cup 2024 : युगांडाने विश्वचषक संघाची केली घोषणा, ‘हे’ 15 खेळाडू माजवतील खळबळ…

विश्वचषकासाठी युगांडाचा संघ खालीलप्रमाणे :

टी-20 विश्वचषकासाठी युगांडाचा संघ पहिल्यांदाच मैदानात उतरणार आहे. ब्रायन मसाबाकडे कर्णधारपद सोपवण्यात आले आहे, तर रियाजत अली शाहला उपकर्णधारपद देण्यात आले आहे.  43 वर्षीय ऑफ-स्पिन अष्टपैलू फ्रँक नुबुगा याचाही विश्वचषकासाठी निवड करण्यात आलेल्या संघात समावेश करण्यात आला असून, तो या स्पर्धेत खेळणारा सर्वात वयस्कर खेळाडू ठरला आहे.

Uganda Squad : ब्रायन मसाबा (कर्णधार), साइमन सेसाजी, रोजर मुकासा, कॉस्मस क्येवुटा, दिनेश नकरानी, फ्रेड अकेलम, कैनेथ वैस्वा, अलपेश रमजानी, फ्रैंक न्सुबुगा, हेनरी सेन्योंडो, बिलाल हसन, रॉबिन्सन ओबुया, रियाजत अली शाह (उपकर्णधार), जुमा मियाजी, रोनक पटेल.

युंगाडाचे टी-20 विश्वचषकातील सामने –

या विश्वचषकात युगांडा ‘क’ गटात आहे, ज्यामध्ये न्यूझीलंड, अफगाणिस्तान, पापुआ न्यू गिनी आणि वेस्ट इंडिज या संघांचा समावेश आहे. युगांडाचा पहिला सामना 4 जून रोजी अफगाणिस्तानविरुद्ध खेळायचा आहे. त्याचा दुसरा सामना 6 जून रोजी पापुआ न्यू गिनिविरूध्द, तिसरा सामना 9 जून रोजी बलाढ्य वेस्टइंडिजविरूध्द तर चौथा सामना 15 जून विरूध्द बलाढ्य अशा न्यूझीलंड संघाविरूध्द होईल.