#SAvsIND 1st Test Day 1 Stumps : रबाडाचा पंच! पहिल्या दिवसावर द. आफ्रिकेचं वर्चस्व, भारताचा निराशाजनक खेळ…
IND vs SA 1st Test Day 1 Stumps : – अनुभवी वेगवान गोलंदाज कागिसो रबाडाच्या पाच विकेट्सच्या जोरावर दक्षिण आफ्रिकेने मंगळवारी दोन सामन्यांच्या मालिकेतील पहिल्या बॉक्सिंग डे कसोटीच्या पहिल्या दिवशी भारताचे २०८ धावांत ८ फलंदाज बाद केले. रबाडाने दीर्घकाळ ऑफ स्टंपच्या बाहेर कठीण रेषेवर गोलंदाजी करून भारतीय फलंदाजांना अडचणीत आणले.
लक्षवेधी
– कागिसो रबाडाच्या पाच विकेट्स
– जखमी झाल्यामुळे बामुवाच्या जागी मार्करमकडे आफ्रिकेचे नेतृत्व
– रबाडाचा कर्णधार रोहित शर्मा १३व्यांदा बळी
– ऱोहित, विराट, श्रेयस पहिल्या दिवशी अपयशी
लंच आणि चहाच्या ब्रेक दरम्यान भारताने चार विकेट गमावल्या आणि हे चारही यश रबाडाच्या नावावर होते. पावसामुळे पहिल्या दिवशी केवळ ५९ षटकांचाच खेळ झाला. कमी प्रकाशामुळे दिवसाचा खेळ संपला तेव्हा भारतासाठी के.एल. राहुल ७० धावा करून मोहम्मद सिराज (०) सोबत खेळपट्टीवर उपस्थित आहे.
भारताकडून विराट कोहली (३८), श्रेयस अय्यर (३१) चांगल्या सुरुवातीचे मोठ्या डावात रूपांतर करण्यात अपयशी ठरले. सामन्यात आदल्या दिवशी, पावसामुळे मैदान ओले झाल्यामुळे नाणेफेकीला ४५ मिनिटे उशीर झाला, तर सामना अर्धा तास उशिरा सुरू झाला.
दक्षिण आफ्रिकेचा कर्णधार टेम्बा बावुमाने नाणेफेक जिंकून प्रथम गोलंदाजी करण्याचा निर्णय घेतला आणि सामन्याच्या सुरुवातीच्या तासात अनुकूल परिस्थितीचा फायदा उठवण्यात त्याच्या गोलंदाजांना यश आले. भारतीय संघाने कर्णधार रोहित शर्मा (५), यशस्वी जैस्वाल (१७) आणि शुभमन गिल (२) यांच्या विकेट पहिल्या तासात (१२ षटकांत) २४ धावांत गमावल्या. रबाडाने ऑफ स्टंपबाहेरील चेंडूंवर नवीन चेंडू टाकून भारतीय सलामीवीरांना अडचणीत आणले.
रोहित आपल्या शॉर्ट पिच बॉलवर मोठा फटका मारण्याच्या प्रयत्नात असताना लाँग लेगवर नवोदित नांद्रे बर्गरने झेलबाद केले. त्यानंतर डावखुरा वेगवान गोलंदाज बर्गरने जैस्वाल आणि गिलला बाद केले. यानंतर दक्षिण आफ्रिकेच्या क्षेत्ररक्षकांनी सलग षटकात रबाडाच्या चेंडूवर अय्यरचा आणि बर्गरच्या चेंडूवर कोहलीचा सोपा झेल घेतला. मार्को जॅन्सनने पॉइंटवर अय्यरचा झेल सोडला तर चार धावांच्या स्कोअरवर स्क्वेअर लेगवर टोनी डी जॉर्झीने सोपा झेल सोडत कोहलीला जीवदान दिले. जीवदान मिळाल्यानंतर, कोहली आणि अय्यर यांनी अस्खलित फलंदाजी केली आणि नियमित अंतराने चौकार मारून दक्षिण आफ्रिकेला गोलंदाजीवर वर्चस्व गाजवण्याची संधी दिली नाही, परंतु दुसरे सत्र सुरू होताच रबाडासमोर दोघेही अस्वस्थ दिसले.
UPDATE – Day 1 of the 1st #SAvIND Test has been called off due to rain 🌧️#TeamIndia 208/8 after 59 overs.
See you tomorrow for Day 2 action.
