Vice President C. P. Radhakrishnan: ज्ञान आणि कौशल्याचा वापर राष्ट्र उभारणीसाठी करा…
Vice President C. P. Radhakrishnan:

उपराष्ट्रपती सी. पी. राधाकृष्णन यांचे विद्यार्थ्यांना आवाहन
सिम्बायोसिस विद्यापीठाचा दीक्षांत समारंभ; १२ विद्यार्थ्यांना सुवर्णपदक
Vice President C. P. Radhakrishnan: शिक्षण हे केवळ पदवी मिळवण्याचे किंवा रोजगाराचे साधन नसून, ते व्यक्तीचे चारित्र्य घडवणारे आणि सामाजिक जबाबदारीची जाणीव करून देणारे प्रभावी माध्यम आहे.
त्यामुळे विद्यार्थ्यांनी आपल्या ज्ञानाचा आणि कौशल्याचा वापर केवळ वैयक्तिक प्रगतीपुरता मर्यादित न ठेवता, समाजकल्याण आणि राष्ट्र उभारणीसाठी करावा, असे प्रतिपादन उपराष्ट्रपती सी. पी. राधाकृष्णन यांनी केले.
सिम्बायोसिस आंतरराष्ट्रीय अभिमत विद्यापीठाच्या २३ व्या दीक्षांत समारंभात ते प्रमुख पाहुणे म्हणून बोलत होते. या वेळी राज्यपाल जिष्णू देव वर्मा, उच्च व तंत्रशिक्षण मंत्री चंद्रकांत पाटील, सिम्बायोसिसचे संस्थापक व अध्यक्ष डॉ. एस. बी. मुझुमदार, कुलपती डॉ. विद्या येरवडेकर, कुलगुरू डॉ. रामकृष्णन रमण आणि वैद्यकीय व आरोग्य विद्याशाखेचे अधिष्ठाता डॉ. राजीव येरवडेकर आदी मान्यवर उपस्थित होते.
उपराष्ट्रपतींनी विद्यार्थ्यांना यशाचा कानमंत्र दिला. ते म्हणाले, की व्यावसायिक यशासोबतच प्रामाणिकपणा आणि नैतिक मूल्यांना तितकेच महत्त्व आहे. आयुष्यात कितीही मोठे यश मिळाले, तरी मूल्यांशी तडजोड करू नका. जगाच्या पाठीवर कुठेही गेलात तरी भारतीय संस्कृती आणि परंपरांचा अभिमान बाळगून देशाची प्रतिमा उंचवा.
तसेच, स्वातंत्र्याच्या शताब्दी वर्षापर्यंत म्हणजेच २०४७ पर्यंत ‘विकसित भारताचे’ स्वप्न साकारण्यात तरुणांची भूमिका निर्णायक ठरेल. भारताकडे असलेली जगातील सर्वांत मोठी युवा लोकसंख्या हेच देशाचे खरे सामर्थ्य असून, तरुणांनी संशोधन आणि कौशल्य विकासातून जागतिक गरजा पूर्ण कराव्यात, असेही त्यांनी नमूद केले.
राज्यपाल जिष्णू देव वर्मा यांनी बदलत्या तंत्रज्ञानाच्या युगात मानवी मूल्यांचे महत्त्व अधोरेखित केले. कृत्रिम बुद्धिमत्ता आणि डिजिटल परिवर्तनाच्या काळात केवळ तांत्रिक ज्ञान असून चालणार नाही, तर भविष्यातील जग हे ज्ञानासोबत विवेक, नवकल्पनांसोबत करुणा आणि महत्त्वाकांक्षेसोबत प्रामाणिकपणा जपणाऱ्यांचे असेल, असे ते म्हणाले.
डॉ. विद्या येरवडेकर यांनी स्वागतपर मनोगत व्यक्त केले, तर कुलगुरू डॉ. रामकृष्णन रमण यांनी विद्यापीठाचा वार्षिक अहवाल सादर केला. या समारंभात उपराष्ट्रपती सी. पी. राधाकृष्णन यांच्या हस्ते १२ गुणवंत विद्यार्थ्यांना सुवर्णपदके, तसेच एका उत्कृष्ट परदेशी विद्यार्थ्याला विशेष पुरस्कार प्रदान करून गौरविण्यात आले.





