Pune Rain Update – शहरासह उपनगरांमध्ये सलग पाचव्या दिवशी पावसाचा जोर कायम असून, आज (दि. ५) सायंकाळपर्यंत शिवाजीनगर परिसरात १५ मिलिमीटर पावसाची नोंद झाली आहे. विशेषत: मागील पाच दिवसांत शहरात १०० मिमी पावसाची नोंद झाली असून, धरणक्षेत्रातही पावसाचा जोर वाढला आहे. त्यामुळे पुणेकरांना मोठा दिलासा मिळाला आहे. दरम्यान, पुढील २४ तासांसाठी पुणे जिल्ह्याला पावसाचा रेड अलर्ट दिला असून, शहरात हलका ते मध्यम,

तर घाट परिसरात मुसळधार ते अतिमुसळधार पावसाची शक्यता पुणे वेधशाळेने वर्तविली आहे. रविवारी (दि. ५) सकाळपासूनच पावसाने दमदार हजेरी लावल्यामुळे शहरातील अनेक मुख्य रस्ते जलमय झाले होते. सुट्टीचा दिवस असल्याने रस्त्यांवर नेहमीसारखी वाहनांची वर्दळ नव्हती, त्यामुळे वाहतूक कोंडी टळली असली, तरी वाहनांचा वेग कमालीचा मंदावला होता. गेल्या पाच दिवसांपासून सुरू असलेल्या संततधार पावसामुळे शहरातील अनेक रस्त्यांवर लहान- मोठे खड्डे पडले आहेत.

या खड्ड्यांमुळे आणि साचलेल्या पाण्यामुळे पीक अवरमध्ये वाहनांचा वेग मंदावल्याने वाहतूक कोंडीला सामोरे जावे लागले. दुपारी दोन वाजेपर्यंत शहरात पावसाची संततधार सुरू होती. त्यानंतर काही वेळ पावसाने विश्रांती घेतली. मात्र, दुपारी चारनंतर पुन्हा पावसाचा जोर वाढला आणि दोन ते तीन हलक्या सरी कोसळल्या. शहरातील मध्यवर्ती पेठांसह कोथरूड, वारजे, धायरी, सिंहगड रोड,

आंबेगाव, कात्रज, बिबवेवाडी, धनकवडी, हडपसर, मगरपट्टा, मुंढवा, येरवडा, विश्रांतवाडी, औंध आणि पाषाण या सर्वच उपनगरांमध्ये पावसाची रिपरिप दिवसभर कायम होती. जिल्ह्यातील भोरमध्ये आज सायंकळपार्यंत सर्वाधिक ४२ मिमी पावसाची नोंद झाली. माळीण येथे ३०, तर चिंचवड, निमगिरी आणि राजगुरूनगर परिसरात प्रत्येकी २८ मिमी पाऊस झाला. शिरूर येथे १९, पाषाण परिसरात १६, शिवाजीनगर येथे १५, एनडीए परिसरात १४, तर दापोडी येथे १३ मिमी पावसाची नोंद.