Sassoon Hospital – राज्यातील शासकीय वैद्यकीय महाविद्यालयांमधील निवासी डॉक्टरांच्या प्रलंबित मागण्यांसाठी सुरू असलेल्या राज्यव्यापी बेमुदत आंदोलनाला पुण्यातील बीजे शासकीय वैद्यकीय महाविद्यालय आणि ससून सर्वोपचार रुग्णालयातील निवासी डॉक्टरांनीही पाठिंबा दिला आहे. सुमारे ४०० निवासी डॉक्टरांनी कामबंद आंदोलनात सहभाग घेतल्याने बाह्यरुग्ण सेवा (ओपीडी) आणि नियोजित शस्त्रक्रिया ५ आणि ६ ऑगस्‍ट रोजी बंद ठेवण्यात आल्या.

मात्र, जनहिताचा विचार करून आपत्कालीन सेवा आणि तातडीच्या शस्त्रक्रिया सुरू ठेवल्या. मात्र, नियमित रुग्णसेवेवर मोठा परिणाम झाला आहे. शासन आणि सेंट्रल मार्डच्या शिष्टमंडळामध्ये झालेली बैठक कोणत्याही ठोस निष्कर्षाविना संपुष्टात आल्याने सेंट्रल मार्डने पूर्वनियोजित राज्यव्यापी बेमुदत आंदोलन सुरूच ठेवण्याचा निर्णय जाहीर केला आहे. बैठकीत शासनाने निवासी डॉक्टरांच्या सर्व मागण्यांची गंभीर दखल घेतल्याचे सांगत सेंट्रल मार्डने मांडलेले सर्व मुद्दे मुख्यमंत्र्यांपर्यंत तातडीने पोचवून येत्या काही दिवसांत सकारात्मक निर्णय घेऊ,

असे आश्वासन दिले आहे. मात्र, निवासी डॉक्टरांच्या प्रमुख मागण्यांबाबत समाधानकारक निर्णय किंवा अधिकृत आश्वासन न मिळाल्याने सेंट्रल मार्डने ६ ऑगस्टपासून सुरू होणारे बेमुदत आंदोलन सुरूच ठेवण्याचा निर्णय घेतला आहे. शासनाकडून न्याय्य मागण्यांवर समाधानकारक निर्णय होईपर्यंत आंदोलन सुरू राहणार असल्याचे संघटनेने स्पष्ट केले आहे.

“मागण्यांबाबत केवळ आश्वासन दिले आहे. लेखी मिळत नाही तोपर्यंत आंदोलन सुरू राहणार असल्‍याची संघटनेची भूमिका आहे. यादरम्‍यान ओपीडी आणि नियोजित शस्‍त्रक्रिया बंद असतील. मात्र, आपत्‍कालीन स्थितीत रुग्णांवर उपचार आणि शस्‍त्रक्रिया केल्‍या जातील.”
– डॉ. धीरज धोटे, अध्यक्ष, मार्ड, बीजे शासकीय वैद्यकीय महाविद्यालय