Pune power cut – पावसाळा तोंडावर आला असतानाही उकाड्याने अंगाची लाहीलाही होत असतानाच, आता पुणेकरांना महावितरणच्या लहरी कारभाराचा मोठा शाॅक बसू लागला आहे. गेल्या काही दिवसांपासून शहराच्या विविध भागांत महावितरणकडून कोणतीही पूर्वसूचना न देता तासनतास वीज पुरवठा खंडित केला जात आहे. त्यामुळे पुण्यात सध्या एक प्रकारे अघोषित भारनियमन सुरू असल्याचे चित्र असून,

संतप्त पुणेकरांमधून महावितरणविरोधात तीव्र संताप व्यक्त होत आहे. शहरात दर गुरुवारी नियोजित दुरुस्तीसाठी वीजपुरवठा बंद ठेवला जातो. मात्र, आता गुरुवार व्यतिरिक्त आठवड्याचे सातही दिवस कोणत्याही पूर्वसूचनेशिवाय वीज गायब होत असल्याने नागरिकांचे दैनंदिन वेळापत्रक पूर्णपणे कोलमडले आहे. शहराच्या अनेक भागांत दररोज अर्धा ते एक तास, तर काही ठिकाणी त्याहून अधिक काळ अचानक विद्युत पुरवठा खंडित केला जात आहे.

दरम्‍यान, आता पावसाळा सुरू होण्याचे दिवस असूनही अजूनही उकाडा कायम आहे, त्यामुळे विजेची मागणी वाढलेली आहे, तसेच मध्येच वातावरणात किमान तापमानात घट होत आहे. या संमिश्र वातावरणामुळे काही ठिकाणी तांत्रिक बिघाड होण्याची शक्यता नाकारता येत नाही. मात्र, महावितरण वीजपुरवठा सुरळीत ठेवण्याचे सर्वतोपरी प्रयत्नशील असल्‍याची माहिती महावितरणकडून देण्यात आली.

पेठांसह उपनगरांना सर्वाधिक फटका
या अघोषित भारनियमनाचा सर्वाधिक फटका शनिवार पेठ, सदाशिव पेठ, नारायण पेठ, रविवार पेठ या मध्यवर्ती भागांसह सिंहगड रस्‍ता, धायरी, वानवडी, कोंढवा, हडपसर, कात्रज, धनकवडी आणि सातारा रस्ता परिसरातील उपनगरांना बसत आहे. दुपारच्या कडक उन्हाच्या वेळी किंवा रात्रीच्या वेळी अचानक वीज गेल्याने लहान मुले,

वृद्ध आणि आजारी व्यक्तींचे प्रचंड हाल होत आहेत. मध्यवर्ती पेठांमधील व्यापारी आणि उपनगरांमधील आयटी व्यावसायिक, छोटे दुकानदार यांना विजेअभावी मोठा आर्थिक भुर्दंड सहन करावा लागत आहे. कॉम्प्युटर, इंटरनेट आणि इतर यंत्रसामग्री ठप्प झाल्याने कामाचा खोळंबा होत आहे.