– वाहतुकीला अडथळा झाल्याने पोलिसांची कारवाई
– शनिवारवाडा परिसरात विद्यार्थ्यांची गर्दी

SIR protest movement: एस.आय.आर प्रक्रियेच्या आणि निवडणूक आयोगाच्या विरोधात निषेध नोंदविण्यासाठी शनिवारवाडा ते जिल्हाधिकारी कार्यालय अशी रॅली काढण्याची परवानगी काही संघटनांनी पोलिसांकडे मागितली होती.

मात्र, कायदा व सुव्यवस्थेचा प्रश्न निर्माण होण्याची तसेच सार्वजनिक शांतता भंग होण्याची शक्यता लक्षात घेऊन पोलिसांनी रॅलीला परवानगी नाकारली होती. परवानगी नाकारण्यात आलेली असतानाही शनिवारी (दि. १०) दुपारी काही आंदोलक विद्यार्थी शनिवारवाडा परिसरात रस्त्यावर जमले. त्यामुळे परिसरातील वाहतुकीला अडथळा निर्माण झाला.

यानंतर पोलिसांनी ८८ आंदोलकांना ताब्यात घेतले, त्यांना लष्कर पोलीस ठाण्यात नेण्यात आले. ताब्यात घेतलेल्या आंदोलकांपैकी काही युवकांचे पालक पोलीस ठाण्यात आले होते. या युवकांना त्यांच्या पालकांच्या स्वाधीन करण्यात आले. तर, अन्य आंदोलकांविरोधात नियमानुसार योग्य ती कारवाई करण्यात येत असल्याची माहिती पोलिसांनी दिली.