May Rainfall – शहरात गतवर्षी (२०२५) मे मध्ये पावसाने ६४ वर्षांचे रेकॉर्ड मोडून दमदार हजेरी लावली. तब्बल १३५ मिमी पावसाची नोंद गतवर्षी झाली. मात्र, यंदा मे मध्ये सरासरीपेक्षा खूपच कमी १९ मिमी पाऊस झाला आहे. त्यामुळे संपूर्ण महिनाभर पुणेकरांना कडक ऊन आणि असह्य उकाड्याने हैराण केले आहे. शहर आणि जिल्ह्यात मे मध्ये साधारणपणे ४० मिमी पाऊस पडतो. गेल्या वर्षी (२०२५) मे मध्ये सरासरीपेक्षा तब्बल तिप्पट म्हणजेच १३५.२ मिमी पाऊस झाला.

गेल्या ६४ वर्षांतील मे महिन्यातील हा रेकाॅर्ड ब्रेक पाऊस होता. मागील पाच वर्षातील मे महिन्यातील पावसाची आकडेवारी पाहिली तर २०२४ आणि २०२१ मध्ये सरासरीपेक्षा जास्त ७२ ते ८८ मिमी पावसाची नोंद झाली होती. २०२२ आणि २०२३ मध्ये सरासरीपेक्षा कमीच पाऊस झाला. २०२५ मधील मे महिन्यात दोन ते चार दिवस आधीच मान्सून केरळमध्ये दाखल झाला होता.

महाराष्ट्रातही वेळेअधी म्हणजेच मे महिन्याच्या अखेरीस मान्सून दाखल झाल्यामुळे पूर्वमोसमी पाऊस आणि मान्सूनच्या पावसाने दमदार हजेरी लावत पुण्यात उकाड्यापासून हैराण झालेल्या नागरिकांना गारवा दिला. यंदा मे महिन्यात उन्हाचा चटका अंगाची लाहीलाही करून गेला. उकाड्याने पुणेकर असह्य झाले. उष्णतेचा पारा ४० अंशाच्या पुढे गेला होता. मान्सूनच्या आगमनाची चाहूल लागली असताना पूर्व मोसमी पाऊस पुणेकरांना दिलासा देईल असे वाटत होते.

मात्र, पावसाने हुलकावणी दिली आणि पारा वाढतच गेला. महिन्याच्या अखेरीस दि. २२ आणि २३ मे रोजी शहरात दुपारनंतर झालेल्या पावसामुळे काहीसा दिलासा मिळाला. यावेळी केवळ १९ मिमी पावसाची नोंद झाली. त्यानंतर पुन्हा हवामान कोरडे आणि उन्हाचा चटका वाढता राहिला. जून महिन्यातही पारा वाढलेला असून, मान्सून महाराष्ट्रात दाखल झाला तरी पावसाने अजून हजेरी लावलेली नाही. त्यामुळे पुणेकर उन्हाने आणि घामाने हैराण झाले आहेत.