NCP News : राष्ट्रवादी काँग्रेसच्या अजित पवार गटात पुन्हा एकदा अंतर्गत वाद चव्हाट्यावर आला आहे. पक्षाचे प्रदेशाध्यक्ष सुनील तटकरे यांच्या नियुक्तीविरोधात थेट निवडणूक आयोगाकडे तक्रार दाखल करण्यात आल्याची माहिती समोर आली आहे. पक्षाच्या संविधानातील नियम डावलून तटकरे यांची प्रदेशाध्यक्षपदी नियुक्ती करण्यात आल्याचा आरोप या तक्रारीत करण्यात आला आहे. (NCP News)

तटकरे यांच्या नियुक्तीवरच आक्षेप

मंठा-परतूर विधानसभा मतदारसंघाचे अध्यक्ष भाऊसाहेब गोरे यांनी सुनील तटकरे यांच्या नियुक्तीविरोधात निवडणूक आयोगाकडे तक्रार दाखल केल्याची माहिती आहे. पक्षाच्या अंतर्गत प्रक्रियेचे पालन न करता तटकरे यांची प्रदेशाध्यक्षपदी नियुक्ती करण्यात आल्याचा दावा तक्रारीत करण्यात आला आहे. (NCP News)

या तक्रारीमुळे अजित पवार गटातील अंतर्गत मतभेद पुन्हा एकदा समोर आले असून, प्रदेशाध्यक्षपदावरच प्रश्नचिन्ह निर्माण होण्याची शक्यता व्यक्त केली जात आहे. (NCP News)

जालना जिल्ह्यातील पदाधिकाऱ्यांचाही नाराजीचा सूर

दरम्यान, जालना जिल्ह्यातील राष्ट्रवादी काँग्रेसच्या काही पदाधिकाऱ्यांनीही सुनील तटकरे यांच्या कार्यपद्धतीवर नाराजी व्यक्त केल्याची माहिती आहे. तटकरे यांच्या कार्यक्रमादरम्यान घोषणाबाजी केल्यामुळे काही पदाधिकाऱ्यांना त्यांच्या पदावरून हटवण्यात आल्याचा आरोप करण्यात आला आहे. त्यामुळे पक्षातील स्थानिक पदाधिकारी आणि वरिष्ठ नेतृत्वामध्ये मतभेद वाढल्याची चर्चा सुरू झाली आहे. (NCP News)

निवडणूक आयोग काय निर्णय घेणार?

सुनील तटकरे यांच्या नियुक्तीविरोधात दाखल झालेल्या तक्रारीमुळे राष्ट्रवादी काँग्रेसच्या अजित पवार गटातील राजकीय वातावरण पुन्हा तापले आहे. आता निवडणूक आयोग या तक्रारीची दखल घेणार का? तक्रारीवर काय निर्णय होणार? तसेच या संपूर्ण प्रकरणावर सुनील तटकरे आणि अजित पवार गटाकडून काय भूमिका मांडली जाणार? याकडे राजकीय वर्तुळाचे लक्ष लागले आहे. (NCP News)

दरम्यान, तटकरे यांच्या प्रदेशाध्यक्षपदावर खरोखरच संकट निर्माण झाले आहे का, की ही पक्षांतर्गत नाराजीपुरतीच मर्यादित राहणार, हे आगामी घडामोडींनंतर स्पष्ट होणार आहे. (NCP News)

Sunil Tatkare : …तर सुनील तटकरे अद्याप प्रदेशाध्यक्षपदावर कार्यरत कसे? थेट निवडणूक आयोगाकडे तक्रार

Sunil Tatkare : “ते रणनीतीकार असतील, पण मला रणनीतीकारांची गरज नाही” – सुनील तटकरे