FDA: अमेझॉन, बिग बास्केटचे परवाने निलंबित
FDA:

एफडीएची कॅम्प, एमजी रोडवरील २० हॉटेल्सची कसून तपासणी
FDA: अन्न व औषध प्रशासनाने (एफडीए) कॅम्प व महात्मा गांधी रस्ता परिसरातील २० हॉटेल्स व उपाहारगृहांची तपासणी करून ८ हॉटेल्समध्ये स्वयंपाकघरातील अस्वच्छता, मोठ्या प्रमाणात कीटकांचा प्रादुर्भाव आणि कृत्रिम रंगांचा वापर आढळल्याने त्यांचे परवाने तात्काळ निलंबित केले.
त्याचबरोबर सिंहगड रोडवरील अमेझॉन आणि बिग बास्केटच्या दोन साठवण केंद्रांमध्ये अन्न सुरक्षा नियमांचे उल्लंघन आढळल्याने त्यांचे परवाने निलंबित केले आहेत. शहरात एकूण १० हॉटेल्स व खाद्य आस्थापनांसह दोन मोठ्या कंपन्यांच्या साठवण केंद्रांवर कारवाई करण्यात आली.
कॅम्प व महात्मा गांधी रस्ता परिसरातील तपासणीत मेट्रो रेस्टॉरंट, सहाणे व्हेज रेस्टॉरंट, शिवाय कॉर्नर, ग्रँड दिल्ली दरबार, राजे चायनीज फास्ट फूड अँड ज्यूस बार, द बर्गर बार्न कॅफे, महादेव फूड्स आणि फिरोज केटरर्स या आठ आस्थापनांमध्ये स्वयंपाकघरात अत्यंत अस्वच्छ परिस्थिती आणि मोठ्या प्रमाणात कीटकांचा प्रादूर्भाव होता. काही हॉटेल्समध्ये कृत्रिम रंगांचा वापर, तसेच अधिक प्रमाणात चववर्धक पदार्थ वापरल्याचे आढळले.
सिंहगड रोडवरील अमेझॉन (गजानन इन्व्हेंटरीज) आणि बिग बास्केट (इनोव्हेटिव्ह रिटेल कॉन्सेप्ट) यांच्या साठवण केंद्रांमध्ये तपासणीदरम्यान कालबाह्य लाडू, पेढे, केक, पाव, दुधापासून तयार केलेले रस्क, चटणी आदी खाद्यपदार्थ आढळले.
अस्वच्छता, कीटकांचा प्रादुर्भाव, तेलाची गळती, शीतगृहातील अस्वच्छता आदी प्रकारही आढळले. काही खाद्यपदार्थांच्या पाकिटांवर उत्पादन तारीख व वापरण्याची अंतिम तारीख नमूद नसल्याचे आढळल्याने संबंधित आस्थापनांचे परवाने निलंबित करण्यात आले.
ही कारवाई सहआयुक्त (अन्न) श्रीकांत करकळे यांच्या नेतृत्वाखाली सहायक आयुक्त नारायण सरकटे यांच्या पथकाने केली. तपासणी पथकात अन्न सुरक्षा अधिकारी सतीश हाके, प्रिया राजगोळकर, दीपाली घोडके, पूजा बागडे आणि सुप्रिया जगताप यांचा समावेश होता.





