Railway Accident – पुणे रेल्वे विभागातून दररोज दक्षिण आणि उत्तर भारतात जाणाऱ्या गाड्यांमुळे पुणे, हडपसर, दौंड आणि मिरज स्थानकांवर प्रवाशांची कायम प्रचंड गर्दी असते. मात्र, अनेकदा घाईगडबडीत गाडी पकडण्यासाठी किंवा एका फलाटावरून दुसऱ्या फलाटावर जाण्यासाठी प्रवासी पादचारी पुलाचा वापर न करता थेट रेल्वे रूळ ओलांडून शॉर्टकट मारतात. यामुळे गेल्या दीड वर्षात ५२३ प्रवाशांना जीव गमवावा लागला आहे, तर ८७ प्रवासी गंभीर जखमी झाले आहेत.

रेल्वे प्रशासनाकडून प्रवाशांच्या सुरक्षेसाठी वारंवार सूचना दिल्या जातात आणि रेल्वे पोलीसही विविध उपाययोजना करतात. मात्र, अनेक प्रवासी या नियमांकडे सर्रास दुर्लक्ष करतात. आजकाल प्रवाशांमध्ये रेल्वे रूळ ओलांडताना किंवा फलाटावर चालताना कानात हेडफोन, ब्लूटूथ लावून मोबाइलमध्ये गुंग राहण्याचे प्रमाण वाढले आहे. यामुळे समोरून किंवा पाठीमागून येणाऱ्या रेल्वे गाड्यांचा आवाज किंवा हॉर्न प्रवाशांना ऐकू येत नाही. परिणामी, भीषण अपघात घडतात.

रेल्वे रुळावरून अनधिकृतपणे ये- जा करणे हा कायद्याने गुन्हा असून, प्रवाशांनी धावत्या गाड्यांमध्ये चढण्याचा प्रयत्न करू नये, फलाट बदलण्यासाठी पादचारी पुलाचाच वापर करावा आणि रेल्वे परिसरात हेडफोनचा वापर टाळावा, असे आवाहन पुणे रेल्वे विभागाचे जनसंपर्क अधिकारी हेमंतकुमार बेहेरा यांनी केले. एका मिनिटाची घाई आयुष्यभरासाठी संपवू शकते, याचे भान प्रवाशांनी ठेवणे गरजेचे आहे.

दंड आणि कारवाईची तरतूद
अनधिकृतपणे रूळ ओलांडणे हा गंभीर आणि अजामीनपात्र गुन्हा आहे. रुळांवरून शॉर्टकट मारणाऱ्यांवर रेल्वे सुरक्षा दलातर्फे गुन्हे दाखल केले जातात. रेल्वे रूळ ओलांडताना पकडल्यास एक हजार रुपये दंड, त्याचबरोबर त्याच्या चुकीमुळे गंभीर घटना घडण्याची शक्यता असल्यास सहा महिन्यांपर्यंतच्या कारावासाची तरतूद या कायद्यात आहे. हेडफोन वापरल्यास, हुज्जत घातल्यास कारवाई, तसेच रेल्वे परिसरात विनाकारण फिरणे किंवा रेल्वे पोलिसांच्या कामात अडथळा आणल्यास दंडात्मक कारवाई होते.