Rajasthan : गोध्रा संबंधी प्रकरण असलेलं पुस्तक सरकारने घेतलं मागे, शिक्षणमंत्री दिलावर म्हणाले, “पूर्वीच्या काँग्रेस..”
जयपूर – राजस्थानमध्ये सरकारी शाळांची ती पुस्तके परत मागवण्यात आली आहेत, ज्यात गुजरातमधील 2002 च्या गोध्रा घटनेचा उल्लेख आहे. शिक्षणमंत्री मदन दिलावर म्हणाले की, “पूर्वीच्या काँग्रेस सरकारच्या काळात शाळकरी मुलांच्या पुस्तकात खुन्यांचा गौरव केला जात होता. अशा परिस्थितीत मुलांना चुकीचे शिक्षण मिळू नये यासाठी अशी वादग्रस्त पुस्तके पुन्हा मागवली जातील. राजस्थान सरकारने राज्यातील सरकारी शाळांमध्ये वितरित केलेली चार पुस्तके परत मागवण्याचे आदेश जारी केले आहेत.”
अदृश्य लोग- उम्मीद और साहस की कहानी मधील 9 लंबे साल शीर्षकाच्या प्रकरणात गोध्रा घटनेतील ट्रेन आगीचे वर्णन दहशतवादी कट म्हणून करण्यात आले आहे. याबाबत आता भाजप सरकारने मागील सरकारविरोधात आघाडी उघडली आहे.
शिक्षणमंत्री म्हणतात- जेव्हा ही पुस्तके वाचली तेव्हा गोध्रामध्ये काय घडले याबद्दल नकारात्मक माहिती देण्यात आली होती. पुस्तकांमध्ये गुन्हेगाराचे महिमामंडन आहे. गोध्रा घटनेतील मारेकऱ्यांचा गौरव करण्याचा प्रयत्न पुस्तकांमध्ये करण्यात आला आहे, तो योग्य नाही. अशा स्थितीत वादग्रस्त पुस्तक परत मागवण्यात आले आहे. आता मुले वादग्रस्त मुद्दे वाचणार नाहीत.
जे पुस्तक मागे घेण्यात आले आहे ते सामाजिक कार्यकर्ते हर्ष मंदर यांनी लिहिले आहे. ते मध्य प्रदेश-छत्तीसगड कॅडरचे माजी आयएएस आहेत. दोन जिल्ह्यांत जिल्हाधिकारी झाले आहेत. गुजरात दंगलीनंतर त्यांनी आयएएसची नोकरी सोडली आणि एका एनजीओमध्ये काम करायला सुरुवात केली. गेल्या वर्षी केंद्रीय गृहमंत्रालयाने त्यांच्याविरोधात सीबीआय चौकशीचे आदेश दिले होते. परदेशातून देणग्या घेऊन कायद्याचे उल्लंघन केल्याचा आरोप त्यांच्यावर होता. मंदर यांनी 25 हून अधिक पुस्तके लिहिली आहेत.
