Shankar Mandekar : पुणे जिल्ह्यातील दौंड तालुक्यातील चौफुला येथील कला केंद्रात गोळीबाराची घटना घडल्याने एकच खळबळ उडाली होती. सुरूवातीला केवळ कलाकेंद्रात गोळीबार झाल्याची घटना घडली आहे, अशी चर्चा सुरू होती, अखेर खरंच गोळीबाराची घटना घडल्याचे पोलिसांनी केलेल्या तपासातून समोर आले आहे.

येथील न्यू अंबिका नावाच्या कलाकेंद्रात ही धक्कादायक घटना घडली आहे. पोलिसांनी या घटनेच्या चौकशीचा वेग वाढवला आहे. या प्रकरणी पोलिसांनी तीन आरोपींना ताब्यात घेतले आहे. या आरोपींमध्ये भोर वेल्हा मुळशीचे राष्ट्रवादी काँग्रेसचे आमदार शंकर मांडेकर यांचे भाऊ बाळासाहेब मांडेकर यांना देखील पोलिसांना अटक केली आहे. यामुळे या प्रकरणाची मोठी चर्चा होत आहे.

यामुळे आता आमदार मांडेकर यांच्या अडचणी वाढणार असल्याची चर्चा होत आहे. अशातच या प्रकरणावर आमदार शंकर मांडेकर यांनी प्रतिक्रिया दिली आहे. मला भावाने काहीही सांगीतलं नाही. आम्ही ठरवलं पाहीजे कसं वागायच ते. जी शिक्षा असेल ती मिळाली पाहिजे. मी किर्तनात असतो, माझा भाऊ कलाकेंद्रावर गेला हे शॉकींग आहे, अशी प्रतिक्रिया मांडेकरांनी दिली आहे.

काय म्हणाले मांडेकर?

मला या घटनेची काही कल्पना नव्हती. मला काल दूपारी पोलीसांचा फोन आला. मी पोलिसांना सांगितलं की कायद्यानुसार कारवाई करा. मी कोणताही दबाव टाकला नाही. काय घडलं ते मलाही माहीत नव्हतं आणि पोलिसांनाही माहीत नव्हतं. मी भावाला सांगितलं की पोलिसांच्या समोर हजर हो. माझा लहान भाऊ समाजकार्य करतो. शेती करतो. भाऊ सकाळी घरा आला.  एक भाऊ चोर असतो एक देव असतो… मी माझं काम करतो.

नेमकं काय घडलं होतं? 

सोमवारी रात्री येथील न्यू अंबिका कला केंद्रामध्ये गोळीबार झाल्याची घटना घडली होती. या घटनेत एक तरूणी जखमी झाली होती. वादातून गोळीबाराची घटना घडली असल्याची माहिती मिळत आहे. या प्रकरणात पोलिसांनी कला केंद्राचे मालक अशोक जाधव यांच्यासह 6 महिलांना ताब्यात घेतले आहे. गोळीबाराच्या घटनेमुळे दौंड तालुक्यासह पुणे जिल्ह्यात मोठी खळबळ उडाली आहे.