Sanjay Kakade – उपमुख्यमंत्री सुनेत्रा पवार यांच्यावर आक्षेपार्ह टिप्पणी करणाऱ्या काँग्रेस नेत्यांनी ४८ तासांत त्यांची माफी मागावी; अन्यथा सीजेपी आंदोलनाच्या स्टाइलने महाराष्ट्रभर गल्ली- बोळात, रस्त्यावर उतरून काँग्रेसच्या विरोधात आंदोलन करू, असा इशारा माजी खासदार संजय काकडे यांनी बुधवारी पत्रकार परिषदेत दिला. पवार यांच्यावर काँग्रेस नेत्यांनी गुंगी गुडिया अशी टिप्पणी केली.

त्यावरून काकडे यांनी कांग्रेसने माफी मागितली नाही, तर काँग्रेसच्या एकाही नेत्याला रस्त्यावर फिरू दिले जाणार नाही, असे सांगितले. काँग्रेस अशा गोष्टींचे समर्थन करत असेल, तर त्यांची विचारधारा, भूमिका घाणेरडी झाली आहे, म्हणूनच त्यांनी असे वक्तव्य केले आहे, असे सांगून आपल्या सुनेविषयी काँग्रेस नेत्यांनी अशा प्रकारचे वक्तव्य केले आहे, अशा परिस्थितीत राष्ट्रवादी काँग्रेस शरद्चंद्र पवार पक्षाचे अध्यक्ष शरद पवार हे कसे काय गप्प बसले आहेत,

त्यांना आपल्या सुनेविषयी आदर आहे की नाही, असा सवालही काकडे यांनी उपस्थित केला. यासाठी पवार यांच्यासह काँग्रेस नेते राहुल गांधी आणि खा. सुप्रिया सुळे यांनाही पत्र दिले असून, शरद पवार यांनीही याबाबत भूमिका मांडली पाहिजे; अन्यथा त्यांचा या वक्तव्याला पाठिंबा आहे, असे आम्ही समजू. दिवंगत उपमुख्यमंत्री अजित पवार यांच्या मृत्यूची चौकशी करण्यासाठी उपोषण करणारे आमदार रोहित पवार या विषयावरून आक्रमक का नाहीत, असाही प्रश्न काकडे यांनी उपस्थित केला.