Pune News : शहरात अनधिकृत नळजोडांचा सुळसुळाट! अर्ध्या इंचाच्या ठिकाणी एक इंचाच्या जोडण्या
शहरावर पाणी संकटाचे मोठे सावट असताना अनेक ठिकाणी नव्याने उभ्या राहणाऱ्या व्यावसायिक आस्थापना, इमारती, अनधिकृत पत्राशेड आणि मोठ्या गृहप्रकल्पांना पाणीपुरवठा करण्यासाठी (Pune News) महापालिकेच्या नियमांना हरताळ फासला जात असल्याचा गंभीर प्रकार समोर येत आहे.

Pune News : शहरावर पाणी संकटाचे मोठे सावट असताना अनेक ठिकाणी नव्याने उभ्या राहणाऱ्या व्यावसायिक आस्थापना, इमारती, अनधिकृत पत्राशेड आणि मोठ्या गृहप्रकल्पांना पाणीपुरवठा करण्यासाठी (Pune News) महापालिकेच्या नियमांना हरताळ फासला जात असल्याचा गंभीर प्रकार समोर येत आहे.
अनेक ठिकाणी अनधिकृतपणे नळजोड दिले जात असून, आवश्यकतेपेक्षा मोठ्या व्यासाच्या जलवाहिन्या तसेच दुहेरी नळजोड देण्याचे प्रकार सुरू असल्याचे आरोप होत आहेत. यातून शहराच्या पाणीवाटप व्यवस्थेवर अतिरिक्त ताण येत असून, अनेक भागात कमी दाबाने पाणी मिळत आहे. या अनधिकृत नळजोड प्रक्रियेत आर्थिक संबंधांचा संशय व्यक्त केला जात आहे.
शहरातील प्रत्येक भागासाठी लोकसंख्या, बांधकामाचा प्रकार आणि पाण्याची गरज लक्षात घेऊन पाणीपुरवठ्याचे नियोजन केले जाते. त्यानुसार संबंधित व्यावसायिक आस्थापना किंवा घरांना नळजोड देताना जलवाहिनीचा (Pune News) व्यास आणि पाण्याचे प्रमाण निश्चित असणे अपेक्षित आहे. मात्र, प्रत्यक्षात अनेक ठिकाणी नियमांना बगल देऊन नळजोड दिले जात असल्याचे चित्र आहे. ज्या ठिकाणी अर्ध्या इंचाच्या नळजोडाची आवश्यकता आहे, तेथे एक इंचाची जलवाहिनी दिली जात आहे.
विशेष म्हणजे, शहराचा चारी बाजूंनी विस्तार होताना अनेक नव्याने विकसित होणाऱ्या भागांतील व्यावसायिक आस्थापना, गृहप्रकल्पांना अशा पद्धतीने सर्रासपणे अतिरिक्त पाणी उपलब्ध करून दिले जात असल्यास त्याचा थेट परिणाम त्या परिसरातील इतर नागरिकांच्या पाणीपुरवठ्यावर होऊ शकतो.
आर्थिक संबंधांची चर्चा
या नळजोडांसाठी मोठ्या प्रमाणात आर्थिक देवाण – घेवाण होत असल्याची चर्चा आहे. त्यामुळे या प्रकरणात केवळ नियमभंग नव्हे, तर संबंधित यंत्रणेतील अधिकारी आणि कर्मचाऱ्यांच्या संभाव्य संगनमताचीही चौकशी करण्याची गरज निर्माण झाली आहे. यामुळे महापालिकेच्या पाणीपुरवठा विभागाने शहरातील नळजोडांची तपासणी करणे आवश्यक आहे.
आधीच अनेक भागांत अपुऱ्या दाबाने आणि कमी वेळ पाणी मिळत असताना काही बांधकामांना नियमबाह्य पद्धतीने अधिक पाणी दिले जात असल्याने समान पाणीवाटपाच्या तत्त्वालाच हरताळ फासला जात आहे.
४५ अनधिकृत नळजोड तोडले!
महापालिकेच्या चतुःशृंगी पाणीपुरवठा विभागाकडून बाणेर – बालेवाडी -पाषाण परिसरात केलेल्या कारवाईत विविध व्यावसायिक आस्थापना, अनधिकृत पत्राशेड आणि थकबाकीदार तब्बल ४५ अनधिकृत नळजोड तोडण्यात आले आहेत. या कारवाईमुळे अनधिकृत नळजोडांचा प्रश्न ऐरणीवर आला आहे.
मात्र, केवळ जोडण्या तोडून प्रश्न सुटणार नसून, या जोडण्या कोणी मंजूर केल्या, प्रत्यक्षात कोणी बसविल्या आणि त्यासाठी आर्थिक व्यवहार झाले का, याचीही सखोल चौकशी करण्याची आवश्यकता (Pune News) आहे. महापालिकेकडून आवाहन करण्यात आले आहे की, पाणी मीटरची थकबाकी नागरिकांनी लवकरात लवकर भरावी असे आवाहन करण्यात आले आहे.