Scorecard – https://t.co/Zyd5kIcYso pic.twitter.com/tmvVtiwRfJ
— BCCI (@BCCI) December 26, 2023
कोहलीने ६४ चेंडूंच्या खेळीत पाच चौकार मारले तर अय्यरने ५० चेंडूंच्या खेळीत तीन चौकार आणि एक षटकार लगावला. उपाहारापूर्वी विराट कोहली (३८) आणि श्रेयस अय्यर (३१) यांनी ६७ धावांची भागीदारी केली होती, पण दिवसाच्या दुसऱ्या सत्रातील पहिल्याच षटकात रबाडाने अय्यरला बोल्ड केले. चेंडू त्याच्या बॅट आणि पायामधून गेला आणि स्टंपला लागला. त्यानंतर त्याने कोहलीच्या मनात अनेक प्रकारचे चेंडू आत-बाहेर जावून संभ्रम निर्माण केला आणि चेंडू त्याच्या बॅटची बाहेरील कडा घेऊन यष्टिरक्षकाच्या हातमज्यात गेला.
काही आक्रमक फटके मारणाऱ्या रविचंद्रन अश्विन (८) आणि शार्दुल ठाकूर (२४) यांच्या विकेट घेत रबाडाने कसोटी क्रिकेटमध्ये १४व्यांदा आपले पंचक पूर्ण करण्याचा पराक्रम पूर्ण केला. शेवटच्या सत्रात जसप्रीत बुमराह भारतासाठी एक धाव घेतल्यानंतर येनसेनच्या गोलंदाजीवर बोल्ड झाला. पण के.एल. राहुलने एक बाजू संभाळताना संधी मिळताच हात उघडत काही चांगले फटके मारले. सहाव्या क्रमांकावर खेळणाऱ्या राहुलमुळेच भारतीय संघाची धावसंख्या २०० च्या पुढे गेली आहे.
Test Cricket : गिलचे करिअर उद्ध्वस्त करू शकतो रोहितचा ‘हा’ निर्णय; असे आहेत मागील 6 डावांचे आकडे..
रबाडाची विक्रमी कामगिरी…
टीम इंडियाचा कर्णधार रोहित शर्मा याला आतापर्यंत आंतरराष्ट्रीय क्रिकेटमध्ये सर्वाधिक वेळा आऊट करणारा गोलंदाज म्हणून न्यूझीलंडच्या टीम साऊथीची ओळख होती. परंतू या सामन्यात रोहितला बाद करत कागिसो रबाडाने पुढचे पाऊल टाकले आहे. टीम साऊदीने १२ वेळा रोहित शर्माला बाद केले होते, तर कागिसो रबाडाने त्याला मंगळवारी १३ वेळा बाद केले आहे. तर श्रीलंकेच्या अँजेलो मॅथ्यूजने रोहित शर्माला दहा वेळा बाद केले आहे. रोहित ९ वेळा ऑस्ट्रेलियाच्या नॅथन लायनचा बळी ठरला आहे. तर न्यूझीलंडच्या ट्रेंट बोल्टने रोहितला आठ वेळा बाद केले आहे. या सामन्यात आऊट होण्यापूर्वी रोहित शर्माने १४ चेंडूत ५ धावा केल्या.
कर्णधार टेम्बा बावुमा जखमी
बॉक्सिंग डे कसोटी सामन्याच्या पहिल्या दिवशी विराट कोहलीच्या कव्हर ड्राईव्हचा पाठलाग करताना दक्षिण आफ्रिकेचा कर्णधार टेम्बा बावुमा जखमी झाला. यामुळे त्याला मैदानाबाहेर पडावे लागले. त्यामुळे त्याच्या जागी आता एडेन मार्कराम कर्णधारपदाची जबाबदारी सांभाळत आहे. बावुमा नुकताच हॅमस्ट्रिंगच्या दुखापतीतून परतला आहे. कर्णधार बावुमाच्या दुखापतीमुळे दक्षिण आफ्रिकेच्या अडचणी वाढल्या आहेत. बावुमाने आफ्रिकेसाठी ५६ कसोटी सामन्यांमध्ये २९९७ धावा केल्या आहेत, ज्यात २ शतकांचा समावेश आहे. बावुमाने दक्षिण आफ्रिकेला एकट्याने अनेक सामने जिंकूण दिलेले आहेत.
संक्षिप्त धावफलक
भारतः पहिला डावः ५९ षटकांत ८ बाद २०८ (विराट कोहली ३८, श्रेयस अय्यर ३१, शार्दूल ठाकूर २४, के.एल राहूल खेळत आहे ७०, मोहम्मद शमी खेळत आहे ०; कागिसो रबाडा ५-४४, नांद्रे बर्गर २-५०, मार्को जानसेन १-५२) वि.दक्षिण आफ्रिका.
