Pune News : घरफोडी करताना पोलिसांच्या नजरेतून सुटण्यासाठी केसांचा टोप (विग) आणि मास्कचा वापर करणाऱ्या आंतरराज्यीय सराईत चोरट्यांच्या टोळीचा विश्रामबाग पोलिसांनी पर्दाफाश केला आहे. या कारवाईत चार आरोपींना अटक करण्यात आली असून, त्यांच्याकडून सुमारे ३७ लाख रुपयांचा मुद्देमाल जप्त करण्यात आला आहे. या टोळीने केलेले नऊ घरफोडीचे गुन्हे उघडकीस आले असल्याची माहिती पोलीस उपायुक्त कृषीकेश रावले यांनी दिली. (Pune News)

अटक करण्यात आलेल्यांमध्ये शंकरसिंग उर्फ कुणालसिंग जितेंद्रसिंग जुनी (२७, रामटेकडी, हडपसर), रणबीरसिंग धनसिंग बावरी शिकलीगर (२६, बडोदा, गुजरात), अक्षयसिंग उर्फ अक्षय बिरूसिंग जुनी (२२, बिराजदारनगर, हडपसर) आणि सोनुसिंग शाखासिंग शिकलीगर (२२, बडोदा, गुजरात) यांचा समावेश आहे. या सर्व आरोपींवर यापूर्वी प्रत्येकी सहा ते बारा गुन्हे दाखल असून ते सराईत गुन्हेगार आहेत. (Pune News)

विश्रामबाग पोलीस ठाण्याच्या हद्दीत झालेल्या घरफोडीचा तपास सुरू असताना आरोपी उंड्री-पिसोळी परिसरातून मोटारीने जात असल्याची माहिती पोलीस हवालदार नितीन मुंढे यांना मिळाली. त्यानुसार सापळा रचून पोलिसांनी चारही बाजूंनी घेराव घालत आरोपींना ताब्यात घेतले. (Pune News)

चौकशीत त्यांनी विविध भागातील घरफोड्यांची कबुली दिली. तपासात एकूण नऊ घरफोडीचे गुन्हे उघडकीस आले आहेत. आरोपी शंकरसिंग जुनी हा भारती विद्यापीठ, आंबेगाव आणि मार्केटयार्ड पोलीस ठाण्यांतील गुन्ह्यांमध्येही वाँटेड असल्याचे समोर आले. (Pune News)

त्याला २०२० दोनदा मोक्का लागला होता. सध्या तो जामिनावर बाहेर आहे. आरोपींकडून १८ तोळे सोन्याचे दागिने, एक मोटार, घरफोडीसाठी वापरण्यात येणारे साहित्य असा एकूण सुमारे ३७ लाख रुपयांचा मुद्देमाल जप्त करण्यात आला आहे. (Pune News)

ओळख लपवण्यासाठी विग आणि मास्कचा वापर

घरफोडीपूर्वी आरोपी मोटारीतून परिसराची रेकी करत असत. त्यानंतर रात्रीच्या वेळी विग आणि मास्क घालून कटावणीच्या साहाय्याने घरांचे कुलूप उचकटून चोरी केली जात असे. चोरीचा ऐवज थेट गुजरातमध्ये नेऊन विक्री केला जात असल्याचे तपासात निष्पन्न झाले आहे. विश्रामबाग पोलिसांच्या तपास पथकाने तांत्रिक विश्लेषण, गोपनीय माहिती आणि सातत्यपूर्ण पाठपुरावा करून या आंतरराज्यीय टोळीचा पर्दाफाश केला. (Pune News)

नाकाबंदीमुळे पळ काढण्यास घाबरले

अटक चोरट्यामध्ये दोघेजण गुजरात येथील आहेत. तर दोघे पुण्यातील. घरफोडी केल्यानंतर चोरी केलेला मुद्देमाल दोघे आरोपी गुजरातला घेऊन जात होते. त्यामुळे अनेक घरफोड्या केल्यानंतर देखील ते पोलिसांच्या रडारवर आले नव्हते. (Pune News)

विश्रामबाग पोलिस ठाण्याच्या हद्दीत पहाटेच्यावेळी घरफोडी केल्यानंतर ते गुजरातला पळून जाण्याच्या तयारीत होते. मात्र शहरात ठिक-ठिकाणी नाकाबंदी असल्याची माहिती त्यांना होती. त्यामुळे त्यांनी पळून जाण्याचे नियोजन बदलले अन्‌ पोलिसांच्या जाळ्यात अडकले. (Pune News)

ही कारवाई पोलीस उपायुक्त कृषीकेश रावले, सहायक पोलीस आयुक्त अनुजा देशमाने यांच्या मार्गदर्शनाखाली वरिष्ठ पोलीस निरीक्षक नवनाथ जगताप, सहाय्यक पोलीस निरीक्षक उमेश कारके, उपनिरीक्षक मेहबूब मोकाशी, सचिन कदम, नितीन मुंढे, अमोल भोसले, महेश कदम, शशिकांत दरेकर, शैलेश सुर्वे, सचिन अहिवळे, कैलास डुकरे, जाकीर मणियार, अनिस शेख, शिवा गायकवाड, अर्जुन थोरात, सागर मोरे, फिरोज इनामदार आणि नितीन बाबर यांच्या पथकाने केली. (Pune News)

Pune News : पुण्यातील FC रोडवरील वाहतुकीत मोठे बदल; उद्या ‘हर घर तिरंगा’ रॅलीमुळे ‘हा’ मार्ग बंद