पुणे : आगामी पुणे महानगरपालिका निवडणुकीसाठी राष्ट्रवादी काँग्रेस पार्टी (शरदचंद्र पवार) पक्षाची जोरदार तयारी सुरू आहे. निवडणुकीच्या पार्श्वभूमीवर शरद पवार यांचा राष्ट्रवादी शरदचंद्र पवार पक्ष आणि उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस पक्ष एकत्र येण्याची शक्यता बळावली आहे. शहराध्यक्ष प्रशांत जगताप यांनी याबाबत प्रतिक्रिया दिली आहे. जगताप म्हणाले की, कुणासोबत युती करायची याचा अंतिम निर्णय पक्षनेते शरद पवार घेतील. मात्र, पक्षाच्या वाट्याला येणाऱ्या जागा या ‘तुतारी’ या चिन्हावरच लढवल्या जातील. पुण्यात पक्षाने चांगली मोर्चेबांधणी केली असून, नागरिकांना वेगळा पर्याय हवा असल्याचेही जगताप म्हणाले. महाविकास आघाडीतील राज्यस्तरीय नेत्यांशी चर्चा झाली असून, जिंकण्याची क्षमता असलेल्या उमेदवारांना एकत्र आणण्यावर भर दिला जाईल. प्रशांत जगताप म्हणाले, “माझे नेते शरद पवार साहेब आणि सुप्रिया सुळे आहेत. पक्षाने कुणासोबत युती करावी हा पवारसाहेबांचा निर्णय आहे. आमच्या वाट्याला ज्या जागा येतील त्या तुतारी चिन्हावर लढू. काँग्रेसची राज्यातील ताकद मजबूत आहे, ती दुर्लक्षिता करता येणार नाही, असं प्रशांत जगताप म्हणाले. अजित पवार गटाशी युतीच्या चर्चांवर जगताप म्हणाले, “अजितदादांचा निर्णय माहिती नाही, पण आमच्यासाठी शरद पवारांचा आदेश महत्त्वाचा आहे. काल रात्रीपर्यंत महाविकास आघाडी म्हणूनच बैठका झाल्या.” जागावाटपाबाबत येत्या २५ डिसेंबरपर्यंत अंतिम निर्णय जाहीर होईल, अशी माहिती त्यांनी दिली. पुणे महापालिका निवडणुकीची तयारी पूर्णत्वाकडे जात असून, महाविकास आघाडी आणि महायुती यांच्यात थेट सामना अपेक्षित आहे. या निवडणुकीकडे राज्याचे लक्ष लागले आहे.
