Pune Water Cut : शहराला पाणीपुरवठा करणाऱ्या खडकवासला धरण साखळी प्रकल्पात अवघा साडेपाच टीएमसी पाणीसाठा शिल्लक असल्याने पुढील तीन महिन्यांसाठी पाण्याचे नियोजन करण्यात येणार आहे. त्यानुसार पुणेकरांना पुढील आठवड्यापासून दिवसाआड पाणीपुरवठा केला जाण्याची शक्यता आहे. त्याबाबतचा प्रस्ताव पाणीपुरवठा विभागाने महापालिका आयुक्तांना सादर केला आहे.

पाणी वाटपात कोणतीही कपात केली नाही तर धरणातील सध्याचे पाणी शहराला जुलैअखेरपर्यंतच पुरेल, असा अंदाज आहे. त्यातच हवामान विभागाने यंदा पाऊस ९० टक्क्यांपेक्षाही कमी होण्याची शक्यता वर्तविली आहे. त्यामुळे उपलब्ध पाणी पुढील तीन महिन्यांसाठी राखीव ठेवणे आवश्यक आहे. याबाबत महापालिका आयुक्त नवल किशोर राम यांनी बुधवारी सकाळी पाणीपुरवठा विभागाची बैठक घेतली. बैठकीत पाणी कपातीच्या पर्यायांवर चर्चा झाली.

शहरासाठी हा महत्त्वाचा निर्णय असल्याने राजकीय पक्षांच्या प्रतिनिधींशी चर्चा करून पुढील आठवड्यापासून याची अंमलबजावणी करण्याचे ठरविण्यात आले. प्रशासनाने पाणीकपातीचे वेळापत्रकही तयार केले आहे. जून महिना सुरू झाला तरी शहरात अद्याप पूर्वमोसमी पावसाची सुरुवात झालेली नाही. तसेच मान्सूनही दोन आठवडे विलंबाने येण्याची शक्यता आहे. त्यामुळे आतापासूनच पाणी कपात केल्यास पुढील वर्षासाठी पाण्याचे नियोजन करणे सोयीचे ठरणार आहे.

पाणी कपातीचे गणित
शहरासाठी दरमहा १.६० टीएमसी पाणी घेतले जाते. त्यानुसार पालिकेस पुढील तीन महिन्यांसाठी ४.८० टीएमसी पाणी लागेल. या तीन महिन्यांत धरणातून १.८० टीएमसी पाण्याचे बाष्पीभवन होण्याची शक्यता आहे. शेतीसाठी सुरू असलेल्या आवर्तनाकरिता पुढील काही दिवसांत ०.८० टीएमसी पाणी आवश्यक आहे. त्यामुळे प्रत्यक्षात ६.६० टीएमसी पाणी धरणात असणे आवश्यक आहे.

प्रत्यक्षात धरणात ५.७२ टीएमसीच पाणी असल्याने दिवसाआड पाणी पुरवठा केल्यास पालिकेस महिन्याला १.१५ टीएमसी पाणीच लागणार आहे. कपातीमुळे तीन महिन्यांत जवळपास १.४० टीएमसी पाणी वाचणार आहे. त्यामुळे प्रशासनाने दिवसाआड पाणीपुरवठा करण्याचा निर्णय घेतला असून त्याचे वेळापत्रकही तयार केले आहे.

“पाण्याच्या सद्यस्थितीबाबत आयुक्तांनी बुधवारी बैठक घेतली असून एक दिवसाआड पाणीकपातीचा प्रस्ताव सादर केलेला आहे. अंतिम निर्णय आयुक्त घेणार आहे. त्यानंतर वेळापत्रकाची अंमलबजावणी केली जाईल.”
– नंदकिशोर जगताप (मुख्य अभियंता पाणी पुरवठा विभाग)