Michael Smith : दक्षिण आफ्रिकेचे माजी प्रथम श्रेणी क्रिकेटपटू मायकेल स्मिथ (Michael Smith) यांची पाकिस्तान संघाच्या सर्व प्रकारच्या क्रिकेटसाठी फलंदाजी प्रशिक्षक म्हणून दोन वर्षांच्या करारावर नियुक्ती करण्यात आली आहे. पाकिस्तान क्रिकेट बोर्डाने (पीसीबी) मंगळवारी ही महत्त्वाची घोषणा केली. आगामी तीन सामन्यांच्या कसोटी मालिकेपूर्वी स्मिथ इंग्लंडमध्ये थेट पाकिस्तान संघाशी जोडले जातील.

लेव्हल-४ चे अनुभवी प्रशिक्षक असलेले स्मिथ (Michael Smith) यांनी यापूर्वी पाकिस्तान सुपर लीगमध्ये (पीएसएल) विविध फ्रँचायझींसोबत उल्लेखनीय काम केले आहे. विशेषतः पीएसएल २०२६ मध्ये त्यांनी ‘मुल्तान सुलतान्स’ संघाचे फलंदाजी प्रशिक्षक म्हणून यशस्वी भूमिका बजावली होती.

टी-20 विश्वचषकानंतर हनीफ मलिक यांना कार्यमुक्त केल्यानंतर, बांगलादेश आणि वेस्ट इंडीज दौऱ्यांवर माजी कसोटीपटू असद शफीक हंगामी फलंदाजी प्रशिक्षक म्हणून काम पाहत होते.

पाकिस्तान क्रिकेटमध्ये यापूर्वीही अनेक परदेशी प्रशिक्षकांची नियुक्ती झाली आहे, परंतु गॅरी कर्स्टन, जेसन गिलेस्पी आणि डेव्ह व्हॉटमोर यांच्यासह अनेक दिग्गजांचे करार मतभेदांमुळे मुदतीपूर्वीच संपले आहेत.

विशेषतः कसोटी क्रिकेटमध्ये पाकिस्तानची फलंदाजी मागील काही हंगामांत सातत्याने कोलमडली असून, ती संघासाठी चिंतेचा विषय ठरली आहे. अशा परिस्थितीत, फलंदाजीची ही तांत्रिक कमकुवतता दूर करण्याची मोठी जबाबदारी आता मायकेल स्मिथ (Michael Smith) यांच्या खांद्यावर असणार आहे. त्यांच्या या दोन वर्षांच्या करारादरम्यान संघाची फलंदाजी सुधारण्याचे मोठे आव्हान त्यांच्यासमोर असेल.